- Ơ ƀok Rơ Châm Thót- Bí thư chi bộ plei Ốp- phường Hoa Lư, pơ lei tơm Pleiku, hrei ‘nâu, Plei Ốp đei dôm tơdrong hiôk thoi yơ vă pơ jing tơ ring tơ rang ‘nao păng hơ tŏk tơ iung tơmang lăng tơ pôl đei tơdrong ‘lơ̆ng hơ iă kơ bơngai Jrai?

Trả lời: Dang ei Plei Ốp đei lơ tơdrong hiôk păng hơ tŏk tơ iung. Mă blŭng, pơlei đei 2 rông; tơdrong jang sa hơ tŏk tơ iung mŭk drăm đei lơ tơdrong hiôk, thim dơ̆ng ‘noh jĭ jê̆ anih kơ drơ̆m pơ lei tơm kơ na tôch kơ jê̆ hnam pơgang, hnam trưng hŏk, trong nơ năm đei ŭnh điên hơdăh kơ na tơdrong arih sa hiôk ƀiơ̆. Plei Ốp dang ei đei hloh 125 ŭnh hnam păng hloh 600 ‘nu bơngai, lơ̆m noh bơngai Jrai ‘noh hloh 80 ŭnh hnam păng bơngai Bahnar 20 ŭnh hnam, oei dơ̆ng ‘noh bơngai Yuăn. Gơnang đơ̆ng tơdrong 1 jơ hngơ̆m đon đơ̆ng đĭ đăng rim bơngai, tơdrong arih sa roi ‘năr roi hơ tŏk tơ iung păng jang đang tơdrong hơ găt pơ jing tơring tơ rang ‘nao. Nhôn đa pơ gơ̆r hop akŏm tơ roi tơbăt vă kon pơ lei băt 1 ƀơ̆r đon, vang tơ gŭm jang đang dôm tơdrong hơ găt pơ jing tơring tơrang ‘nao, mă đơ̆ng oei kơ ƀăh kơ ƀôch găh jên hu vă pơih să trong vă kơ chă nơ năm vih vơ̆t hiôk hian.

-Hăm tơdrong chĕp kơ̆l pơ gơ̆r đơ̆ng chi bộ đảng, khŭl kơ dră chĕp kơ̆l, khei ‘năr âu ki Plei Ốp hlôi iŏk đei dôm jơ nei hơ iă hơ yơ hă ƀok?

Dang ei plei Ốp đei lơ tơplih ‘nao. Jô̆ đơ̆ng sơnăm 2017 - 2020, mŭk drăm pơ tơm blŭng hơ tŏk tơ iung, đei lơ hnam ming man kơ jăp ‘lơ̆ng, mă 2 răt gre choh vă chơ tơmam đơ̆ng choh jang sa păng kơ măy kơ mŏk pơ yua ăn pơm tơ lĕch, mă pêng dơ̆ng ‘noh jĭ 100% ŭnh hnam đei ŭnh điên păng  80% trong nhươ̆, tuh ƀê tŏng, păng hơ mrŭk chĭng chêng oei đei vei răk lơ̆m dôm rông. Mă 4, lơ̆m pơ lei đei rông tih vă kon pơlei pơ gơ̆r hop akŏm, mă 5 oei đei đak tơ nglang vă kơ kon pơ lei năm sŏ đak rim năr păng vei răk dơ̆ng đak rơ goh. Plei Ốp dang ei tơlĕch tơdrong hơ găt vă đei lơ kon oh hŏk truh đăi hŏk, dang ei oei 1,2 tŏ hnam dơnuh hin, kon pơ lei tơdăh jĭ pơ lŏ kăl kơ năm khăm tơ̆ hnam pơgang, ƀao hiêm pơgang kon pơ lei chă răt kơ dih dăh mă teh đak asong ăn, lơ tơdrong hơ găt dang ei plei Ôp iŏk đei 100%.

- Vă Plei Ốp hơtŏk tơ iung jing pơ lei joh ayŏ tơmang lăng tơ pôl ‘lơ̆ng kơ pơ lei tơm Pleiku, ‘noh Kơdră đảng hlôi jang kiơ tơ gŭm kon pơ lei băt kơ dih vei răk tơdrong joh ayŏ ‘lơ̆ng hơ iă kơ bơngai Jrai athei hơdai hăm tơdrong sŭt hŭt răh dôm tơdrong joăt so ưh kơ ‘lơ̆ng, vei lăng cham char?

