VOV4.Bahnar - ‘Năr 22/4, Phó Thủ tướng Phạm Bình Minh pơ gơ̆r hop akŏm trư̆k tuyê̆n lơ̆m tĕh đak tơ lĕch tơ drong jang tơm kơ tĕh đak găh pơ jing tơ ring tơ rang ‘nao păng tơ drong jang tơm kơ tĕh đak găh tơ jur tơ nuh hin kơ jăp ‘lơ̆ng đơ̆ng 2021-2025.

Tơ̆ Hop akŏm, bơ ngai tang măt ăn dôm Anih tơm, anih jang kơ pal, tơ ring tơ rang, hơ len năng tơ drong jang tơm Pơ jing tơ ring tơ rang ‘nao khei ‘năr âu ki tơ klep hăm hơ met ming anih choh jang xa, pơm hơ tŏk tơ drong đei yoa, tơ gop pơm hơ tŏk tơ ring tơ rang, tưk tơ iung tơ drong arih xa ăn kon pơ lei. Dôm bơ ngai tang măt oei pơ ma nuh păng drơ̆ng nơ̆r ăn dôm trong jang vă tơ lĕch bơ̆ jang dôm tơ drong jang tơm kơ tĕh đak đơ̆ng 2021-2025. 

Pơ ma pơ tôch hop akŏm, Phó Thủ tướng Phạm Bình Minh athei lơ̆m khei 5 truh, dôm anih jang kơ pal đei pơ jao bơ̆ jang jăh tơ lĕch hla ar chih nơ̆r pơ tho, kĭ ăn dôm tơ drong jang mă rơ đăh. Dôm tơ ring kăl kơ chăng chih tơ lĕch hla ar jang kiơ̆ nơ̆r pơ tho đơ̆ng Trung ương păng hơ tŏk tơ drong dăr lăng, vei lăng mưh bơ̆ jang dôm tơ drong jang tơm kơ tĕh đak.

Dơ̆ng: Tơ blơ̆