Vă jê̆ mĭnh giĕng hơdrol kơ mơ̆t pơm ƀô̆ đô̆i, Tống Duy Nam, phương Phúc Thành, pơlei tơm Ninh Bình hlôi đei pơm lêh pôk tơmơ̆t jang Đảng, iung pơma pơkăp tơ̆ hơnăp hla kơ Đảng, hla kơ Teh đak. Nam ‘noh mĭnh lơ̆m 177 ‘nu hơdruh tơdăm iung năm pơm ƀô̆ đô̆i đei kơdră Đảng, kơdră chĕp pơgơ̆r dêh char Ninh Bình ăn năm hŏk păng pôk tơmơ̆t jang Đảng.. Đei mơ̆t jang lơ̆m Khul Đảng ‘noh jing tơdrong gĭt kăl hloh hăm Nam vă kơrŭn đĭ jơhngơ̆m mơlôh ăn kơ teh đak:“Ba đei mơ̆t jang lơ̆m Đảng ‘noh hơ iă dêh, kơ yuơ ba, hưch hanh hơmanh bơnê tôch kơ dêh kơ yuơ đei mơ̆t jang Đảng. Mơ̆t pơm ƀô̆ đô̆i ĭnh gô hơdrin đĭ ai vă đei jing bơngai ƀô̆ đô̆i nuih mơng pran kơtang, bơ̆ jang ‘lơ̆ng.”

Jei tơdrong chơt hơ iă lơ lau, ƀar ‘nu bơngai ‘nao mơ̆t pơm ƀô̆ đô̆i kơ Hơnih tơm ‘noh bơngai tơdăm La Đức Thắng phương Hoàng Văn Thụ, kuân Hoàng Mai hăm Phạm Thế Anh, phương Đông Ngạc, kuân Bắc Từ Liêm hlôi sơkơ̆t hơdăh hloh dơ̆ng hơnăp jang kơdih lơ̆m khei năr pơm ƀô̆ đô̆i păng khei năr iung jang đơ̆ng rŏng au.  La Đức Thắng tơbăt:“Mưh đei pôk tơmơ̆t jang Đảng lơ lau, hơnăp jang đơ̆ng rŏng au kơnh ‘noh pơm ăn kơ ba ‘meh vă đei tơgop lơ hloh dơ̆ng păng jei ‘meh vă đei jing mĭnh ‘nu đảng viên pơm jŭk yuk trong hơlau.”

Phạm Thế Anh, phương Đông Ngạc, kuân Bắc Từ Liêm ‘noh sơkơ̆t hơdăh:“Ba tôch chơt hơ iă đei pôk tơmơ̆t jang đảng viên hơdrol khei ‘năr mơ̆t pơm ƀô̆ đô̆i, kơna ba gô hơdrin hloh dơ̆ng păng đơ̆ng rŏng 12 khei hơlen gô đei jing mĭnh ‘nu đảng viên ‘lơ̆ng ăn teh đak. Mưh mơ̆t pơm ƀô̆ đô̆i ba hơdrin hŏk pơhrăm mă nŏng, jang keh đang dôm tơdrong jang đei pơjao ăn.”

Dôm hơdruh tơdăm đei pôk tơmơ̆t jang Đảng hơdrol kơ mơ̆t pơm ƀô̆ đô̆i ‘noh dôm hơdruh tơdăm ‘lơ̆ng hơ iă, iung năm pơm ƀô̆ đô̆i, đei jơhngơ̆m đon ‘lơ̆ng, tơnăp hăm tơdrong jang tơ̆ tơring, đei jơhngơ̆m đon ‘meh vă mơ̆t jang lơ̆m khul Đảng hlôi đei kơdră chĕp pơgơ̆r đảng rim tơring lăng ba, ăn năm hŏk, pôk tơmơ̆t. ‘Nau jĭ trong jang ‘lơ̆ng đơ̆ng khul kang ƀô̆ tơring, nhen nơ̆r tơbăt đơ̆ng ƀok Trần Duy Nhất, Kơdră chĕp pơgơ̆r Hơnih bơ̆ jang vei lăng kon pơlei tơring Gia Thịnh, apŭng Gia Viễn, dêh char Ninh Bình:“Đơ̆ng blŭng hloi, nhôn đei tơƀơp pơma dơnuh hăm hơdruh tơdăm năm iung jang păng hơdruh tơdăm đei jơhngơ̆m đon ‘lơ̆ng păng hlôi ăn rim hơdruh tơdăm năm hŏk, jei tôch chơt hơ iă sơnăm au tơring hlôi pôk tơmơ̆t jang đảng ăn 2 ‘nu hơdruh tơdăm hơdrol jơ ‘năr mơ̆t pơm ƀô̆ đô̆i. Vă sơđơ̆ng rim trong pơkăp ‘noh, ŭnh hnam, chi ƀô̆ jei hlôi lăng ba kơjăp, tơgŭm djru, pơjing rơvơn.”

