Đĭ jing tơdrong juăt, rim pơgê iung đơ̆ng tep, ƀok Y Tài tơ̆ xăh Quảng Phú, apŭng Krông Nô, dêh char Đăk Nông hơnơ̆ng pơih radio vă mơ̆ng Tơdrong tơroi pơma nơ̆r M’nông đơ̆ng Radio nơ̆r pơma Việt Nam. Ƀok Y Tài sơnăm ‘nâu đĭ hlŏh 80 sơnăm bơih, mă lei oei hơnơ̆ng chă mơ̆ng dôm tơdrong kơtơ̆ng ang lơ̆m teh đak păng tơ̆ teh đak đe kiơ̆ đơ̆ng radio pơma nơ̆r M’Nông.

Kăl loi, tơdrong tơroi oei roi tơƀôh khoa hŏk ki thuơ̆t păng pơih lơ tơdrong hơri brông, tơdrong tơroi hơ 'mon, vang chĕp vei 'lơ̆ng dôm tơdrong juăt kơ dôm hơdrĕch kon kông dơ̆ng: “Inh mơ̆ng nơ̆r M’nông đơ̆ng Radio nơ̆r pơma Việt Nam đơ̆ng sơnăm 2006 truh dang ei, inh đa mơ̆ng tơdrong tơroi găh Choh jang xa vă gơ̆h băt ki thuơ̆t jang păng vei rong dôm kơloăi ‘long pơtăm, mă 2 ‘nŏh mơ̆ng tơdrong hơri brông, tơdrong hơri M’nông nhôn, nơ̆r M’nông lơ̆m Radio nơ̆r pơma Việt Nam mơ̆ng tôch ƀônh hlôh, nơ̆r M’nông preh kơna dôm hơdrĕch M’nông nai kŭm mơ̆ng hlôh ngăl, tôch kơ hơiă, kiơ̆ đơ̆ng tơdrong tơroi âu inh ‘mĕh chăl mơlôh hrei ‘nâu adrin hŏk pơhrăm, adrin chĕp vei păng tưk tơiung tơdrong juăt, jŏh ayŏ kơ dŏ xoang đơ̆ng hơdrĕch kơdih, ưh kơsĭ yoa tơdrong arih xa hrei ‘nâu mă hŭt lê̆ dôm tơdrong juăt ‘lơ̆ng đơ̆ng hơdrĕch kơdih”

Đơ̆ng rŏng 18 sơnăm pơih, Tơdrong tơroi pơma nơ̆r M’Nông đơ̆ng Radio nơ̆r pơma VN dar dĕh pơm lăp hăm tơdrong ‘mĕh vă đơ̆ng bôl boăl mơ̆ng brŏ. Dôm bơngai chih, tơblơ̆, pơre nơ̆r nhen Thị Đoắt, H’Thi Rya, Điểu Thân, Y Sưng hơnơ̆ng adrin hŏk pơhrăm, jang kiơ̆ trong roi tơbăt lơ̆m chăl hle. Ưh lăp tơblơ̆, pơre dôm tơdrong kơtơ̆ng ang, tơdrong tơroi tơ̆ lăm thu đĕch, đe sư oei jur truh tơ̆ pơlei pơla lơ̆m tơring Tây Nguyên chih bơ̆n ƀai, vă tơdrong tơroi roi hơiă hlŏh dơ̆ng.

Ƀôh tơdrong hơiă ‘nŏh, ƀok Y Cam- Phŏ Kơdră vei lăng kon pơlei xăh Quảng Phú, apŭng Krông Nô, dêh char Đăk Nông akhan: “Nơ̆r M’nông lơ̆m Radio nơ̆r pơma Việt Nam tôch hơiă, mơ̆ng ƀônh hlôh, tơroi tôm tơdrong kon pơlei kăl, pơtih gia nhen Trong jang đơ̆ng Đảng, Teh đak tơjur ăn kon pơlei, chă tơroi ăn mih ma duch nă ki thuơ̆t choh jang xa, vei rong ‘long chĕh phe, tiu... Kon pơlei kŭm tôch ‘mĕh mơ̆ng tơdrong kơtơ̆ng ang, tơdrong tơroi tôch đei yoa hăm kon pơlei. Inh hơpơi ‘mĕh đei bôl boăl jang lơ̆m Tơdrong tơroi pơma nơ̆r M’nông chih tơroi lơ tơdrong ‘nao, hơiă păng pơm lăp hăm tơdrong ‘mĕh vă, đei yoa ăn kon pơlei”.

Vă druh kiơ̆ tom trong jang tŏk atŭm đơ̆ng tơdrong roi tơbăt chăl ‘nao, kŭm hăm atŏk tơiung tơdrong tơroi lơ̆m mang tơpôl, hơdai hăm pơih pơre kiơ̆ radio, đơ̆ng ‘năr 23/3/2024, Tơdrong tơroi pơma nơ̆r M’Nông đơ̆ng Radio nơ̆r pơma VN hlôi đei hơtŏk lơ̆m Facebook hăm Fanpage “Nơ̆r Mnông VOV Tây Nguyên”. Trong jang ‘nao âu tơgŭm ăn lơ bơngai chă mơ̆ng, lăng Tơdrong tơroi pơma nơ̆r M’Nông đơ̆ng Radio nơ̆r pơma VN.

