Sơnăm 2022, kiơ̆ nơ̆r athei đơ̆ng yăn âu, Kuô̆k hô̆i chă rơih, apinh jet dôm ƀok Kơdră tơm, kơdră chĕp kơ̆l dôm anih: Choh jang xa păng atŏk tơiung tơring tơrang; vei lăng jên hu; anih mong jên, vei lăng trong nơnăm, ming man, jang nô̆i vŭ, roi tơbăt păng dăr lăng. Dôm tơdrong pơmat tat, tơhlăk tăk, dôm tơdrong tam mă pran, ưh kơ ‘lơ̆ng lơ̆m tơdrong vei lăng tĕh đak hơnơ̆ng đei pơma tơpăt, tơblang hơdăh lơ tơdrong, apinh hơlen tơ̆ dôm ‘măng hop akŏm Kuô̆k hô̆i. Tơdrong ƀơm băl đơ̆ng nơ̆r pĭnh hơlen đơ̆ng dôm bơngai tang măt Kuô̆k hô̆i păng nơ̆r tơl đơ̆ng dôm ƀok Kơdră tơm, Kơdră chĕp kơ̆l Anih jang, nơ̆r pơjăh băl tôch tơpăt hlôi chă đei trong jang ‘lơ̆ng. Bơngai tang măt Trần Văn Lâm, khul tang măt Kuô̆k hô̆i dêh char Bắc Giang akhan: “Nơ̆r apinh roi đunh roi trŏ tơdrong ƀiơ̆. Oei nơ̆r tơl đơ̆ng dôm ƀok Kơdră, bơngai jang lơ̆m Khul kơdră tĕh đak ‘nŏh ưh đei vĕh ver, pơdăr tơdrong kiơ.”

Tơdrong jơnei đơ̆ng rim ‘măng apinh hơlen ưh lăp ƀât nơ̆r apinh tơpăt, pĭnh hơlen hơnăp jang, dăh mă dôm nơ̆r tơl tơpăt ‘lơ̆ng, rơđăh rơđong, đei ƀĕnh tơdrong ‘mĕh vă đĕch, ƀât lăp đe ƀok Kơdră iung tơl tơblang oei pơma nơ̆r chĭu pŭ hăm hơnăp jang đơ̆ng kơdih hai. Tơdrong jơnei hlŏh jĭ bơngai apinh păng bơngai tơl đei đon ‘mĕh pơjing pơ ‘lơ̆ng vă chă đei trong jang ăn dôm tơdrong vei lăng tĕh đak mă ‘lơ̆ng hlŏh dơ̆ng.

Tơdăh tơ̆ dôm ‘măng apinh jet păng tơl nơ̆r apinh jet, dôm bơngai tang măt Kuô̆k hô̆i păng đe ƀok kơdră tơm, bơngai jang lơ̆m Khul kơdră tĕh đak hlôi tơƀôh hơdăh jơhngâm đon lăng tơpăt, pơma trŏ hăm dôm tơdrong ưh kơlăp tơ̆ yăn âu vă tơlĕch trong jang tơtom ‘lơ̆ng, ‘nŏh tơdrong chă rơih dôm tơdrong vă hơlen năng hlôi tơgŭm lơ bơngai băt hơdăh hlŏh dơ̆ng dôm tơdrong ưh kơ ‘lơ̆ng, oei tơhlăk tăk lơ̆m rim tơdrong jang vei lăng tĕh đak. Tơdrong dăr hơlen đơ̆ng Kuô̆k hô̆i găh pơhuach kư̆ kă tơ̆ 2 Hnam pơgang Bạch Mai păng Việt Đức anih jang 2 ‘nŏh jĭ 1 pơtih gia tôch hơdăh. Đơ̆ng rŏng tơdrong dăr lăng đơ̆ng Kuô̆k hô̆i, Thủ tướng tĕh đak hlôi truh hơlen năng 2 tơdrong jang ‘nâu păng athei pơjing Grŭp jang hơlen năng tôm tơdrong mưh bơ̆ jang păng tơlĕch trong jang mă rơđăh. Bơngai tang măt Nguyễn Anh Trí, khul tang măt Kuô̆k hô̆i plt Hà Nội akhan, ‘nâu jĭ trong jang ‘nao lơ̆m tơdrong dăr lăng đơ̆ng Kuô̆k hô̆i, “vă pơjing hai, tang găn hai” hăm tơdrong pơm hơdăh hơnăp jang lơ̆m dôm tơdrong tam mă pran ‘lơ̆ng: “Khul dăr lăng đơ̆ng Kuô̆k hô̆i hôp păng đei nơ̆r pơma. Đơ̆ng rŏng kơ ‘nŏh Thủ tướng tĕh đak chĕp kơ̆l khul jur truh hloi vă sek tơlang. Tơdrong ‘nŏh ăn ƀôh tơdrong đei yoa đơ̆ng tơdrong jang dăr lăng đơ̆ng Kuô̆k hô̆i.

