Đei tơdrong tơgŭm đơ̆ng Đảng, teh đak đơ̆ng dôm tơdrong pơkăp vă jang, dang ei um rŭp pơlei kăng kư̆ kăch mang H’Ngô A, xăh Hòa Phong, apŭng Krông Bông, dêh char Dak Lak ƀenh kơ tơdrong hơrih ‘nao hăm trong nơnăm ‘lơ̆ng kơjăp, unh hơyuh đei dui truh rim unh hnam, hnam trưng hŏk đei ming man ‘lơ̆ng rơgoh... Yă H’Ngan Ƀuôn Yă (70 xơnăm, bơngai ÊĐê) tơ̆ pơlei H’Ngô A ăn tơbăt, dang ei ‘nguaih kơ iŏk yua đơ̆ng choh pơtăm, rong kon tơrong, kon pơlei tơ̆ âu vang jang vei lăng bri adoi đei xa yua mơ̆n. Yă pơtêng găh tơdrong tơplih tơ̆ pơlei pơla kăch mang Krông Bông: “Tơdrong erih dang ei hlôi tơplih jing pha. Xơ̆ noh tơnap tap, nhôn hơrih lơ̆m bri xa ƀum nhăk, xa tơƀăng kram đĕch. Tơnap tap dêh. Oei dang ei nhôn phĭ tơtŏ, đei por xŏng, hơbăn ao hrŭk hrơ̆p. Teh đak hơnơ̆ng tơgŭm kon pơlei đơ̆ng phe xŏng, ƀoh đak măm âu to hia, đei axong ăn rim xơnăm. Teh đak hơnơ̆ng yak hadoi hăm kon pơlei vă găn hloh rim tơdrong tơnap tap”

Yak kiơ̆ trong man ‘nao đei ming man đơ̆ng Tơdrong jang tơm teh đak Tơring tơrang ‘nao au ki, ƀok Hlưk, rơneh sơnăm 1957, pơlei Dơk Dơng, tơring Glar, apŭng Đak Đoa, dêh char Gia Lai tơbăt, hơdrol sơnăm 1975, tơdrong erih sa kơ kon pơlei tơring G’Lar tôch mơmat tat, kơ yuơ tơdrong pơvang tang găn đơ̆ng ayăt. Đơ̆ng rŏng teh đak rơngei hiôk hian, kon pơlei Bahnar đei hiôk hian, chă jang sa sơđơ̆ng ‘lơ̆ng hơ iă. Atŭm hăm tơdrong tơgŭm djru, pơtho tơbăt đơ̆ng kơdră tơring, rim hơnih jang, kon pơlei hlôi băt chă pơtăm chehphe, rei pơtăm ƀa. Đơ̆ng mă pơngot rơvĕt tơngiĕt găng, dơnuh hin, sŏng ưh kơ măh tăh hrŭk ưh tơnŏ, hrei au lơ ŭnh hnam hlôi pơm đei hnam man ‘lơ̆ng liĕm. Ƀok Hlưk pơma:“Lơ̆m tơblăh vang sơ̆ tơdrong erih sa kơ kon pơlei bơ̆n tơnap tap tơpă mơ̆n. Truh hloi chă jang mir ƀa, ‘mĕh vă năm đơ̆ng hrôih, brŏk klui jei ưh kơ gơh, kơ yuơ đe găn ga,pơma jau au to. Găh dang ei teh đak rơngei hiôk hian jĭ tôch ‘lơ̆ng hơ iă, mơ̆ng kơ bơ̆n vă chă jang brŏk dang yơ jei bư̆h. Găh trong nơnăm sơ̆ lăp trong teh, ưh kơ đei trong glung nhen hrei au, dang ei trong ming man ‘lơ̆ng liĕm, trong lơ̆m pơlei, koeng ƀôt hlôi đei ming man ‘lơ̆ng, chă yak jĭ tôch rơvơn. Bơnê kơ Đảng, Teh đak lăng tông nông gia kơ jăp.”

Đơ̆ng hloh 35 xơnăm tơ-iung pơjing păng hơtŏk, 10 xơnăm pơm kiơ̆ Tơdrong tơchơ̆t jang kơ teh đak găh Pơjing tơring pơxĕl ‘nao, apŭng Lâm Hà – tơring jang mŭk drăm ‘nao kơ bơngai Hà Nội tơ̆ hơgăt teh Lâm Đồng dang ei hlôi đei đak hơtŏk tôm tơdrong. Jing apŭng mă 5 kơ dêh char tỉnh Lâm Đồng đei Thủ tướng Teh đak tơchơ̆t jing apŭng đei jơnei tơchơ̆t tơring pơxĕl ‘nao jăl xơnăm 2016 – 2020; păng chơt hơ-iă đei Ƀok Kơdră teh đak pôk Mê đai pơm jang tăl 3.

Hăm tơdrong tơplih kơ tơring po, kră pơlei Krăjan K’ Nhang, tơ̆ pơlei Đam Pao, xăh Đạ Đờn, apŭng  Lâm Hà ăn tơbăt: “Gơnơm đei tơdrong hơlêm, tơbăt đơ̆ng kră pơlei, kơdră pơlei, adoi nhen kang ƀô̆ jang teh đak, kon pơlei nhôn hơnơ̆ng chĕp vei joh ayŏ juăt jue kon kông po, atŭm băl adrin pơm jang vă hơtŏk mŭk drăm đei por xŏng phĭ tơtŏ dơnŏ ‘lơ̆ng. Truh âu kơnh, kon pơlei nhôn pơtoi chĕp vei tơguăt tơguăl, pơtho akhan dih băl pơ jang, rong pơtho kon xâu hŏk pơhrăm tơnăp păng atŭm băl pơjing pơlei pơla hơtŏk tơ-iung hloh dơ̆ng”.