Dôm tơdrong pơm tông tơroi tơbăt găh yak tơ̆ trong nơnăm dăh mă dôm nơ̆r apĭnh đei pơjing tôch trŏ lăp găh sơđơ̆ng trong nơnăm đei pơtho tơbăt ƀônh hlôh vao, ƀônh kơchăm, pơm ăn tơdrong pơtho pơhrăm găh khôi luơ̆t sơđơ̆ng trong nơnăm sa roi chơt hơ iă hlŏh dơ̆ng.

Mă hơdăh, tơ̆ hnam trương jăl ƀar Độc Lập, phương Trung Thành, Dơnŏ anĭh Đoàn pơlei tơm Thái Nguyên jang hơdoi hăm Kŏng ang pơlei tơm Thái Nguyên, Kŏng ty tĕch răt tơmam drăm hăm tĕh đak đe Thái Nguyên pơgơ̆r pơtho tơbăt sơđơ̆ng trong nơnăm păng pơtho vơ̆r gre sơđơ̆ng ăn vă jê̆ 1.200 ‘nu hŏk tro hnam trương. Dăh mă nhen ‘măng pơtho tơbăt sơđơ̆ng trong nơnăm ăn hlŏh 1.300 ‘nu kang ƀô̆, ƀok thây kô, hŏk tro hnam trương jăl pêng Điềm Thụy, apŭng Phú Bình, kơ yuơ Hơnĭh jang Kanh sat vei lăng trong nơnăm kơ Kŏng ang dêh char jang hơdoi hăm Dơnŏ anĭh bơ̆ jang vei lăng trong nơnăm dêh char păng Dơnŏ anĭh Đoàn dêh char Thái Nguyên pơgơ̆r. Lơ̆m mă nŏh, vă jê̆ 800 ‘nu kang ƀô̆ ƀok thây kô păng hŏk tro hnam trương jăl pêng Trần Quốc Tuấn (apŭng Đồng Hỷ) jei hlôi vang năm ‘măng pơgơ̆r tơchă băt vao khôi luơ̆t găh sơđơ̆ng trong nơnăm vang đei vang tơgŭm djru đơ̆ng Kŏng ang apŭng Đồng Hỷ. Hnam trương jăl pêng Lưu Nhân Chú (apŭng Đại Từ), hnam trương jang hơdoi hăm Kŏng ang apŭng Đại Từ pơgơ̆r Pơm lêh kĭ pơkăp trong jang hơdoi sơđơ̆ng bơ̆ jang sơđơ̆ng trong nơnăm tơring tơrang, sơđơ̆ng hnam trương hŏk pơhrăm. Vang năm kĭ pơkăp trong jang hơdoi oei đei kơdră tang măt ăn 8 tơring đei hŏk tro tơ̆ hnam trương.

Hăm trong pơgơ̆r ‘lơ̆ng hơ iă ƀar păh rim tơdrong pơrô̆ pơrôp kiơ̆ rim tơdrong ƀô̆h hơdăh, hla bơar tơbăt, mă kăl ‘noh pơgơ̆r pơm tông, jơ pơma dơnŭh hlôi đei lơ hŏk tro lơ̆m hnam trương vang năm. Đe ŏh chơt hơ iă mư̆h đei pơgơ̆r, tơl nơ̆r apĭnh đei ƀơm trŭh tơdrong sơđơ̆ng trong nơnăm păng đei pơtho tơbăt hơdăh găh tơdrong yak tơ̆ trong lơ liơ mă sơđơ̆ng, ‘lơ̆ng, chă yơ̆l môk kŭp lơ  liơ mă trŏ ƀlep …

Ŏh Đỗ Ngọc Ánh, lăm 11A1, hnam trương jăl pêng Trần Quốc Tuấn pơma: Tơ̆ lăm hŏk nhôn jei đei hŏk pơhrăm găh tơdrong sơđơ̆ng trong nơnăm, mă lei tơdrong hŏk lơ lau jĭ tơnap mă rơbot, hlôh vao. Jơ ‘năr pơgơ̆r pơlong tơchă băt khôi luơ̆t sơđơ̆ng au jĭ tôch kơ chơt. Dôm tơdrong pơm tông găh tơdrong sơđơ̆ng trong gre nơnăm lơ lau jĭ tôch hơ iă, tơgŭm nhôn băt hlôh ƀô̆h hơdăh hlŏh dơ̆ng mư̆h chă yak tơ̆ trong pơm lơ liơ mă sơđơ̆ng ‘lơ̆ng hơ iă.

