Sơnăm 2023 hăm hơnăp jang kơtang, kơrŭn đĭ jơhngơ̆m, Kuô̆k hô̆i hlôi jang keh đang lơ tơdrong jang tơm, ‘nau jĭ ‘măng mă blŭng lơ̆m chăl sơnăm 78 sơnăm bơ̆ jang Kuô̆k hô̆i Việt Nam hlôi pơgơ̆r ‘măng hop akŏm lơ hloh lơ̆m mĭnh sơnăm hăm 5 ‘măng hop akŏm.

Bơ̆jang dăr lăng đei atŏk kơtang păng tơplih ‘nao, roi năr roi ‘lơ̆ng hơ iă trŏ lăp hăm yan au. Kuô̆k hô̆i hlôi tơtom pơjing đei lơ trong jang gĭt kăl kơ teh đak. Tơ̆ hop akŏm tang măt rim khul Kơdră tang măt Kuô̆k hô̆i hôn bơnê kơtang tơdrong Kuô̆k hô̆i ‘măng mă blŭng pơgơ̆r hop akŏm pơtôch đơ̆ng rŏng 1 sơnăm bơ̆ jang. Bơngai tang măt Lý Thị Lan, kơ iĕng Khul kơdră tang măt dêh char Hà Giang akhan:“Atŭm hăm tơdrong tơplih ‘nao pơm hơtŏk bơ̆ jang ‘lơ̆ng kơ hơnih bơ̆ jang tang măt kon pơlei, Khul Kơdră tang măt Kuô̆k hô̆i tơ̆ rim tơring tôch chơt hơ iă kơ yuơ ‘nau jĭ ‘măng mă blŭng lơ̆m jăl jang Kuô̆k hô̆i jăl XV, pơgơ̆r hop akŏm pơtôch lăng hơlen tơdrong bơ̆ jang sơnăm kơ Khul kơdră tang măt Kuô̆k hô̆i. Kiơ̆ kơ ĭnh, ‘nau jĭ jơ rơvơn păng hơnơ̆ng trong ‘nao vă tơƀôh hơdăh tơdrong lăng ba kơjăp đơ̆ng Kuô̆k hô̆i, Hơnih chĕp pơgơ̆r Kuô̆k hô̆i hăm tơdrong bơ̆ jang kơ Khul kơdră tang măt Kuô̆k hô̆i tơ̆ tơring vă đei rơvơn vang tơgop, jang keh đang dôm tơdrong pơkoĕl, tơdrong jang ‘lơ̆ng bơ̆ jang kơ Khul kơdră tang măt Kuô̆k hô̆i, bơngai tang măt Kuô̆k hô̆i tơ̆ rim tơring”.

Ăn tơgop nơ̆r lơ̆m trong tơlĕch jang sơnăm 2024, Tổng thư ký, Kơdră chĕp pơgơ̆r Hơnih bơ̆ jang Kuô̆k hô̆i Bùi Văn Cường athei khul kơdră tang măt Kuô̆k hô̆i rim dêh char, pơlei tơm:“Hơnơ̆ng iung jang hơdoi vă pơchoh trong tơgŭm ăn Hơnih chĕp pơgơ̆r Kuô̆k hô̆i pơrô̆, pơjao tơdrong jang kơ Jơnŭm vei lăng Kon kông, rim Hơnih bơ̆ jang kơ Kuô̆k hô̆i lơ̆m bơ̆ jang dăr lăng, pơm sơđơ̆ng veh ver hơgrop rim Khul dăr lăng tơ̆ rim hơnih jang. Hăm tơring đei Khul bơ̆ jang lơ hloh tơdrong pơkăp, athei Khul tang măt Kuô̆k hô̆i tơroi tơbăt  Tổng Thư ký Kuô̆k hô̆i găh Khul bơ̆ jang, tơdrong bơ̆ jang, khei năr bơ̆ jang hơdăh tơ̆ tơring vă tơroi tơbăt ăn Hơnih chĕp pơgơ̆r Kuô̆k hô̆i tơtom hơmet ming trŏ lăp hloh”.

