Đei iŏk sơnong pơjao đơ̆ng Kơdră teh đak, Đăi tă Trương Minh Đương – Kơdră Anih jang Kŏng an dêh char Lâm Đồng atŭm hăm đe Phŏ Kơdră Anih jang Kŏng an dêh char Lâm Đồng hlôi pôk Mê đai Vei vêr Teh đak tăl 3 ăn 3 kŏng an vei hơlen trong nơnăm 'noh: Trung tă Nguyễn Khắc Thường, Thiê̆u tă Lê Quang Thành păng Đăi ŭy Lê Ánh Sáng lôch plang ƀơ̆t oei pơm jang ƀơm teh hơlih klơ̆p tơ̆ trong hơ̆ng Bảo Lộc.

Kiơ̆ kơ noh, kơdră Anih jang Kŏng an dêh char Lâm Đồng hlôi năm truh rim hnam đe kăn ƀô̆ linh hlôi lôch tang vă pôk Mê đai Vei vêr Teh đak tăl 3 ăn unh hnam đe linh lôch tang. Đe linh đei pôk Mê đai kơyuơ hlôi pơm jang đei lơ jơnei kăp gĭt, tơgop lơ̆m tơdrong jang pơjing chuh nghĩa xah hô̆i păng vei lăng Teh đak. 'Nâu jing tơdrong pôk bơnê đơ̆ng Đảng, Teh đak păng Kon pơlei hăm dôm bơngai hlôi lôch plang kơyuơ tơdrong jang tơ-iung pơjing păng vei sơđơ̆ng tơpôl Teh đak. Kiơ̆ Đăi tă Trương Minh Đương: lơ̆m tơdrong pơm jang, iung tơjră, đe kăn ƀô̆ linh Nguyễn Khắc Thường, Lê Quang Thành păng Lê Ánh Sáng hlôi tơbang sơnong jang po, keh đang tơnăp rim sơnong jang đei pơjao.