Dôm năr hơtuch sơnăm Giáp Thìn, Y Dũng, bơngai M’Nông, hrŭk hơbăn ao ‘nao đei kăn ƀô̆ đơ̆ng kơđông lĭnh vei lăng ‘măng sơlam Thuận An chơ jur tơ̆ plei Sa Par (xăh Thuận An, apŭng Đắk Mil, dêh char Đắk Nông) vă vang pơgơ̆r pơyan puih mak tơ̆ tơring sơlam ƀĕnh jơhngơ̆m đon ‘mên kơ kon pơlei. Y Dũng sơnăm ‘nâu oei hŏk lăm 6, jĭ kon rong tơ̆ kơđông lĭnh vei lăng tơring sơlam đĭ hlŏh 3 sơnăm ‘nâu bơ̆ih, đei kăn ƀô̆, lĭnh rong ăn sư hŏk pơhrăm kơtă tơ̆ kơđông. Đơ̆ng mĭnh ‘nu bơngai hŏk ưh kơ gan gơh, hăm tơdrong vei lăng pơtho pơhrăm tôch bơneh đơ̆ng đe ƀă rong ‘noh jĭ đe ƀô̆ đô̆i, Y Dũng jing hŏk tro hŏk tôch kơ gơh, hơđơ̆ng jơhngơ̆m. Lơ̆m jơhngơ̆m đon chơt hơiă kŭm hăm pơlei sơng sa Têt hơdai ƀô̆ đô̆i vei lăng tơring sơlam, Y Dũng tôch kơ chhôk ‘nă kŭm hăm đe buăl tơhnơr sư tơ̆ pơlei pơm ngôi lơ tơdrong pơchơt đơ̆ng kră sơ̆, nhen tŭn băl hăm ‘long, dui băl, pơplŏng ƀao ƀô̆:

“Kon đei đe ma ƀô̆ đô̆i tơ̆ kơ đông tôch kơ bơngơ̆t vei rong tôch kơ ‘lơ̆ng, gơnang đơ̆ng noh mă mon roi hlôh vao, mon vă hơdrin hŏk pơhrăm vă hoei pơm lao đon đe ma ƀô̆ đô̆i vei lăng tơring sơlam. Sơnăm ‘nao, mon hmach thơ thâu ăn đe ma ƀô̆ đô̆i tơ̆ kơđông ling lang pran jăng grăng hơkâu, bơ̆ jang ‘lơ̆ng tơdrong jang đei pơjao.”

Kŭm hăm kăn ƀô̆, linh tơ̆ kơđông vei lăng ‘măng sơlam Thuận An pơgơ̆r pơyan Puih mak tơ̆ tơring sơlam dơnŏ ‘lơ̆ng jơhngâm đon kon pơlei, mŏ H’Loen, Bí thư đoàn plei Bu Đắk, xăh Thuận An tơroi, um rup ƀô đô̆i vei lăng tơring sơlam tôch ‘lơ̆ng hăm kon pơlei tơ̆ tơring sơlam. Dôm sơnăm âu ki, đe linh hơnơ̆ng yak hơdoi hăm kon pơlei tơ̆ pơlei pơla. Đe ‘nhŏng tơgŭm ăn kon pơlei jang xa, pơm hnam ăn unh hnam tơnuh, đang kơ ‘nŏh pơm hơmet bơ̆n trong, dơnâu đak vă kon pơlei yak vih vât, choh jang rei pơtăm hiôk ƀiơ̆. Tơring yơ pơmat tat ‘nŏh ƀôh đe ‘nhŏng truh tơgŭm. Kơlih thoi noh mă kon pơlei sơng xa Têt hăm đe linh roi hơiă, roi ‘mêm băl hlŏh dơ̆ng:

“Mih ma duch nă tôch hơiă mưh sơng xa Têt hăm ƀô đô̆i vei lăng tơring sơlam. Đe ‘nhŏng hlôi tơgŭm ăn kon pơlei lơ tơdrong lơ̆m tơdrong arih xa păng jang xa. Oei kon pơlei ‘nŏh hơnơ̆ng yak hơdoi hăm ƀô đô̆i vei lăng tơring sơlam. Sơnăm ‘nao inh hmach thơ thou ăn đe ‘nhŏng ƀô đô̆i vei lăng tơring sơlam pran jăng grăng hơkâu, bơ̆ jang roi ‘lơ̆ng, hơnơ̆ng mât 1 ƀơ̆r đon hăm kon pơlei tơ̆ tơring sơlam.”

