Tơdrong đei ƀôh dang ei, ah tơdrong jang pơjing tơring tơrang ‘nao keh đang noh trong nơnăm tơ̆ dôm tơring groi kông kơ dêh char Khánh Hòa adoi đei pơm hăm ƀê tŏng, rơhơi să ‘lơ̆ng. Trong nơnăm ‘lơ̆ng, mă lei đon vao lơ̆m vih vơ̆t kiơ̆ trong nơnăm đơ̆ng kon pơlei tơ̆ tơring âu ưh đei tơnăp, mă lơ noh oei pơhơi ƀơ̆t vơ̆r gre vih vơ̆t kiơ̆, mă kăl noh đe hơdruh tơdăm nhen: ưh đei tu môk ƀao hiêm, kơdâu renh, chơ bơngai hloh kơsô̆ pơkăp... Tơ̆ tơring groi kông, mă lơ bơngai vơ̆r gre honđa noh tơdăm, dang dôm bơngai băt gah luơ̆t trong nơnăm, băt gah tơchơ̆t ƀơ̆t hao gre honđa noh athei tu môk ƀao hiêm, mă lei băt noh minh tơdrong, oei pơm kiơ̆ ƀlep dah mă ưh noh kiơ̆ kơ bơngai. Pơmai Cao Thị Dân tơ̆ xah Cầu Bà, apŭng groi kông Khánh Vĩnh, dêh char Khánh Hòa ăn tơbăt: “Đei bơngai hao gre noh tu môk ƀao hiêm, đei bơngai ưh kơ tu kơlih akhan hnam tơjê̆ đĕch”

Tơ̆ tơring groi kông, lơ hơ-ioh lăp ‘nao 12, 13 sơnăm mă hlôi vơ̆r gre honđa chă đô̆ kơmăi. Đơ̆ng oei ‘lâ̆p mă thoi ăi bơih noh truh ah tơdăm tam mă pơhrăm gah luơ̆t trong nơnăm, tam mă đei ƀăng vơ̆r gre chŏng mă mưh đei gre noh iŏk vơ̆r hloi. Tơdrong đei ƀôh hơdah tơ̆ tơring groi kông noh gre đô̆ kơmăi, noh ưh đei sơđơ̆ng ôh, mă lei tơ̆ âu jing gre vih vơ̆t kơ lơ đe tơdăm. Đei lơ tơdăm ‘nao et tơdrô bier đang noh iŏk gre vơ̆r kơdâu kiơ̆ trong. Ƀok Triệu Mạnh Hải, tơ̆ apŭng Khánh Vĩnh, dêh char Khánh Hòa ăn tơbăt: “Đon vao kơ kon pơlei tơ̆ âu oei kơđeh, mă 2 noh hŏk pơhrăm ưh đei truh noh ah đei gre chă iŏk vơ̆r kơdâu kư̆ kă đĕch bơih. Anih juăt jang kơpal pơkăp phak hrŭ noh pơtơm băt tơdrong glăi mă lei tôm tơdrong hlôi bơh ƀơm”

