Mĭnh lơ̆m dôm tơdrong đei bơngai tăh hla An Giang pơngơ̆t truh ‘nŏh jĭ tơdrong pơtho pơhrăm. Lơ bơngai tăh hla tôch pơngơ̆t truh tơdrong ‘lơ̆ng đơ̆ng pơtho pơhrăm, mă loi hăm tơdrong tơplih ‘nao pơtho pơhrăm khei ‘năr âu ki. Lơ nơ̆r pơma akhan, khei ‘năr âu ki, tơdrong tơplih ‘nao pơtho pơhrăm hlôi hơnhăk đei lơ tơdrong jơnei blŭng a, tơdrong ‘lơ̆ng đơ̆ng pơtho phô thŏng roi tŏk kiơ̆ đơ̆ng hơtŏk tơdrong pơtho, tơjur ƀiơ̆ tơdrong pôk pơ ư kơdih.

Hăm tơdrong pơtho phô thŏng, lơ bơngai tăh hla akhan: tơdrong hơmet ming, tơplih ‘nao pơtho pơhrăm hrei ‘nâu hlôi păng tŏk bŏk tơƀôh lơ tơdrong ưh kơlăp; tơdrong pơtho pơhrăm phô thŏng ‘nao hrei ‘nâu tơ̆ dôm hnam trưng, tơ̆ rim jăl hŏk tam mă hrơ̆ch ‘lơ̆ng; Hla ar hŏk ưh đei chih ‘moi kiơ̆ tơdrong ‘lơ̆ng đơ̆ng hla ar so, ưh lăp pơ huach lơ kon jên ăn mĕ ƀă hŏk tro đĕch, mă oei pơhuach jên, tơmam lơ̆m tơpôl hai. Găh nŏh dơ̆ng, đe ŏh hŏk tro oei ưh đei tôm anih pơm ngôi đei yoa ‘lơ̆ng hai…Kơsô̆ hŏk tro lơ̆m 1 lăm hŏk oei tôch lơ, đơ̆ng nŏh jing đei tơdrong ưh kĕ vei lăng ‘lơ̆ng đơ̆ng thây kô hăm hŏk tro, kơna tơdrong pơtho hŏk pơhrăm tam mă nhen thoi ‘mĕh vă…

Bơngai tăh hla Nguyễn Văn Tùng, thĭ trơ̆n Vĩnh Bình, apŭng Châu Thành akhan: “Hŏk tro hrei ‘nâu, truh 50% hŏk tơdrong chu phep ưh kơ ‘lơ̆ng. Inh athei Kuô̆k hô̆i, Anih vei lăng pơtho pơhrăm đei tơdrong jang, trong pơtho hŏk găh jơhngâm đon chu yom hơdrol, hok găh jơhngâm đon ‘lơ̆ng hơdrol, vă ning mônh kơnh đe kon mon jing bơngai rơgei, đei jơhngâm đon ‘lơ̆ng. Tơdrong tơplih ming hla ar hŏk; dôm bơngai tơchĕng hơlen, bơngai hŏk jrŭ, đe tiến sĩ hlôi tơchĕng hơlen tôch pơnĕh vă chih đei 1 kơsơ̆p hla ar hŏk vă pơtho tơƀôh tơdrong ‘lơ̆ng rơgei ăn jơhnơr mơ lôh, mă lei hŏk 1 sơnăm đĕch ‘nŏh hŭt lê̆, thoi nŏh tôch kơhuach, hiong lơ jên mĕ ƀă, yă ƀok. Yoa thoi nŏh, inh athei Kuô̆k hô̆i, Anih pơtho pơhrăm chih tơlĕch 1 kơsơ̆p hla ar, mă lei kơsơ̆p hla ar ‘nŏh athei gơ̆h iŏk yoa đunh đai”.

Găh tơdrong choh jang xa, bơngai tăh hla akhan, kơjă phŏng, tơmam pơyoa ăn tơdrong choh jang xa tŏk hơnơ̆ng, oei kơjă ƀa păng dôm tơmam đơ̆ng choh jang xa đei ‘nŏh ưh kơ sơđơ̆ng kiơ. Bơngai tăh hla dêh char An Giang apinh Khul Kơdră tĕh đak jăh đei trong jang, tơlĕch đei trong tĕch mơdro tơmam đơ̆ng choh jang xa sơđơ̆ng đunh đai, vă kon pơlei jang chŭn mir gơ̆h jang pơm pơdrŏng đơ̆ng chŭn na kơdih. Găh noh dơ̆ng, tơdrong atŏk tơiung choh jang xa kiơ̆ trong “jang hơdoi”, mă loi jĭ đơ̆ng kon pơlei jang chŭn mir hăm anih tĕch mơdro hrei ‘nâu oei ưh kơjăp kiơ, ưh đei nơ̆r pơkăp ‘lơ̆ng, kơna jing ưh gan đei iŏk yoa ‘lơ̆ng đơ̆ng tơdrong jang hơdoi, kon pơlei tam mă đei xa yoa lơ đơ̆ng dôm trong jang hơdoi hrei ‘nâu.

