Lơ̆m hơnăn vei hơlen, đoan xăh tơroi, apŭng Kỳ Sơn đei hloh 421 đoan viên hơdruh tơdăm, chŏng mă tơpă, rim ‘măng tơlĕch minh tơdrong jang dơnơm iung pơm jang noh kơsô̆ bơngai akŏm đei tong anê̆ đĕch, kơyươ noh, đoan xăh ƀơm lơ tơnap tap vă gơh đei jơnei nhen tơchơ̆t tơlĕch. Lương Văn Tạc, Ƀĭ thư đoan xăh Phà Đánh, apŭng Kỳ Sơn, dêh char Nghệ An tơroi: Năm jang dôm tơdrong jang đe hơdruh tơdăm, găh tơdrong jang hơdruh tơdăm rim xơnăm noh akŏm duh ưh đei lơ kơlih đe xư năm jang đĭ tơ̆ ataih păng ăh têt noh đe xư pơtơm vih akŏm lơ.

Tơpă nhen xăh tơroi dang ei tŏk bŏk đei ƀôh tơ̆ dôm apŭng găh pơmơ̆t Nghệ An. Tơdrong mă âu ưh adrô̆ pơm ưh kơ măh bơngai jang lơ̆m tơdrong jang đoan hơdruh tơdăm, lơ̆m xut lê̆ pơngot tơjur hin dơnuh tơ̆ tơring ataih yaih mă oei pơrăm tih tên lơ̆m tơdrong jang hơtŏk đảng viên bơngai kon kông.  Nguyễn Đình Thuận, Ƀĭ thư anih jang đoan apŭng Quỳ Hợp, dêh char Nghệ An akhan: Kơsô̆ bơngai oei tơ̆ tơring tŏ xĕt pơrăm truh tơdrong akŏm pơjing khul jang duh nhen lơ̆m tơdrong pơm kiơ̆ tơlĕch jang tơ̆ tơring.

Oei pơmai Lữ Thị Băng Châu, Ƀĭ thư anih jang đoan apŭng Con Cuông dêh char Nghệ An noh akhan: Đon kơchĕng adoi nhen tơdrong hlôh vao đơ̆ng đe hơdruh tơdăm hăm dôm tơdrong hlôh vao găh hơtŏk mŭk drăm oei kơđeh, kơyươ noh dôm tơdrong tơlĕch jang ăn hơdruh tơdăm hơtŏk mŭk drăm noh iơ iĕ răh rai păng ưh đei iŏk jơnei kơjung.

Hơyak kiơ̆ pơkăp axong tơdrong jang ăn đe hơdruh tơdăm kon kông, rim jơnŭm pơgơ̆r tơring dôm jăl păng anih jang đoan tơ̆ Nghệ An hlôi pơjing đei lơ tơdrong jang tơgŭm ăn hơdruh tơdăm kon kông oei erih tơ̆ tơring dăh mă hơdruh tơdăm chôt vih pơlei pơla iung pơm jang, hơtŏk mŭk drăm, dar deh pơm pơdrŏng kơtă tơ̆ pơlei pơla kơdih. Vi Thái Thuận, Ƀĭ thư anih jang đoan apŭng Kỳ Sơn, dêh char Nghệ An ăn tơbăt: Ƀan châ̆p hanh đoan apŭng hlôi iŏk yua dôm tơdrong hlôi đei vă tơgŭm ăn hơdruh tơdăm lơ̆m tơdrong iung pơm jang. Atŭm hăm noh ƀan châ̆p hanh đoan tơ̆ apŭng gô pơtoi tơrĕk, jang hadoi hăm dôm anih jang pơih lăm pơtho tơdrong jang lơ̆m tŏ xĕt khei năr duh nhen đunh khei năr, đang kơ noh pơih dôm lăm pơhrrăm găh khoa hŏk kih thuơ̆t ăn đoan viên hơdruh tơdăm vă tơgŭm ăn đoan viên hơdruh tơdăm iung pơm jang.

XơNăm 2016, Mong Văn Sơn pơkăp chôt vih pơlei Phà Khảo, tŏk iŏk jên đơ̆ng Anih mong jên tơgŭm tơpôl, Anih mong jên choh jang xa, axong rong kơpô, rơmo. Pơtơm đơ̆ng 1 pôm kơpô păng 3 tŏ rơmo đang kơ noh đei jơnŭm pơgơ̆r xăh Phà Đánh pơm trong hiôk pơjing cham rong hơchăng kon tơrong xă 3 ha, truh dang ei xư hlôi đei minh anih rong kon tơrong rim xơnăm pơyua hloh 100 rơtuh hlj. Hăm tơdrong pơ ‘nam, hơdrin, Mong Văn Sơn jing um ai hơdruh tơdăm jang mŭk drăm rơgei kơ pơlei Phà Khảo duh nhen kơ kon pơlei Khơ Mú apŭng Kỳ Sơn.Mong Văn Sơn chơt hơ iă tơroi: Inh axong rong kơpô, rơmo, găh đoan noh adoi tơgŭm jên jang păng găh hơdruh tơdăm iung pơm jang đei pơih lăm hŏk găh kih thuơ̆t vei rong kon tơrong. Inh adoi hŏk hơlen găh kih thuơ̆t rong kơpô, rơno noh inh hlôi iŏk yua lơ̆m pơm jang.

Vă tơlĕch jang dôm tơdrong pơkăp tơgŭm hơdruh tơdăm kon kông, pơtoi pơjing tơdrong jang ăn hơdruh tơdăm hơtŏk mŭk drăm adoi nhen tơgop pơm jang vă xut lê̆ pơngot tơjur hin dơnuh tơ̆ tơring duh nhen tơ iung păng hơtŏk đon bơnôh khĭn kơchĕng, khĭn pơm jang, khĭn pơtơm pơm jang đơ̆ng khul hơdruh tơdăm jing kăp gĭt tơpă. Hăm anih jang đoan xăh Minh Hợp, apŭng Quỳ Hợp, tơgŭm pơtoi, pơjing tơdrong jang ăn hơdruh tơdăm kon pơlei đei xơkơ̆t jing minh lơ̆m dôm xơnong jang kăp gĭt lơ̆m tơdrong hơdruh tơdăm iung pơm jang đơ̆ng anih jang đoan. Atŭm hăm tơdrong pơjing axong jang, anih jang đoan xăh Minh Hợp akŏm tơlĕch tơplih trong pơm jang lơ̆m đoan viên, hơdruh tơdăm, đơ̆ng noh tơgop pơm kiơ̆ tơnăp tơchơ̆t hop akŏm đảng ƀô̆ xăh jăl jang 2020-2025.

Mưh đei trong pơkăp jang tơtom, đei pơm trong hiôk găh tơmam pơm jang, găh tơdrong hlôh vao noh đe hơdruh tơdăm kon kông gô kơ ‘nôh ưh adrô̆ klaih đơ̆ng hin dơnuh pơm pơdrŏng ăn unh hnam mă oei jing minh khul jang dơnơm tơgop lơ̆m tơdrong pơm kiơ̆ pơkăp hơtŏk mŭk drăm tơpôl tơ̆ tơring.