Lơ̆m sơnăm 2022, 4 tơdrong đei pơgơ̆r dăr lăng, ‘nŏh jĭ: Tơdrong tơproh trong jang, tơdrong ‘mơ ‘met, tang găn pơhuach kư̆ kă; sơng kon pơlei, sek tơlang dôm nơ̆r tơkêng păng tơdrong hơmet ming anih jang hanh chĭnh tơ̆ apŭng, xăh. Jơhngâm đon jang tơnăp: lăp hăm yăn âu, đei yoa, pơhnŏng tôch ai, tơpăt ‘lơ̆ng păng jang tơnăp đei tơƀôh hơdăh lơ̆m dôm ‘măng dăr lăng.

‘Măng mă blŭng, dôm Khul dăr lăng đei krao hloi bơngai juăt jang păng kơdră chĕp kơ̆l 1,2 anih jang đei ƀơm truh. Tơdăh nhen adrol ki, Khul tang măt Kuô̆k hô̆i lăp chă dăr lăng tơ̆ dôm tơring mă Khul dăr lăng đơ̆ng Kuô̆k hô̆i păng Anih chĕp kơ̆l pơgơ̆r Kuô̆k hô̆i ưh đei năm dăr lăng ‘nŏh dang ei, dôm Khul tang măt Kuô̆k hô̆i athei pơgơ̆r dăr lăng hăm đĭ đăng tơdrong jang hloi.

Dôm tơdrong ưh kơ ‘lơ̆ng hơiă đei pơma tơƀôh tơpăt vă hơmet ming, dôm tơdrong hơgăt đei tơlĕch hrơ̆ch ‘lơ̆ng, drơ̆ng 1 nơ̆r păng dôm tơdrong jang glăi đei roi tơƀôh vă hơlen năng hơnăp bu, đei trong sek tơlang… Pơtih gia nhen dăr lăng tơdrong tơgŭm, khôi luơ̆t găh sơng kon pơlei păng sek tơlang tơdrong tơkêng, kiơ̆ Phŏ Kơdră Anih jang kiơ̆ tơdrong ‘mĕh vă đơ̆ng kon pơlei, ƀok Lưu Bình Nhưỡng, tơdrong dăr lăng âu iŏk đei tơdrong tơgŭm tôch dêh đơ̆ng kon pơlei. Kơlih yoa, dăr lăng ưh kơsĭ tơdrong tơchă hơlen tơdrong ưh kơlăp mă vă tưk tơiung jơhngâm đon bơ̆ jang mă ‘lơ̆ng hlŏh dơ̆ng, păng mưh ƀôh tơdrong glăi ‘nŏh apinh dôm anih jang kơpal sek tơlang kiơ̆ tơdrong hơgăt: “Tơdrong ‘lơ̆ng dang yơ ‘nŏh athei mơ̆ng kiơ̆ nơ̆r pơma đơ̆ng bơngai tăh hla, kon pơlei. Thoi nŏh kiơ̆ đơ̆ng chă dăr lăng vă bơ̆n lăng năng dơ̆ng, lăng ƀôh tơdrong ‘lơ̆ng, hơnăp jang đơ̆ng kăn ƀô̆, mă loi jĭ dôm bơngai chĕp kơ̆l lơ̆m tơdrong sơng kon pơlei.