Trả lời: Chi bộ, thôn trơng, kră pơ lei kơ nhĕk kơ kon pơlei pơ trŭt kon oh pơ nam kơ năm hŏk. Rim khei nhôn kŭm hôp vă athei dôm đảng viên tơgŭm kon pơ lei chô̆ kơ ƀŏng ŭnh đeng 2 păh trong, mă 2 dơ̆ng ‘noh jĭ hơ puih hơmet trong nơnăm rơ goh, mă pêng ‘noh pơ lung đe mon năm hŏk. Nhôn kŭm tơlĕch tơdrong pơ kăp lơ̆m pơ lei, vă kon pơ lei pơ jing trong arih sa rơ goh sơng iŏk tơ moi tơ̆ hơ tăih đei ‘măng dreng lăng pơlei arih sa ‘lơ̆ng hơ iă âu. Oei tơdrong pơ dong ƀŭ bơngai lôch lơ̆m pơ lei oei đei pơ gơ̆r tôch kơ brăh brư mă đơ̆ng ŭnh hnam mơ mat tat mă lei oei pơm kiơ̆ tơdrong joăt so sơ̆. Yua thoi noh thôn trơng, bí thư, mặt trận dôm khŭl grŭp hlôi hôp vă kon pơ lei hlôh păng hŭt lê̆ dôm tơdrong kiơ ưh kơ hơ iă, đei pơ kăp vă kon pơ lei pơm kiơ̆ 2, 3 tơdrong hơ găt, thim dơ̆ng ‘noh kon sâu năm hŏk oei tŏ sĕt, tŏ sĕt bơngai hŏk truh đăi hŏk, kŭm tơ roi tơbăt pơm liơ vă đĭ đăng rim bơngai gơh hŏk păng mơ̆ng nơ̆r pơ tho đơ̆ng kang ƀô̆ pơ lei.

- Tơ̆ hơnăp kơnh, hơnơ̆ng hơdrin pơ jing pơ lei jing hơnih sơng tơmoi mang lăng, đei tơdrong hơ iă kơ bơngai Jrai, kơdră đảng, kơ dră tơring păng kon pơlei Plei Ốp đei trong tơlĕch jang lơ liơ hă ƀok?

Tơdrong ƀơ̆t măt ‘noh chĕp vei tơdrong oei sa ‘lơ̆ng hơ iă, pơ tho ăn hơdruh tơdăm gơh tôn chĭng chêng păng pơ jing dôm khŭl tôn chĭng chêng, khŭl hơ soang lơ̆m pơlei, đang kơ ‘noh jĭ chĕp vei tơdrong jang chrăih mul, meo ‘long, tanh brai vai khăn vă tơ găl hăm hơ năn joh ayŏ. Đang kơ ‘noh dơ̆ng, tơ roi tơbăt kơ kon pơ lei pơm kiơ̆ dôm tơdrong tơ chơ̆t anih jang đảng pơ lei tơm, anih jang đảng dêh char, kŭm nhen chi bộ, dang ei tơ̆ Đảng, teh đak pơ trŭt kon pơlei jang pơ vih pơ văn tơmang lăng, chi bộ nhôn ‘noh jê̆ kon pơ lei hloh kŭm tơ roi tơbăt vă kon pơ lei ƀôh dôm tơdrong đei iŏk yua đơ̆ng tơdrong jang tơmang lăng, mă đơ̆ng oei lơ mơ mat tat mă lei vă jê̆ truh kơnh nhôn kŭm gô hơ drin chă trong hơmet pơ ‘lơ̆ng.

‘Nao âu, plei Ốp iŏk đei jên tơmơ̆t jang đơ̆ng kơ pal vă pơm rông ƀê tŏng mă lei oei yua pơ bŭng gia, mưh tơmoi truh tơmang lăng đe sư ‘meh lăng bơngai Jrai tôn chĭng chêng, hơ soang hơ ri, lơ̆m pơ lei dang ei đei lơ tơdrong pha ra pơ têng hăm pơ lei pơ la nai, yua thoi noh nhôn kăl athei băt vei răk, nhen lơ̆m rông ‘noh athei đei chĭng chêng, đei reo, hơ kăt, đei kong nuh ŭnh, lơ̆m dôm năr pơ gơ̆r lêh nhôn kŭm tôn chĭng chêng ăn tơmoi tơmang lăng vang chơt hơ iă, lơ̆m plei Ốp dang ei đei 2 khŭl tôn chĭng chêng, khŭl tôn chĭng chêng kră, khŭl tôn chĭng chêng drŏ kăn, đei khŭl hơ soang dơ̆ng, dôm khŭl joh ayŏ âu hơnơ̆ng năm pơ yua ăn tơ moi tơmang lăng, ĭnh hơ mĕng gô đei pơ vei hơnơ̆ng.

- Lei ah, bơnê kơ ih ƀok Rơ Châm Thót hơ!