‘Nâu jĭ unh hnam tơnuh, hnam oei adrol sơ̆ lăp iĕ ioch păng đĭ so bơih, ưh đei sơđơ̆ng ăn 5 ‘nu bơngai arih xa. Đơ̆ng kơsô̆ jên 60 triu mă công ty tơgŭm ăn, unh hnam ƀok Lê Văn Tam vang tơgop thim vă man đei hnam kơjăp ‘lơ̆ng ƀiơ̆, xă hlŏh 100m2. 

Ƀlep ƀât ‘măng mă âu, anih jang unh điên Dak Lak oei hơpăh 1 pôm tivi vă unh hnam ƀok đei dơ̆ng tơmam chă lăng ngôi lơ̆m hnam ‘nao. Đei băt ‘nâu jĭ 1 lơ̆m 5 unh hnam pơmat tat đei Công ty jang unh điên Dak Lak tơgŭm man ăn hnam oei ‘măng mă âu. Dôm tŏ hnam đei man păng pơjao tơtom tơgŭm ăn dôm unh hnam sơđơ̆ng jơhngâm adrol kơ pơyan ‘mi kial, đei dơ̆ng jơhngâm đon adrin jang tŏk lơ̆m tơdrong arih xa.