Vang ‘nŭng ƀĕng chưng hăm đe ƀô đô̆i vei lăng tơring sơlam păng mih ma duch nă tơ̆ pơlei vă sơng xa têt, mŏ H’Lo Ren, kô pơtho tơ̆ Hnam trưng mâm non Hoà Bình, plei Sa Par, xăh Thuận An ăn tơbăt, lơ sơnăm âu ki, tơdrong hơmet pơgơ̆r têt tôch hơiă, ƀĕnh jơhngâm đon ‘mêm băl thoi âu đei hơnơ̆ng:

“Thây kô nhôn kŭm vang yak hơdoi hăm đe ƀô đô̆i vei lăng tơring sơlam lơ̆m lơ tơdrong jang đơ̆ng lơ sơnăm bơih. Gơh pơma, ƀô đô̆i vei lăng tơring sơlam jĭ khul ăn kon pơlei gơnang tôch kơjăp tơ̆ tơring sơlam, nhôn tôch hơiă. Sơnăm ‘nao inh hmach thơ thou ăn đe ‘nhŏng ƀô đô̆i vei lăng tơring sơlam pran jăng grăng hơkâu, bơ̆ jang ‘lơng rim tơdrong đei pơjao.”

Thượng tá Nguyễn Văn Thắng, Kơdră jang Chinh trĭ tơ̆ kơ đông linh vei lăng ‘măng jang sơlam Thuận An ăn tơbăt, kơđông đei tơdrong jang vei lăng trong sơlam kơjung dang 10km păng xăh Thuận An (apŭng Đắk Mil).  Kăn ƀô̆, linh lơ̆m kơđông hơnơ̆ng năng kơđông jĭ hnam, tơring sơlam jĭ pơlei, kon pơlei kon kông jĭ ‘nhŏng oh. Dôm sơnăm âu ki, kơđông hơnơ̆ng pơgơ̆r jang ‘lơ̆ng trong jang “3 tơklep- tơklep hăm kơđông, tơklep hăm tơring, tơklep hăm kon pơlei” păng “4 hơdai- sŏng xa hơdai, oei hơdai, jang hơdai, pơma nơ̆r hơdai hăm kon pơlei”. Rim năr, dôm khul grŭp bơ̆ jang kơtă tơ̆ tơring, jang hơdoi hăm bơngai đei bưng ai, đei grih tih nhen kră pơlei, ƀok pơgơ̆r pơlei vă roi tơbăt, krao hơvơn kon pơlei, tơgŭm ăn kon pơlei hơdăh dôm tơdrong tơ̆ tơring sơlam, jrăng sơlam vă gơ̆h băt tơring yoa xăh, yoa kơđông vei lăng, tơtom roi tơbăt dôm tơdrong pơm glăi găh tơdrong pơm tơm kơ teh đak. Mă loi, tơdrong jang kon pơlei vang vei lăng tơring sơlam, jrăng sơlam đei bơ̆ jang tôch ‘lơ̆ng păng hrei ‘nâu tơ̆ tơring kơđông vei lăng đei 6 grŭp vei lăng tơring sơlam, jrăng sơlam. Kiơ̆ đơ̆ng noh, dar deh pơjing đei tơdrong jang đĭ đăng kon pơlei vang vei kơjăp tơring sơlam, vei lăng ‘lơ̆ng teh đak.

Thượng tá Nguyễn Văn Thắng oei tơroi, vă tơgŭm ăn dôm unh hnam đei tơdrong arih xa pơmat tat păng kon pơlei tơ̆ dôm pơlei pơgơ̆r sơng xa têt chơt hơiă, Kơđông linh vei lăng ‘măng jang sơlam Thuận An jang hơdoi hăm Jơnŭm ‘long pơglang ƀrê apŭng Đắk Mil păng Anih vei lăng kon pơlei xăh Thuận An pơgơ̆r Pơyan Puih mak tơring sơlam dơnŏ ‘lơ̆ng ăn kon pơlei. Tơ̆ âu vă hơpăh kon pơlei lơ tơmam kăp gĭt:

“Kơđông jang hơdoi hăm Jơnŭm ‘long pơglang ƀrê apŭng Đắk Mil păng Anih vei lăng kon pơlei xăh Thuận An pơgơ̆r Pơyan puih mak dơnŏ ‘lơ̆ng ăn kon pơlei. Hơpăh hlŏh 200 tơpu tơmam, 25 tŏ the ƀao hiêm y tế, 46 kơsuơ̆t jên hŏk ƀŏng, akŏm đĭ đăng đei kơjă hlŏh 200 triu hlak jên. Hơdai hăm pơgơ̆r pơyan puih mak dơnŏ ‘lơ̆ng ăn kon pơlei tơ̆ tơring sơlam, kơđông ăn 2 khul jang jur xa Tết hăm kon pơlei, jang ‘lơ̆ng tơdrong jang chinh trĭ, đon tơchĕng, khŏm vei kơjăp tơdrong pơm tơm teh đak, vei lăng ‘lơ̆ng tơdrong sơđơ̆ng tơ̆ tơring sơlam đơ̆ng kơpal pơjao vei lăng.”

Kŭm hăm kon pơlei lơ̆m teh đak, kăn ƀô̆, linh păng kon pơlei tơ̆ tơring sơlam Thuận An, apŭng Đắk Mil, dêh char Đắk Nông oei sơng 1 pơyan puih mak ‘nao ƀĕnh jơhngâm đon ‘mêm băl. Khul linh vang bơ̆ jang, mât 1 jơhngâm đon vă tơring sơlam Thuận An pơma hơdrô̆, dêh char Đắk Nông pơma atŭm pran kơjăp păng roi đunh roi tŏk pơdrŏng.