Khul pơtrŭt hŏk pơhrăm kơ tĕh đak Việt Nam hăm 23 triu ‘nu kăn ƀô̆, bơngai jang oei bơ̆ jang tơ̆ dang 140 rơbâu grŭp păng 125 rơbâu anih pơtrŭt hŏk pơhrăm. Khei ‘năr âu ki, dôm khul grŭp jĭ Khul jang tơm dơnơm lơ̆m tơdrong krao hơvơn đĭ đăng kon pơlei vang akŏm lơ̆m rim tơdrong hŏk pơhrăm, hŏk pơhrăm truh đĭ jơhnơr.

Kăl loi, lơ̆m sơnăm 2022, Anih mong jên Pơtrŭt hŏk pơhrăm Việt Nam hlôi hơmet ming lăm hŏk so, hơpăh jên hŏk ƀŏng ăn hŏk tro tơnuh hin, hŏk tro, sinh viên rơgei păng bơngai ‘lŏ đei đon adrin chă hŏk pơhrăm kơdih, hăm đĭ đăng kơsô̆ jên hlŏh 12 ti.

Pơma lơ̆m jơ bơ̆ jang, Phó Thủ tướng Trần Hồng Hà hơpơi ‘mĕh Khul pơtrŭt hŏk pơhrăm Việt Nam hăm đon jang tơnăp păng plang đĭ jơhngâm hơnơ̆ng đei lơ tơdrong tơgop ăn tơdrong pơtho pơhrăm, atŏk tơiung khul bơngai jang. Bơ̆ jang ‘lơ̆ng hơnăp jang pơjing tơpôl hŏk pơhrăm, atŏk tơiung dôm trong hŏk pơhrăm nhen: unh hnam hŏk pơhrăm, kơtum kơtŏng hŏk pơhrăm, Tơpôl hŏk pơhrăm păng anih jang hŏk pơhrăm.