Tơ̆ tơring jang kơmăy Tân An, plt Buôn Ma Thuột, lơ công ty roi tơbăt chă bơngai jang chơ choh hơbăn ao, jang điên tư, pơm sŏk măt ya ‘mĕh iŏk lơ bơngai jang. Mă đơ̆ng tơlĕch lơ tơdrong tơgŭm tôch hơiă găh jên khei, jên hơpăh, tơgŭm găh năr pơdơ̆h jang mă lei lơ công ty oei ưh chă đei tôm bơngai jang.

Ƀok Trần Chí Vĩ, Kơdră chĕp kơ̆l Anih chơ choh hơbăn ao Lực Thiêm ăn tơbăt, công ty ‘mĕh chă dơ̆ng 300 ‘nu bơngai jang, mă lei ‘nao chă đei dang 50 ‘nu bơngai jang đĕch: “Mưh truh pơyan phĕ cheh phe, phĕ tiu tơdăh công nhân đei teh, pơgar pơtăm, đe sư gơ̆h pơm hla ar apinh pơdơ̆h pơyan ‘nŏh vă brŏk tơ̆ hnam bơ̆ jang. Hơpơi ‘mĕh hlôi kơ pơyan phĕ cheh phe khei 6 chă iŏk bơngai jang ƀônh ƀiơ̆.”

Oei tơ̆ tơring jang kơmăy Cư Kuin, tơdrong ưh kơmăh bơngai jang, mă loi jĭ bơngai jang gơ̆h, măh pơm ăn lơ công ty athei hơmet ming trong jang xa kŭm nhen hla ar răt iŏk tơmam đơ̆ng anih jang hơdoi. Ƀok Vũ Nguyễn Tường Linh, vei lăng tơdrong chă iŏk bơngai jang kơ công ty chĕh phe Ngon ăn tơbăt, công ty hlôi jang hơdoi hăm dôm hnam trưng cao đẳng, đăi hŏk tơ̆ tơring păng ‘mĕh pơtho tơdrong jang ưh đei hiong jên mă lei bơngai apinh hŏk oei ưh đei nhen thoi ‘meh vă:

“Công ty nhôn ‘mĕh iŏk dang 50 ‘nu bơngai jang đơ̆ng bơngai jang hmă truh bơngai đei hŏk tơdrong jang. Tơdrong pơmat tat đơ̆ng nhôn ‘nŏh ưh măh bơngai jang gơ̆h hơgei, mă loi jĭ hăm dôm tơdrong jang nhen điên, cơ khĭ. Kăl loi, công ty nhôn jĭ 1 công ty yoa teh đak đe tơmât jên jang, nhôn kăl đei dơ̆ng bơngai gơ̆h pơma nơ̆r teh đak đe, ‘nŏh jĭ tơdrong ưh gan ‘lơ̆ng đơ̆ng khul bơngai jang tơ̆ Đắk Lắk.”

Tơdrong ưh kơmăh công nhân oei đei tôch dêh tơ̆ dêh char Đắk Lắk. Yă Nguyễn Thùy Tâm, bơngai juăt chă bơngai jang kơ công ty Trung Nguyên Franchising tơ̆ Đắk Lắk tơroi, công ty hlôi hơtŏk tơdrong tơgŭm mă lei chă bơngai jang tôch pơmat: “Mưh bôl boăl bơ̆ jang, bôl boăl đei thi hơtŏk ƀơ̆k jên khei, đei kĭ hla ar bơ̆ jang, đei tôm tơdrong tơgŭm kiơ̆ luơ̆t. Găh noh dơ̆ng, bôl boăl oei đei hơpăh KPI, tơmam năr rơneh, lêh, têt păng mă loi jĭ jên hơpăh mưh bơ̆ jang đunh sơnăm. Găh nhôn oei chih tơƀôh tơdrong chă bơngai jang tơ̆ lơ kơmăy kơmŏk roi tơbăt mă lei dang ei tơdrong ‘mĕh iŏk bơngai jang oei tam mă tôm ‘mơ̆i.”

Kiơ̆ nơ̆r tơroi đơ̆ng Anih chă tơdrong jang kơ dêh char Đắk Lắk, lơ̆m 6 khei blŭng sơnăm Anih sơng đei hlŏh 50 anih tĕch mơdro truh chă bơngai jang tơ̆ hlŏh 20 ‘măng pơgơ̆r chă tơdrong jang, ‘mĕh iŏk truh dôm jĭt rơbâu ‘nu bơngai jang. Mă lei, mă tơpă kơsô̆ bơngai đei iŏk bơ̆ jang ưh đei nhen thoi ‘mĕh vă.

Ƀok Nguyễn Hoàng Giang, Kơdră Anih vei lăng tơdrong jang xa, linh jĭ rơka păng tơpôl dêh char Đắk Lắk tơblang: “Chă iŏk bơngai năm hŏk jĭ tơdrong pơmat mă mônh. Mă 2 ‘nŏh mưh pơtho đang ‘nŏh anih tĕch mơdro athei pơtho ming dơ̆ng, ưh gơ̆h yoa hloi yoa tơmam kơmăy kơmŏk vă pơtho hŏk, tơdrong đei hŏk pơhrăm tơ̆ hnam trưng tam mă lăp hăm anih jang kăl.”

Kŭm kiơ̆ ƀok Nguyễn Hoàng Giang mơ̆n, sơnăm 2024, dêh char Đắk Lắk adrin chă tơdrong jang ăn hlŏh 30.000 ‘nu bơngai. Vă gơ̆h iŏk đei tôm kơsô̆ bơngai jang ‘nâu, dôm anih pơtho tơdrong jang athei hơtŏk tơdrong ‘lơ̆ng mưh pơtho pơhrăm, pơm lăp hăm tơdrong ‘mĕh vă đơ̆ng anih jang, pơtho kiơ̆ hla ar pơkăp, tơdrong ‘mĕh vă đơ̆ng anih jang. Găh bơngai jang athei pơtâp pơhrăm, hŏk iŏk ki thuơ̆t bơ̆ jang păng đei đon adrin, kơchăng chă tơdrong jang./.