VOV4.Bahnar - Mĭnh tơ drong đei lơ bơ ngai tăh hla tôch tơ rĕk lơ̆m giĕng âu ki ‘nŏh jĭ ‘măng mă blŭng Anih chĕp kơ̆l pơ gơ̆r Kuô̆k hô̆i tơ gop nơ̆r ăn Luơ̆t tĕh (oei chih hơ met). 'Nâu jĭ 1 kơ luơ̆t tih, tôch gĭt kăl, đei ƀơm truh lơ tơ drong lơ̆m tơ drong arih xa, jang mŭk drăm, tơ pôl kơ tĕh đak. Tơ̆ hop akŏm, Anih chĕp kơ̆l pơ gơ̆r Kuô̆k hô̆i athei pơm hơ dăh tơ drong iŏk pơ dreu tĕh vă atŏk tơ iung mŭk drăm, tơ pôl yoa tơ drong đei yoa ăn tĕh đak, tơ pôl. Atŭm hăm 'nŏh athei tơ rĕk truh trong jang găh jên hu ƀơm truh tơ̆ tĕh; mă loi tang găn tơ drong pơm glăi, tơ mât tơ drong đei yoa ưh lăp lơ̆m tơ drong chih pơ jing luơ̆t.

Tơ drong chih hơ met ming Luơ̆t tĕh vă hơ met pơ ‘lơ̆ng tơ drong pơ gơ̆r, trong jang găh tĕh; sek tơ lang tơ drong hơ drom băl, tơ jră băl lơ̆m dôm trong jang, khôi luơ̆t đei ƀơm truh tơ̆ tĕh. Pơm ‘lơ̆ng ăn tơ drong đei yoa kơ tĕh đak, tơ 'ngla tĕh păng bơ ngai tơ mât jên jang. Chih tơ ƀôh rơ đăh rơ đong tơ drong tĕch mơ dro tĕh, hnam oei. Atŭm hăm 'nŏh hơ tŏk tơ drong pơm tơm đơ̆ng kon pơ lei, găn tôch ai tơ drong tơ kêng ƀơm truh tơ̆ tĕh.

Kơ dră chĕp kơ̆l Anih jang Tư phap Lê Thị Nga iung pơ ma

Tơ̆ hop akŏm, Kơ dră vei lăng Anih jang Tư phap Lê Thị Nga athei chih hơ dăh dôm tơ drong hơ găt găh tơ drong tĕh đak iŏk pơ dreu tĕh vă atŏk tơ iung mŭk drăm, tơ pôl yoa tơ drong đei yoa ăn tĕh đak, tơ pôl vă huei pơ gâm, iŏk pơ dreu tĕh kư̆ kă, ưh trŏ tơ drong, vei lăng ‘lơ̆ng tơ drong đei yoa ăn bơ ngai đei tĕh vă iŏk pơ dreu. Mă loi iok pơ dreu tĕh vă pơ jing tơ ring kơ drâm, man hnam tĕch mơ dro: “Tơ drong ‘nâu athei jang kiơ̆ trong pơ gơ̆r pơ ma nuh, drơ̆ng nơ̆r hăm băl đơ̆ng kon pơ lei hăm anih tĕch mơ dro trŏ hăm nơ̆r athei lơ̆m tơ drong Tơ chơ̆t 18. Tơ drong tơ chơ̆t 18 chih hơ dăh hơ nơ̆ng pơm kiơ̆ trong pơ ma nuh drơ̆ng nơ̆r hăm băl đơ̆ng kon pơ lei hăm naih tĕch mơ dro mưh tĕch tĕh vă pơ jing tơ ring kơ drâm, man hnam oei vă tĕch. Tơ drong 'nâu ưh đei tơ mât lơ̆m tơ drong iŏk pơ dreu tĕh mă tơ lĕch trong pơ ma nuh pơ drơ̆ng nơ̆r hăm băl đơ̆ng kon pơ lei hăm anih tĕch mơ dro”.