Mĭnh ‘nu boăl đei nick name facebook ‘nŏh “Huế Xưa” tơroi: “Inh băt nơ̆r M’nông kiơ̆ “Fanpage nơ̆r Mnông Tây Nguyên”. Đơ̆ng Fanpage gơ̆h mơ̆ng đei lơ tơdrong tơroi, pơih lăng trang web hăm nơ̆r M’nông, đe bôl boăl mơlôh hrei ‘nâu chă iŏk tơdrong tơroi lơ̆m mang tơpôl tôch lơ kơna trang Fanpage âu tôch lăp hăm bôl boăl mơlôh jĭ bơngai M’nông ‘mĕh chă hơlen năng nơ̆r pơma, tơdrong juăt đơ̆ng hơdrĕch kơdih. Đei Fanpage hăm nơ̆r M’nông thoi âu tôch hơiă. Inh ‘mĕh mơ̆ng tơdrong tơroi hơ ‘mon, mơ̆ng ƀai hơri brông păng dôm tơdrong kơtơ̆ng ang tơ̆ Facebook nơ̆r M’nông, tơroi tôch trŏ păng tôch hơiă”.

Mă loi boăl đei nick name “Songtheothoigian” tơƀôh jơhngâm đon čhôk ‘nă mưh băt truh trang fanpage “Nơ̆r Mnông VOV Tây Nguyên”, kơna hơnơ̆ng chih nơ̆r jet gia đe ‘nhŏng, đe mŏ bơ̆ jang lơ̆m tơdrong tơroi âu. Boăl âu chih:  “Oh ƀôh tơ̆ Fanpage Nơ̆r Mnông đei video clip mĕ oh hơri, iĕm oei đei ƀai hơri đơ̆ng mĕ inh hơri dơ̆ng ưh, mưh oei đei pơih hơtŏk dơ̆ng hơ”...

“Apinh kơkuh kơ đe ‘nhŏng, đe mŏ, inh hơnăn Nam, sơnăm ‘nâu 34 sơnăm, oei tơ̆ xăh Quảng Trực, inh mơ̆ng tơdrong tơroi pơma nơ̆r M’nông kiơ̆ Fanpage “Nơ̆r Mnông VOV Tây Nguyên”, inh ƀôh iĕm chih hơtŏk ƀai, um rup tôch hơiă, inh hơnơ̆ng pơtruh dơ̆ng dôm tơdrong tơroi đơ̆ng iĕm ăn bôl boăl nai vă roi tơƀôh nơ̆r pơma hơdrĕch bơ̆n truh hăm lơ bơngai ƀiơ̆, dang ei mă tơ̆ yơ tơ̆ yơ kŭm đei Facebook ngăl kơna pơtruh tơdrong tơroi thoi âu tôch lăp hăm dôm bơngai ưh đei mơ̆ng radio”.

Fanpage “Nơ̆r Mnông VOV Tây Nguyên” dang ei đei vă jê̆ 1.500 ‘nu bơngai răp mơ̆ng, 1 năr Fanpage hơnơ̆ng hơtŏk tơdrong tơroi hăm nơ̆r M’nông, hăm lơ um rup đei rơih hơmet păng đei hloi nơ̆r pơre tôch hơiă, tôch hiôk ăn bơngai pơih mơ̆ng, đơ̆ng lăng, mă loi hăm bôl boăl oei mơlôh…nhen: tơdrong kơtơ̆ng ang, ƀai chih, tơdrong hơ ‘mon, pơm sen... 1 ‘nu boăl đei nick name “Tung Jôk” tơroi: “Fanpage nơ̆r Mnông VOV Tây Nguyên tôch hơiă, inh tôch ‘mĕh mơ̆ng tơdrong kơtơ̆ng ang, đe ‘nhŏng, đe mŏ chih hơtŏk, đei hloi rup păng ƀơ̆r pơre, lăp kăl pơih ‘nŏh gơ̆h mơ̆ng hloi, tôch lăp hăm chăl mơlôh hrei ‘nâu”.

18 sơnăm hloh bơih, Tơdrong tơroi pơma nơ̆r M’nông đơ̆ng Radio nơ̆r pơma Việt Nam, yoa Anih Radio nơ̆r pơma Việt Nam tơ̆ tơring Tây Nguyên chih tơroi, hơnơ̆ng pơm hơtŏk tơdrong 'lơ̆ng mưh roi tơbăt păng pơre nơ̆r. Hơdai hăm tơdrong tơroi rim năr păng tăh ƀai lơ̆m trang điên tư VOV4.M’nông, 'nŏh Fanpage: “Nơ̆r Mnông VOV Tây Nguyên” jĭ “trong” vang pơtruh tơdrong tơroi pơma nơ̆r Mnông truh hăm jơ̆p jang tơring, pơm lăp hăm tơdrong 'mĕh mơ̆ng đơ̆ng rim bơngai.