Phó Thủ tướng hơpơi ‘mĕh Đảng ƀô̆, Khul kơdră pơgơ̆r păng kon pơlei xăh Ea Tul hơnơ̆ng tưk tơiung jơhngâm mât mĭnh ƀơ̆r đon, kơchăng bơ̆ jang lơ̆m tơdrong jang đĭ đăng kon pơlei vang vei sơđơ̆ng tơ̆ tơring, hlôh vao, băt trong tang găn plơ̆ dôm nơ̆r pơma kư̆ kă, tơjră plơ̆ Đảng, Tĕh đak păng pơm tơhiong tơdrong pơvei, tơguăt đĭ đăng hơdrĕch hơdrung pơma atŭm, tơ̆ dêh char Dak Lak pơma adrô̆, vă tơgop pơjing tơpôl sơđơ̆ng ‘lơ̆ng, pơm ‘lơ̆ng ăn tơdrong arih xa hiôk hian ăn kon pơlei. 

Tơ̆ năr âu, bơngai tang măt ăn Anih tơm vei lăng Công an, dôm anih jang kơ pal tơ̆ Dak Lak hơpăh ƀăng khen ăn lơ khul grŭp, rim bơngai iŏk đei jơnei ‘lơ̆ng lơ̆m tơdrong jang đĭ đăng kon pơlei vang vei sơđơ̆ng tĕh đak tơ̆ xăh Ea Tul khei ‘năr âu ki. Phó Thủ tướng tĕh đak oei pơjao lơ tơmam hơpăh ăn dôm unh hnam đei kŏng, unh hnam pơmat tat tơ̆ xăh.