Dôm sơnăm tơjê̆ au, tơmoi tơjê̆ hơtăih năm tơ̆ pơlei tơm Pleiku vă chă tơmang lăng tơdrong oei sa joh ayŏ, por ‘nhot kơ kon pơlei kơtă roi năr roi lơ. Sơnăm 2019, đảng viên Rơ Mah Hiu oei tơ̆ pơlei Tiêng 1, tơring Tân Sơn, pơlei tơm Pleiku hlôi pơih mĭnh hơnih et sa ‘nhĕm ‘nhot Jrai kơtă lơ̆m pơgar hnam kơ ŭnh hnam. Hơnih et sa au đei hnam pơtăm kơ bơngai Jrai, đei pơprŏ bơ̆n chĭng chêng, hơgơ̆r, reo, dăh mă mul meo ... jĭ dôm tơmam yoa joăt joe lơ̆m tơdrong hơrih sa, oei sa păng joh ayŏ kơ bơngai Jrai. Dôm ‘nhot sa ‘lơ̆ng liĕm đơ̆ng ‘nhot hla ‘long bri, pơkao tơneh, hla ƀlang ... atŭm hăm ka kro, iĕr, ‘nhĕm đak, đei kon pơlei Jrai chă pai tôch kơ ‘lơ̆ng, pơm ăn tơmoi năm truh hăm hơnih et sa roi năr roi lơ. Lơ̆m khei ‘năr pơjing hnam et sa, ‘moi kiơ̆ chi ƀô̆ pơlei Tiêng 1, đảng viên Rơ Mah Hiu đei băt rim trong bơ̆ jang găh atŏk tơ iung tơmang pơhiơ̆ păng vei răk tơƀăk mong tơdrong oei sa joăt joe sơ̆ ki. ‘Nhŏng jei oei vang iung jang vang năm hŏk pơhrăm tôm tong găh lăm pơtho tơbăt sơđơ̆ng rơgoh ‘nhĕm ‘nhot păng trong pơgơ̆r jang tơmang pơhiơ̆ pơlei pơla. Yak ƀlep trong, hnam et sa roi năr roi atŏk tơ iung, ‘nhŏng Hiu jang sa iŏk yau kơjăp păng tơgŭm ăn lơ kon pơlei lơ̆m pơlei jang sa iŏk yua kơjăp bơ̆n:“Ŭnh hnam đei trong tơchăr pơjing hnam et sa vă jang sa đei iŏk yua ăn ŭnh hnam păng pơjing rơvơn ăn kon pơlei jei jang sa iŏk yua kơjăp. Tơdrong ‘meh vă kơ tơmoi ‘noh ‘meh chă lăng hơsoang păng tôn chĭng chêng kơ bơngai Jrai. Ba chă pơrô̆ hơvơn khul tôn chĭng chêng lơ̆m pơlei truh chă tôn. Ba hơla kon jên ăn kơ khul, vă đe sư hơnơ̆ng chĕp răk, mă blŭng ‘noh pơjing ăn đei kon jên răt sa, mă ƀar ‘noh vei răk tơƀăk mong tơdrong joăt joe sơ̆ ki.”

