Đơ̆ng sơnăm 2021-2025, trung ương pơjao đĭ đăng jên tơmât jang vă atŏk tơ-iung hlŏh 8.790 ti ăn dôm tơring tơ̆ Tây Nam bộ vă bơ̆ jang 3 tơdrong jang tơm kơ tĕh đak (đei pơjing tơring tơrang ‘nao, jang atŏk tơ-iung mŭk drăm, tơpôl tơ̆ tơring kon kông păng groi kông, tơjur tơnuh hin kơjăp ‘lơ̆ng). Lơ̆m sơnăm 2022, jên jang đơ̆ng Trung ương tơgŭm ăn 3 tơdrong jang tơm tơ̆ tơring hlŏh 3.279 ti. 

Pơma pơtôch hop akŏm, Phó thủ tướng Trần Lưu Quang athei, dôm anih tơm, anih jang kơpal kơ trung ương lơ̆m jăl khei mă I/2023 jăh chih pơkĕh dôm hla-ar pơtho bơ̆ jang oei đei dơ̆ng, sek tơlang ‘lơ̆ng dôm hla-ar pơtho jang oei hơdrom băl vă jăh hơmet pơ ‘lơ̆ng dôm tơdrong pơmat tat, tơhlăk tăk ăn dôm tơring.