‘Nau sơnăm mă 2 hơnơ̆ng Trung ương Khul kon pơlei choh jang sa Việt Nam pơgơ̆r rơ̆ih 100 ‘nu kon pơlei choh jang sa Việt Nam gơ̆h hơgei; jei ‘măng mă blŭng Trung ương Khul kon pơlei choh jang sa Việt Nam pơgơ̆r rơ̆ih iŏk 63 hơp tak xah jang gơ̆h hơgei lơ̆m teh đak.

Vang năm păng iung pơma tơ̆ pơm lêh pôk pơ ư, Kơdră jang lơ̆m Hơnih tơm Chinh trĭ, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn athei, Khul kon pơlei choh jang sa rim hơnih hơnơ̆ng atŏk kơtang tơroi tơbăt, pơrô̆ pơrôp, tơƀôh tơbăt kơtang truh hăm kang ƀô̆, rim bơngai lơ̆m khul găh rim trong bơ̆ jang, Tơdrong tơchơ̆t đơ̆ng Đảng, trong bơ̆ jang, khôi luơ̆t kơ Teh đak, mă kăl găh tơdrong choh jang sa, kon pơlei choh jang sa, tơring choh jang sa, đei ƀơm truh tơdrong đei iŏk yua, hơnăp jang kơ kon pơlei. Lang să kơtang dôm bơngai ‘lơ̆ng tơdrong jang hơ iă, vă dôm ŭnh hnam choh jang sa pơm tơlĕch tĕch mơdro hơgei, hơp tak xah choh jang sa đei iŏk yua kơjăp jing dôm bơngai, hơnih jang kăl hloh lơ̆m vang jang atŏk tơ iung mŭk drăm-tơpôl tơ̆ rim tơring choh jang sa kơ lơ̆m teh đak.