Păng ŏh Đỗ Như Ngọc, Lăm Anh 12A1, Hnam trương jăl pêng Chuyên Thái Nguyên tơbăt: Nơ̆r pơma, adoi nhen dôm tơdrong chă pơma dơnuh dĭh băl tôch trŏ lăp, ƀônh hlôh vao, pơm ăn kơ ba hlôh vao hlŏh dơ̆ng găh khôi luơ̆t trong nơnăm, đơ̆ng rŏng tơbăt hơdăh tơdrong yom kiơ̆ hăm trong pơm kiơ̆ ƀlep, yom kơdĭh, ŭnh hnam păng tơpôl.

Tơ̆ rim tơdrong pơgơ̆r, hŏk tro păng kang ƀô̆, ƀok thây kô Hnam trương ‘moi kiơ̆ tơbăt tĕnh koăng găh sơđơ̆ng dơ̆ng kơjap, sơđơ̆ng trong nơnăm lơ̆m dêh char, pơlei tơm; tơroi tơbăt rim tơdrong kăl kơ Khôi luơ̆t Trong nơnăm, dôm tơdrong pơm glăi ‘nŏh jing tơdrong tơm pơm ăn trŭh đei tơdrong gre tơtơ̆m dĭh băl au to; tơdrong hao gre ‘lơ̆ng, nơ̆r pơma sa ‘lơ̆ng hơ iă; rim kơƀang tơbăt hơdăh găh kơđeng trong nơnăm; rim trong hơmet pơ ‘lơ̆ng mưh đei sar bar trong năm; dôm tơdrong tơchơ̆t kơ khôi luơ̆t găh trong nơnăm păng pơtho vơ̆r gre sơđơ̆ng …Rim hnam trương jei kĭ pơkăp hăm Dơnŏ anĭh Kanh sat vei lăng trong nơnăm jang kiơ̆ rim tơdrong tơchơ̆t găh trong nơnăm. Thiếu tá Nguyễn Nam Hưng, Dơnŏ anĭh Kanh sat vei lăng trong nơnăm kơ Kŏng ang dêh char Thái Nguyên tơbăt: Pơtho tơbăt kiơ̆ trong trư̆k tuyên, pơtho tơbăt kiơ̆ lơ̆m mạng, ‘ngoăih kơ ‘nŏh pơrô̆ pơtho tơbăt kơtă hloi nhôn jei tơplĭh trong pơtho tơbăt, pơm lơ liơ ƀônh hlôh vao, chă mơ̆ng ƀônh kơchăm.

Ƀlep lơ̆m jơ ‘năr au, Dơnŏ anĭh Kanh sat vei lăng trong nơnăm hlôi pơgơ̆r pơdă rup “Sar bar trong nơnăm, xek tơlang pơm glăi”; ƀơk ăn 1.000 hlak hla bơar pơtho tơbăt sơđơ̆ng trong nơnăm păng pôk ăn 20 tŏ môk kŭp Honda ‘lơ̆ng ăn rim hŏk tro. Tơdrong pơgơ̆r au jei pôk ăn tơmam drăm ăn rim đe hŏk tro ‘nŏh “bơngai tang măt pơm kiơ̆ ‘lơ̆ng trong nơnăm” păng dôm đe ŏh ŭnh hnam tơnap tap.

‘Nau jing tơdrong jang đei Dơnŏ anih Đoàn pơlei tơm Thái Nguyên iung jang hơdoi hăm rim hơnĭh bơ̆ jang vang pơgơ̆r hơnơ̆ng, hăm lơ trong pơgơ̆r ‘lơ̆ng hơ iă. Hlŏh đơ̆ng au vă hơmet ăn đe hŏk tro băt hơdăh dôm tơdrong vơ̆r gre sơđơ̆ng, tơgop tơgŭm ăn đe ŏh băt hlôh ƀô̆h nhen, pơm kiơ̆ kơ jăp Khôi luơ̆t Trong gre nơnăm. Khei năr kơnh, Dơnŏ anĭh Đoàn pơlei tơm Thái Nguyên hơnơ̆ng pơgơ̆r tơ̆ mĭnh ƀar hnam trương lơm pơlei tơm dơ̆ng.