Bơngai tăh hla Trần Văn Đức, tơ̆ xăh Vĩnh Chánh, apŭng Thoại Sơn, dêh char An Giang đei nơ̆r pơma: “Bu bu kŭm băt Tơring tĕh tơmăn đak krong Cửu Long jĭ tơring rei pơtăm ƀa tơm dơnơm kơ tĕh đak, mă An Giang ‘nŏh jĭ tơring tŏk bŏk kơ Tơring tĕh tơmăn đak krong Cửu Long, mă lei hrei ‘nâu tơdrong jang đei ‘nŏh hiong kơjă oei đei hơnơ̆ng tơ̆ âu; mât lơ̆m pơyan kăt yoă ƀa ‘nŏh ƀa tôch kơ rĕh, đĭ pơyan kăt yoă ‘nŏh kơjă ƀa tŏk dơ̆ng. Tơ̆ xăh kŭm đei nơ̆r krao hơvơn kon pơlei tơplih ming ‘long pơtăm kon yŏng, mă lei mă tơpă pơtăm ‘nhot lơ kŭm ưh băt vă tĕch tơ̆ yơ. Ƀa ‘nŏh ưh đei kơjă; tơmam choh jang xa đei nai tĕch ưh kơhlot oei kơjă phŏng ‘nŏh tŏk hơnơ̆ng. Apinh Khul kơdră tĕh đak păng dôm anih tơm, anih jang kơpal đei trong tơgŭm ăn kon pơlei jang chŭn mir tơ̆ tơring Tĕh tơmăn đak krong Cửu Long, mă loi jĭ tơ̆ An Giang”.

Găh tơdrong ‘nâu, Phŏ Kơdră tĕh đak Võ Thị Ánh Xuân akhan, An Giang hăm tơdrong ‘lơ̆ng đơ̆ng 1 dêh char choh jang xa, kơdră chĕp kơ̆l dêh char An Giang, apŭng Châu Thành athei hơnơ̆ng tơchĕng hơlen, băt hơdăh tơdrong ‘lơ̆ng, tơgĕch iŏk tơdrong pran đei kơtă tơ̆ tơring vă atŏk tơiung choh jang xa, vă gơ̆h jang tŏk hrĕnh, đei yoa păng kơjăp đunh hai, pơm tơ lĕch đei kơjă tơmam lơ ƀiơ̆, vă kon pơlei gơ̆h tŏk pơdrŏng đơ̆ng găr ƀa yoa kơdih jang đei.

Phŏ Kơdră tĕh đak Võ Thị Ánh Xuân pơma: “Ƀơm truh tơdrong choh jang xa. Inh ƀôh truh dang ei, dôm trong jang, tơdrong tơgŭm đơ̆ng Đảng, tĕh đak, jô̆ hloi găh jên, tơmam vă choh jang, jô̆ hloi găh trong jang… đei ngăl bơih; dang ei lăp kăl bơ̆n tơlĕch jang kiơ̆ thoi yơ, bơ̆n athei pơtho tơƀôh ăn kon pơlei bơ̆ jang tơdrong 'nâu thoi yơ vă kon pơlei gơ̆h jang tŏk, iŏk yoa 'lơ̆ng găr ƀa đơ̆ng kơdih jang đei; 'mĕh jang đei thoi nŏh 'nŏh athei tơplih ming đon tơchĕng dơ̆ng. Hơpơi 'mĕh kon pơlei kŭm hăm Khul kơdră pơgơ̆r tơring vang tơchĕng hơlen vă pơm hơtŏk ƀiơ̆ hơnăp jang đơ̆ng kon pơlei choh jang xa. Găh tơdrong pơtho pơhrăm; tơdrong tơplih 'nao âu athei đei 1 trong jang đunh đai, ưh jor lơ̆m khei 'năr tơplih 'nao bơ̆n athei tơƀâp lơ tơdrong 'mơ̆i, mă lei hlôi kơ 'nŏh kơnh sư jing sơđơ̆ng 'lơ̆ng dơ̆ng”.

Kiơ̆ Phŏ Kơdră tĕh đak Võ Thị Ánh Xuân, dôm tơdrong mă bơngai tăh hla pơma tơlĕch kŭm jing dôm tơdrong oei tôch tơtăm đơ̆ng kơdră chĕp kơ̆l Đảng, Khul kơdră tĕh đak, Kuô̆k hô̆i păng tơring tơrang. Khul tang măt Kuô̆k hô̆i dêh char An Giang chih iŏk dôm nơ̆r pơma apinh đơ̆ng bơngai tăh hla păng kiơ̆ tơdrong chĕng hơlen, hơnăp jang kơdih vă hơnơ̆ng pơma tơlĕch dôm nơ̆r apinh âu mă lăp tơ̆ rim hop akŏm.