Hop akŏm đei pơgơ̆r trư̆k tuyê̆n hăm 14 dêh char tơ̆ tơring Tŏk bŏk jăl đak krong păng tơring groi kông găh Tu. Phó Thủ tướng tơchĕng ‘lơ̆ng tơdrong bơ̆ jang dôm tơdrong jang tơm kơ tĕh đak đơ̆ng dôm dêh char găh Tu. Mă tơpă ăn ƀôh tơring yơ Khul kơdră pơgơ̆r bơ̆ jang pran kơtang ‘nŏh tơring ‘nŏh tơlĕch jang hrĕnh ƀiơ̆ păng iŏk đei jơnei ‘lơ̆ng ƀiơ̆, mă loi lơ̆m tơdrong dăr lăng păng bơ̆ jang.

Găh tơdrong tơlĕch jên jang hăm dôm kơsô̆ jên hlôi đei klăih song, Phó Thủ tướng athei dôm dêh char lơ̆m tơring hlôi iŏk đei jên ăn 3 tơdrong jang tơm athei jăh tơlĕch hloi mă đĭ jên jang lơ̆m sơnăm 2022 tơmât lơ̆m tơdrong jang sơnăm 2023, adrin iŏk đei tŏ sĕt hlŏh ‘nŏh 90% jên jang lơ̆m sơnăm 2023. Phó Thủ tướng oei athei dôm tơring lê̆ tơlĕch jên răh rai mă akŏm jên ăn dôm tơdrong jang tơm gĭt kăl; tơmât hơdai jên jang vă bơ̆ jang 3 tơdrong jang tơm kơ tĕh đak, atŭm hăm ‘nŏh hơtŏk tơdrong hŏk pơhrăm, chih iŏk dôm tơdrong kăl tơ̆ dôm tơring vă tơlĕch bơ̆ jang.