Lơ tơring jei sơkơ̆t hơdăh atŏk tơ iung lơ̆m hơdruh tơdăm mơ̆t pơm ƀô̆ đô̆i ‘noh jing trong jang gĭt kăl hloh, mă đơ̆ng măt bơngai hơdruh tơdăm năm pơm ƀô̆ đô̆i đei pôk tơmơ̆t jang Đảng tơ̆ rim tơring đei phara dih băl. Pơlei tơm Hà Nội lơ̆m ‘măng krao tơmơ̆t pơm ƀô̆ đô̆i sơnăm 2024 hlôi pôk tơmơ̆t jang Đảng ăn 15 ‘nu hơdruh tơdăm năm mơ̆t pơm ƀô̆ đô̆i, tơmơ̆t lăp tŏ sĕt ‘noh 0,4% akŏp măt bơngai hơdruh tơdăm mơ̆t pơm ƀô̆ đô̆i, mă lei 100% hơdruh tơdăm mơ̆t pơm ƀô̆ đô̆i đei hŏk vă mơ̆t jang Đảng. Đại tá Đào Văn Nhận, Kơ iĕng Kơdră chĕp pơgơ̆r Hơnih tơm Ƀô̆ đô̆i Hơnih tơm Hà Nội tơbăt:“Sơnăm au pơlei tơm jei akŏm chĕp pơgơ̆r, pơrô̆ păng pơjing đei hơyak pran, lơ̆m au đei 30 kuân apŭng jei pơgơ̆r pơih lăm hŏk găh Đảng ăn hơdruh tơdăm mưh khăm hơlen, đei tôm rơvơn mơ̆t pơm ƀô̆ đô̆i, drơ̆ng nơ̆r mơ̆t pơm ƀô̆ đô̆i vang năm hŏk găh mơ̆t pơm Đảng. Dang ei lơ̆m pơlei tơm đei dang 15 ‘nu hơdruh tơdăm đei pôk tơmơ̆t jang đảng hơdrol vă mơ̆t pơm ƀô̆ đô̆i.”

          Pơtho pơjing, pôk tơmơ̆t jang Đảng ăn hơdruh tơdăm mơ̆t pơm ƀô̆ đô̆i ‘nŏh mĭnh trong jang tih tên tơ̆ lơ tơring. Kiơ̆ chih jô̆ tim mă tôm tong, rim dêh char, pơlei tơm lơ̆m Teh đak hlôi pôk tơmơ̆t đei kơhrĕng ‘nu đảng viên ‘nŏh dôm hơdruh tơdăm ‘lơ̆ng hơ iă mơ̆t pơm ƀô̆ đô̆i. ‘Nau đei lăng jing tơdrong jang gĭt kăl hloh, pơprŏ ăn, hơtŏk kơtang bơ̆ jang chinh trĭ ‘lơ̆ng hơ iă lơ̆m hơdruh tơdăm mơ̆t pơm ƀô̆ đô̆i păng oei pơjing hơyak pơtho pơjing khul vă pơm kang ƀô̆ ăn rim hơnih ƀô̆ đô̆i adoi nhen pơjing khul ăn pơm kang ƀô̆ tơm dơnơm kơ khul dân quân tự vệ, khul jang hmŏ tơ̆ tơring lăp đơ̆ng rŏng hơdruh tơdăm mơ̆t pơm ƀô̆ đô̆i tôm khei ‘năr brok vih tơ̆ ŭnh hnam, tơ̆ tơring.