Tân Sơn ‘noh tơring jih tơter kơ pơlei tơm Pleiku. Tơ̆ au đei 5 pơlei. Lơ̆m au đei 2 pơlei Tiêng 1 păng Tiêng 2 găh lơ ‘noh ŭnh hnam bơngai Jrai. Đơ̆ng sơnăm 2016 truh dang ei, gơnơm tơlĕch jang kiơ̆ Tơdrong tơchơ̆t 06, rim pơlei kon kông tơ̆ tơring đei lăng ba kơjăp pơm ‘nao, ming hơmet trong nơnăm păng hnam hop akŏm pơlei. Kon pơlei đei hŏk pơhrăm găh bơ̆ jang tơmang pơhiơ̆ pơlei pơla, vei răk tơƀăk mong tơdrong tôn chĭng chêng, dui brai vai tanh khăn … Lơ̆m choh jang sa, kon pơlei đei tơgŭm ăn chă pơtăm ming chehphe, pơm trong nơnăm chŭn mir păng tơ iung pơjing tơmam drăm ‘long pơtăm kiơ̆ tơdrong pơkăp ‘lơ̆ng gơ̆h tĕch mơdro tơ̆ teh đak đe. Mă kăl, 63 ŭnh hnam dơnuh, vă jê̆ dơnuh đei sơng iŏk tơdrong tơgŭm djru hăm akŏp kon jên vă jê̆ 1 ti 300 triu hlak jên vă ming hơmet hnam hiăh hiok, tơgŭm ăn dơđăh hơdrĕch ‘long pơtăm, kon tơrong đơ̆ng kon jên kơ rim tơdrong jang. Hrei au, lơ̆m 350 ŭnh hnam bơngai Jrai lơ̆m tơring Tân Sơn, lăp pă 3 ŭnh hnam dơnuh, jang sa iŏk đei jô̆ hơtŏ măt bơngai lơ̆m hơtuch sơnăm 2023 ‘nŏh 43 triu hlak jên. Atŭm hăm ‘noh, rim pơlei jei đei khul tôn ching chêng, khul dui brai vai tanh khăn, mĭnh păh tơgŭm ăn kon pơlei chă tơƀơ̆p dih băl, pơtho pơhrăm dih băl dôm tơdrong oei sa, jang sa joăt joe sơ̆ ki kơ hơdrung bơngai Jrai. Ƀok Rơ Châm Joi, đảng viên  pơlei Tiêng 2, tơring Tân Sơn, pơlei tơm Pleiku tơbăt:“Hrei au, ŭnh hnam ayơ jei đei pơgar chehphe, đei teh jang chŭn na ƀa đak. Kon pơlei tôch kơ chhôk hơ iă ‘nă hal. Dang ei teh đak tơmơ̆t jên jang pơm trong nơnăm; pơrô̆ pơrôp pơtho tơbăt găh ƀao hiêm jang pơgang jei iŏk đei jơnei 95%”.

Ƀok Phạm Văn Hiếu- Bĭ thư Đảng tơring Tân Sơn, pơlei tơm Pleiku tơbăt, trong tơlĕch jang tơm kơ Tơdrong tơchơ̆t 06 Khul kơdră chĕp pơgơ̆r Đảng pơlei tơm Pleiku ‘noh akŏm chă hơvơn, atŏk kơtang jang kiơ̆ jơnei rim tơdrong tơmơ̆t jang atŏk tơ iung mŭk drăm-tơpôl tơring kon kông. Kơ yuơ lơ loh, dôm sơnăm au ki, Khul kơdră chĕp pơgơ̆r Đảng tơring păng rim chi ƀô̆ pơlei pơla hlôi chĕp pơgơ̆r, pơrô̆ pơđĭ khul chinh trĭ tơlĕch jang kiơ̆ rim tơdrong jang mŭk drăm păng rim trong jang trŏ lăp hăm rim pơlei kon kông. Lơ̆m au, Đảng ƀô̆ păng khul kơdră chĕp pơgơ̆r iung jang hơdoi hăm kon pơlei lơ̆m tơplih hơdrĕch ‘long pơtăm, kon tơrong; jang kiơ̆ khoa hŏk kih thuơ̆t lơ̆m choh jang sa, đơ̆ng noh pơm hơtŏk jang sa iŏk yua kơjăp, tơjur dơnuh kơjăp ‘lơ̆ng:“Đơ̆ng mă đei trong bơ̆ jang păng tơdrong tơchơ̆t đơ̆ng Hơnih Đảng dêh char, Hơnih Đảng pơlei tơm ‘noh tơdrong hơrih sa kơ kon pơlei đei tơplih hơdăh, ŭnh hnan dơnuh tơjur hơnơ̆ng kiơ̆ sơnăm. Lơ ŭnh hnam dơnuh đei Teh đak, Măt trân, dôm bơngai đei jơhngơ̆m đon ‘lơ̆ng lăng ba kơjăp, kơna tơdrong hơrih sa roi năr roi sơđơ̆ng dơ̆ng kơjăp.”

Dôm tơdrong iŏk đei jơnei tơ̆ tơring Tân Sơn, pơlei tơm Pleiku, dêh char Gia Lai tơƀôh hơdăh, tơdrong hơnhăk rim Tơdrong tơchơ̆t đơ̆ng Đảng jang kiơ̆ lơ̆m hơrih sa, hlôi pơjing đei iŏk jơnei hơ iă, pơm tơplih tôm tong tơdrong hơrih sa tơpôl, pơm hơtŏk tơdrong hơrih sơđơ̆ng dơ̆ng kơjăp, hơnuk hơnoa kơ kon pơlei.