‘Long rek pơtŏ tơdrong đei yoa đơ̆ng tơdrong jang Kuô̆k hô̆i ‘nŏh jĭ tơdrong lăp đon păng đon lui đơ̆ng bơngai tăh hla. Păng bơngai tăh hla- dôm bơngai hơnơ̆ng druh kiơ̆ tơdrong jang đơ̆ng Kuô̆k hô̆i, akhan tơdrong jang dăr lăng đơ̆ng Kuô̆k hô̆i hlôi tơplih ‘nao pran ‘lơ̆ng găh đon tơchĕng păng trong jang hai. ‘Nâu jĭ nơ̆r pơma đơ̆ng bơngai tăh hla, akhan: “Kuô̆k hô̆i hơnơ̆ng đei lơ tơdrong tơplih ‘nao kiơ̆ trong dăr lăng jê̆ pơlei, ‘moi kiơ̆ tơdrong arih xa tơ̆ yăn âu. Yoa thoi nŏh, tơdrong dăr lăng đơ̆ng Kuô̆k hô̆i dăh mă tơdrong jet hơlen đơ̆ng Kuô̆k hô̆i hơnơ̆ng ‘moi kiơ̆ đơ̆ng Kuô̆k hô̆i jăl hơdrol, mă lei dang ei jang kơtang ƀiơ̆, ‘lơ̆ng ƀiơ̆.

Dôm tơdrong tơplih ‘nao đơ̆ng dăr lăng trŏ thoi nơ̆r Kơ dră Kuô̆k hô̆i Vương Đình Huệ pơma, ‘nŏh dăr lăng athei akŏm jơhngâm tơiung pơjing; athei tưk tơiung đei dôm trong jang ‘lơ̆ng, dôm trong jang hơiă; dăr lăng athei yoa tơdrong hơmet pơ ‘lơ̆ng, pơih trong ăn jang tŏk: "Dăr lăng athei kiơ̆ jơhngâm tơiung pơjing, kơplăh pơjing păng tang găn athei hơnơ̆ng jing tơdrong tơm, bơ̆ jang đunh đai; tang găn mă pran păng jang mă hrĕnh. Chih pơjing khôi luơ̆t ‘nŏh vă pơih trong ăn jang tŏk. Tơdrong dăr lăng athei jang yoa tơdrong vă pơih trong jang tŏk ‘năi. Kuô̆k hô̆i hơnơ̆ng tơplih ‘nao kơdih, yoa thoi nŏh, rim anih jang kơ Kuô̆k hô̆i athei bơ̆ jang ‘lơ̆ng tơdrong dăr lăng, rim bơngai tang măt Kuô̆k hô̆i athei hơlen năng kơdih kiơ̆ đơ̆ng tơdrong jang, hơnăp jang đơ̆ng kơdih hăm bơngai tăh hla vă gơ̆h pơih đei chăl ‘nao hăm lơ tơdrong hơmĕng ‘lơ̆ng hơiă lơ̆m tơdrong jang đơ̆ng Kuô̆k hô̆i nhen nơ̆r pơtho păng đon hơmĕng đơ̆ng Tổng Bí thư Nguyễn Phú Trọng pơma ƀât blŭng Hop akŏm mă mônh, Kuô̆k hô̆i jăl XV.

Nơ̆r pơma đơ̆ng Kơdră Kuô̆k hô̆i Vương Đình Huệ lơ̆m tơdrong jang dăr lăng đơ̆ng Kuô̆k hô̆i ưh lăp tơtă ăn rim bơngai tang măt Kuô̆k hô̆i đĕch mă hăm rim anih jang kơ Kuô̆k hô̆i hai, athei hơtŏk hlŏh dơ̆ng hơnăp jang đơ̆ng kơdih kâu. Dăr lăng vă “tơiung pơjing” dôm tơdrong ‘lơ̆ng hơiă, yoa tơdrong tơm ‘nŏh pơih pơjing tơdrong ‘lơ̆ng, hiôk hian vă jang tŏk kăl đei đon jang tơnăp, tôch pơnĕh, nuih mơng păng khŏm drŭh kiơ̆ tơdrong tơjră vă pơyoa ăn tơdrong đei yoa atŭm đơ̆ng bơngai tăh hla păng kon pơlei, yoa tơdrong đei yoa atŭm kơ tĕh đak.