Pơjao bơbe yŏng tơgŭm ăn drŏ kăn bơngai kon kông pơmat tat tơ̆ Đắk Lắk
Thứ sáu, 15:07, 04/10/2024
VOV Tây Nguyên/Dơ̆ng tơblơ̆
VOV Tây Nguyên/Dơ̆ng tơblơ̆
VOV4.Bahnar - Lơ̆m 2 năr, ‘năr 3 păng 4/10, Khul drŏ kăn tĕch mơdro dêh char Đắk Lắk pơgơ̆r pơjao dôm jĭt tŏ bơbe yŏng tơgŭm ăn đe drŏ kăn bơngai kon kông pơmat tat tơ̆ dôm tơring hơtăih yăih, đei tơdrong arih xa pơmat tat lơ̆m dêh char.
Lơ̆m ‘măng mă âu, Khul drŏ kăn tĕch mơdro dêh char Đắk Lắk pơjao 27 tŏ bơbe yŏng ăn 7 unh hnam drŏ kăn kon kông tơ̆ dôm apŭng Krông Bông, Krông Buk, Cư Kuin păng plt Buôn Ma Thuột. 1 unh hnam đei tơgŭm đơ̆ng 3 – 5 tŏ bơbe yŏng kiơ̆ trong rong pơlơ̆h yŏng lơ̆m 2 sơnăm.
Lơ̆m khei ‘năr rong, đe bơngai drŏ kăn tĕch mơdro păng Khul drŏ kăn tơ̆ tơring vă hơnơ̆ng yak hơdoi, dăr lăng rim tơdrong tơ̆ unh hnam, vang tơgŭm găh ki thuơ̆t rong, tơmam hiĕm păng trong vei rong bơbe. Kơsô̆ bơbe đei pơjao đơ̆ng Tơdrong jang Rong bơbe – Pơm hơtŏk tơdrong arih, jĭ tơdrong jang đei lơ̆m “120 tơdrong jang vang yak hơdoi hăm đe drŏ kăn, hơioh tơnuh” ƀlep ƀât ‘măng pơjei băl vă tơbăt 120 sơnăm năr pơjing dêh char Đắk Lắk.
Viết bình luận