Iung pơma pơtôch tơ̆ Hop akŏm, Kơdră chĕp pơgơ̆r Kuô̆k hô̆i Vương Đình Huệ hơlen sơnăm 2023 ‘noh jĭ sơnăm Kuô̆k hô̆i bơ̆ jang lơ tơdrong jang. Rim khul kơdră tang măt Kuô̆k hô̆i păng rim kơdră tang măt Kuô̆k hô̆i hlôi kơrŭn đĭ ai hơnăp jang pơjing khôi luơ̆t, dăr lăng jơnei păng tơlĕch tơdrong tơchơ̆t tơtom, atŏk kơtang bơ̆ jang ‘lơ̆ng lơ̆m bơ̆ jang pơjing khôi luơ̆t, Tơdrong tơchơ̆t rim tơdrong kăl kơ teh đak păng dăr lăng, tơƀơ̆p pơma dơnuh hăm bơngai tăh hla, tơdrong sơng pơma dơnuh hăm kon pơlei, dăr lăng, pơrô̆ pơrôp tơdrong xek tơlang hla bơar tơkêng đơ̆ng kon pơlei.

Lơ̆m khei năr kơnh, Kơdră chĕp pơgơ̆r Kuô̆k hô̆i Vương Đình Huệ athei, rim khul kơdră tang măt Kuô̆k hô̆i păng rim kơdră tang măt Kuô̆k hô̆i iung jang kiơ̆ kơjăp dôm tơdrong jang hlôi iŏk đei jơnei, hơnơ̆ng pơih să, atŏk lơ tơdrong bơ̆ jang, atŏk kơtang hloh dơ̆ng bơ̆ jang ‘lơ̆ng kơ khul kơdră tang măt Kuô̆k hô̆i. Mă kăl, hơnơ̆ng tơlĕch jang kiơ̆ hơnih jang, hơnăp jang kơ Khul kơdră tang măt Kuô̆k hô̆i păng bơ̆ jang kơ Kuô̆k hô̆i Việt Nam pơma atŭm. Lơ̆m au, tơdrong jang kăl hloh kơ khul kơdră tang măt Kuô̆k hô̆i ‘noh pơgơ̆r vă kơdră tang măt Kuô̆k hô̆i sơng pơma dơnuh hăm kon pơlei:“Tơdrong gơ̆h jang, tơdrong jang ‘noh pơgơ̆r tơƀơ̆p pơma dơnuh hăm kon pơlei, iung jang hơdoi, sơđơ̆ng tôm tơdrong vă kơdră tang măt Kuô̆k hô̆i tơƀơ̆p pơma dơnuh hăm bơngai tăh hla. ‘Nau jĭ tơdrong bơ̆ jang mă blŭng păng gĭt kăl hloh, kơna lơ̆m mă tim mă hơmet đang Tơdrong tơchơ̆t găh tơƀơ̆p pơma dơnuh hăm bơngai tăh hla lei lơ̆m tơdrong tơchơ̆t hrei au, athei rim kơdră bơ̆n hơnơ̆ng iung jang hơdoi kơjăp hăm Mặt trận Tổ quốc, kơ yuơ kơdră kơpal chĕp pơgơ̆r vă hơnơ̆ng tơplih ‘nao kơtang hloh dơ̆ng iung jang sơng pơma dơnuh hăm kon pơlei, tơƀơ̆p pơma dơnuh hăm bơngai tăh hla. Lơ̆m khôi luơ̆t hrei ou tơchơ̆t Kơdră tang măt Kuô̆k hô̆i tơƀơ̆p pơma dơnuh hăm bơngai tah hla trong bơ̆ jang kơ Khul kơdră tang măt Kuô̆k hô̆i kiơ̆ kơdih, kiơ̆ hơnăp jang kơ bơngai tang măt Kuô̆k hô̆i lei tim mă đei tơchơ̆t pơtho tơbăt hơdăh tơdrong ou. Rŏ năng truh au kơnh chă tơchĕng hơlen pơm pơkeh tơdrong tơchơ̆t găh sơng pơma dơnuh hăm bơngai tăh hla lei gô pơm keh kong tôm tong găh tơdrong au”.

Kơdră chĕp pơgơ̆r Kuô̆k hô̆i Vương Đình Huệ pơkă, khul Kơdră tang măt Kuô̆k hô̆i vang iung jang hơdoi hăm Jơnum vei lăng Kon kông păng rim Hơnih bơ̆ jang kơ Kuô̆k hô̆i dăr lăng tơ̆ tơring; lăng hơlen, pơrô̆ pơrôp tơdrong xek tơlang tơdrong tơkêng, nơ̆r apĭnh athei đơ̆ng bơngai tăh hla, kon pơlei, athei rim hơnih bơ̆ jang tơroi tơbăt kơtơ̆ng ang găh tơdrong jang au; adoi kăl tơroi tơbăt tơdrong bơ̆ jang kơ khul Kơdră tang măt Kuô̆k hô̆i.