Tơ blang tơ̆ jơ hop akŏm, Kơ dră tơm vei lăng tơ mam drăm păng cham char Trần Hồng Hà ăn tơ băt, oei chih tơ lĕch tơ drong hơ găt hăm tơ drong tĕh đak iŏk pơ dreu tĕh vă atŏk tơ iung mŭk drăm, tơ pôl yoa tơ drong đei yoa ăn tĕh đak, tơ pôl, tơ dăh ưh đei trong tĭnh trŏ ‘nŏh gô đei trong jô̆ hơ len: “Nhôn băt trong jô̆ hơ len ‘nŏh tam mă tơ găl. Mă 2 ‘nŏh athei chih hơ dăh thoi yơ vă gơ̆h băt tơ drong đei yoa kơ tĕh đak, đei yoa ăn tơ pôl 'nŏh athei tơ chĕng hơ len dơ̆ng vă chih tơ drong 'nâu mă hơ dăh ƀiơ̆. Tơ drong 'nâu nhôn oei chih akŏm nơ̆r, hơ nơ̆ng 'măn jơ năr tơ chĕng hơ len. Hăm dôm tơ drong vă bơ̆n tơ lĕch đei nơ̆r hơ găt, pơm hơ dăh tơ drong đei yoa ăn tĕh đak, đei yoa ăn tơ pôl. Pơ tih gia nhen hrei ‘nâu vă pơ jing đei tĕh pơ yoa ăn tơ drong jang pơm trong vă iŏk pơ dreu, vă mong akŏm đei jên 'nŏh gơ̆h pơ gơ̆r tĕch, chă rơih bơ ngai răt tĕh vă iŏk jên, iŏk tĕh pơ yoa ăn tơ drong pơm trong”.

Kơ dră Kuô̆k hô̆i Vương Đình Huệ athei mưh chih pơ jing luơ̆t athei chih hơ dăh tơ drong ƀơm tơ̆ băl đơ̆ng tĕh tĕh đak păng tĕh kơ dih

Pơ ma tơ̆ hop akŏm, Kơ dră Kuô̆k hô̆i Vương Đình Huệ pơ ma hơ dăh Luơ̆t tĕh (oei chih hơ met) 'nŏh jĭ luơ̆t tôch gĭt kăl, ƀơm truh tơ drong jang atŏk tơ iung mŭk drăm, tơ pôl. Tơ chĕng 'lơ̆ng găh tơ drong hơ met ăn Luơ̆t, Kơ dră Kuô̆k hô̆i tơ tă anih chih hơ nơ̆ng chă hơ len năng, pơm 'lơ̆ng ăn tơ drong đei yoa kơ đĭ đăng dôm pang. Mă loi 'nŏh athei tang găn đei tơ drong pơm glăi, chih tơ mât tơ drong đei yoa ưh lăp, trong pơ gâm mưh chih pơ jing luơ̆t: “Hơ met ming, chih tơ mât dơ̆ng dôm tơ drong hơ găt vă hơ met pơ ‘lơ̆ng dôm tơ drong tơ hlăk, ưh kơ lăp tơ̆ yăn âu, mă lei athei pơm ‘lơ̆ng ăn rim tơ drong đunh đai truh ning mônh. Ưh gơ̆h chih pơ trŏ ăn dôm tơ drong glăi hrei ‘nâu vă tơ mât lơ̆m luơ̆t. Tang găn tơ drong glăi, chih tơ mât tơ drong đei yoa ưh kơ lăp vă pơ gâm mưh chih pơ jing luơ̆t păng dôm tơ drong ưh kơ lăp hăm yăn âu mă lei lăp đei kiơ̆ khei ‘năr tơ drong jang, iơ iĕ, hơ drô̆, kơ dih tơ̆ mĭnh ƀar tơ ring yơ ‘nŏh. Athei chih kiơ̆ tơ drong đei yoa ăn tĕh đak, ăn hơ drĕch hơ drung, ăn tơ pôl, đei yoa ăn anih tĕch mơ dro, đei yoa ăn kon pơ lei păng tơ drong đei yoa ăn rim tơ ‘ngla tĕh”.

‘Nâu jĭ luơ̆t oei chă iŏk nơ̆r tơ gop mă blŭng, tơ chĕng adrol vă tơ roi ăn Kuô̆k hô̆i hơ len năng, tơ gop nơ̆r ‘măng mă blŭng tơ̆ Hop akŏm mă 4 truh păng gô đei set hơ len, pơ drơ̆ng nơ̆r đơ̆ng rŏng 3 ‘măng hop akŏm. Luơ̆t tĕh (oei chih hơ met) âu gô tơ ƀôh hơ dăh tơ drong Tơ chơ̆t 18 đơ̆ng Khul kơ dră chĕp kơ̆l Trung ương găh hơ nơ̆ng tơ plih ‘nao, hơ met pơ ‘lơ̆ng tơ drong pơ gơ̆r, trong jang, hơ tŏk tơ drong đei yoa, sĭt kơ tang mưh vei lăng, iŏk yoa tĕh, pơ jing jơ hngâm pran hơ nhăk tĕh đak bơ̆n jing tĕh đak pơ drŏng, đei yoa lơ.

Dơ̆ng: Tơ blơ̆