Pơro đak vă dŏng ‘long pơtăm tơ̆ tơring “tŏ pơđang dơnơm” Đăk Nông
Thứ năm, 10:45, 21/03/2024
VOV Tây Nguyên/Lan chih tơblơ̆
VOV Tây Nguyên/Lan chih tơblơ̆
VOV4.Bahnar - Nhen Rađiô nơ̆r pơma VN hlôi pơtơ̆ng, kơ rơbâu hectar ‘long pơtăm tơ̆ apŭng Krông Nô, tơring “tŏ pơđang dơnơm” kơ dêh char Đăk Nông tŏk bŏk oei kơƀah đak ruih, ƀơm tŏ phang pơđang kơtang hloh.
Ƀok Nguyễn Văn Đại, Kơdră Anih jang tơ̆ apŭng Krông Nô, Anih jang gah pơnơ̆ đak Đăk Nông ăn tơbăt, hăm tŏ pơđang thoi âu, apŭng hlôi pơm jang hăm dôm apŭng tơjê̆ nhen Đăk Mil păng Đăk Song vă asong đak đơ̆ng dôm dơnâu đak tih vă tơjră hăm tŏ pơđang. Tơ̆ hơnăp, đei tơdrong drơ̆ng nơ̆r đơ̆ng apŭng Đăk Mil asong đak đơ̆ng dơnâu Hồ Tây (mong đei hloh 3 trĭu mét khối đak) pơro truh apŭng Krông Nô kiơ̆ thong hơbong truh đak glung Đăk Sôr.
Kiơ̆ kơ ƀok Nguyễn Văn Đại, Kŏng ti jang gah pơnơ̆ đak Đăk Nông jang atŭm hăm anih choh jang xa păng jơnŭm pơgơ̆r tơring hlôi tơroi hăm kon pơlei băt hơdah gah tơdrong pơkăp pơro đak. Kon pơlei hlôi păng tŏk bŏk kơchăng iŏk yua đak kăp gĭt âu vă ruih ăn ‘long pơtăm.
Viết bình luận