Kanh sat jang hơlen trong nơnăm hơnơ̆ng pơjing anih oei hơlen, sek tơlang phak hrŭ tơdrong pơm glăi mă lei dôm anih jang hơlen mă lơ tơ̆ dôm jăl trong tơm. Kơyuơ noh, dôm jăl trong lơ̆m xah, pơlei tam mă đei tơlang tơnăp hăm tơdrong pơm glăi đơ̆ng đe tơdăm. Lơ ‘măng chă tơroi tơbăt, adoi tam mă tơplih đei đon vao gah tơchơ̆t vei sơđơ̆ng trong nơnăm hăm kon pơlei tơring groi kông. Minh lơ̆m dôm tơnap tap hăm tơdrong jang vei sơđơ̆ng trong nơnăm tơ̆ tơring groi kông noh khul Kanh sat dăr hơlen trong nơnăm kơ dôm tơring ưh đei lơ, lơ̆m kơplah tơring dăr hơlen noh să. Minh lơ̆m dôm trong tơlĕch jang đơ̆ng Khánh Hòa hăm tơdrong pơm hơtŏk đon vao pơm kiơ̆ tơchơ̆t vei sơđơ̆ng trong nơnăm ăn kon pơlei kon kông, tơring groi kông noh iŏk yua sơnong jang kơ đe kră pơlei, kơdră pơlei, bơngai đei kon pơlei lui yom tơ̆ tơring, đơ̆ng noh pơih să, hơvơn đe sư jing bơngai jang dơnơm lơ̆m tơdrong chă tơroi tơbăt vei sơđơ̆ng trong nơnăm ăn kon pơlei. Ƀok Nguyễn Ngọc Hoa, jang Kơdră tơdăng kơ Anih jang vei lăng kon pơlei xah Khánh Trung, apŭng Khánh Vĩnh, dêh char Khánh Hòa ăn tơbăt: “Nhôn pôk minh ‘nu jang tang măt ăn rim bơngai đei kon pơlei lui yom tơ̆ tơring kon pơlei kon kông vă tơguăt jang lơ tơdrong chă pơtho pơhrăm, phŏ pơjao hloi ăn kŏng ang chă akŏm apinh, pơjuă, tơbăt hăm dôm bơngai hơnơ̆ng pơm glăi sơkơ̆t vei sơđơ̆ng trong nơnăm”

Rim năr, tơ̆ lơ jăl trong lơ tơring groi kông oei đei lơ tơdăm vơ̆r gre đô̆ kiơ̆ trong nơnăm, ưh đei tu môk ƀao hiêm hăm tơdrong kơdâu renh mah pơm lơ bơngai pơngơ̆t kơ đon. Anih jang Kanh sat dăr hơlen trong nơnăm Kŏng ang dêh char Khánh Hòa hlôi pơjing tơdrong jang Hơvơn pơtho hơgei gah “Tơroi tơbăt, pơtho gah Luơ̆t tơchơ̆t vei sơđơ̆ng trong nơnăm ăn kon pơlei tơring groi kông Khánh Vĩnh jăl sơnăm 2021-2025”. Kiơ̆ đơ̆ng noh, hlôi tơlĕch tơroi lơ ‘măng ăn jê̆ 1 rơbâu ‘nu bơngai tang măt ăn dôm anih jang, jơnŭm tơpôl, anih jang chĭnh trĭ tơpôl, kră pơlei; kon pơlei kon kông tơ̆ 3 xah Liên Sang, xah Cầu Bà, xah Sơn Thái (lơ̆m apŭng Khánh Vĩnh) păng Hnam trưng Trung kâ̆p pơtho tơdrong jang kon kông Hŏk oei hadoi apŭng Khánh Vĩnh... Asong ăn 70 tŏ môk ƀao hiêm, asong ăn hla bar tơroi tơbăt gah vei sơđơ̆ng trong nơnăm; sơkơ̆t gah tơdrong pơm kiơ̆ tơchơ̆t vei sơđơ̆ng trong nơnăm ăn đe hŏk tro; pơlăp tơbang 2 tŏ kơƀang tơroi gah vei sơđơ̆ng trong nơmăm hăm tơdrong chih “Kanh sat trong nơnăm kơyuơ tơdrong sơđơ̆ng tơ̆ dôm jăl trong” kiơ̆ rok Jăl trong 27C tơ̆ 2 xah Cầu Bà păng xah Sơn Thái. Mă tơdrong jang vei lăng sơđơ̆ng trong nơnăm tơ̆ tơring groi kông kơ Khánh Hòa adoi tam mă đei jơnei nhen tơdrong ‘meh vă, mă lei hăm tơdrong vang jang khŏm mă đei nhen dang ei, tơpă lơ̆m khei năr truh, tơdrong jang vei sơđơ̆ng trong nơnăm tơ̆ tơring groi kông gô đei lơ tơplih kăp gĭt, tơgop lơ̆m tơdrong pơm tơjur sar bar trong nơnăm lơ̆m jâ̆p dêh char.