Dôm năr au ki, atŭm hăm rim tơring anai tơ̆ Tây Nguyên, tơring sơlam teh đak Thuận Hạnh, apŭng Dak Song, dêh char Dak Nông, tŏk bok rơ-ông rơ-ang chă phĕ chehphe. Tơring sơlam teh đak hơtăih hơtŏ, bơngai jang phĕ chehphe tôch kơ lơ, mă lei tơ̆ au ưh kơ đei tơdrong sar bar au to. Mŏ Nguyễn Thị Trang, oei tơ̆ thôn Thuận Bắc, tơring Thuận Hạnh, apŭng Dak Song tơbăt: “Mưh truh pơyan phĕ chehphe, tiu kăl hơvơh đe jang ‘noh nhôn tơroi tơbăt ăn kơ kŏng ang păng kơđông ƀô̆ đô̆i băt găh tơmoi mơ̆t oei vang phĕ chehphe tiu ăn ŭnh hnam bơ̆n. Păng tơdăh ƀôh bơngai tơmoi ‘noh nhôn tơroi hloi ăn kơđông ƀô̆ đô̆i oei tơjê̆ hloh”.

‘Moi kiơ̆ trong sơlam teh đak hơtăih kơjung 20km găh tơring Thuận Hạnh đei tôch kơ lơ mir pơgar kon pơlei hlôi choh jang sa đunh đai tai sơnăm tơ̆ au. ‘Nhŏng Y Quyết, bơngai M’nông, oei tơ̆ bon Sapa, tơring Thuận An, apŭng Dak Mil, jang chehphe tơ̆ tơring sơlam teh đak kơ tơring Thuận Hạnh, tơroi, rim răih kon pơlei mưh năm jang mir jei vang iung jang kiơ̆ kơjăp hăm ƀô̆ đô̆i vei lăng sơlam teh đak kơrŭn đĭ jơhngơ̆m vang vei lăng năng tông trong sơlam teh đak, hơdrơ̆ng hơdrar teh đak:“Ŭnh hnam nhôn đei mir tơ̆ au păng đei hơdrơ̆ng hơdrar teh đak kơtă lơ̆m mir hloi. Rim ‘măng ba jang mir ‘noh ba jei chong choh pơ ‘ngoăih hơnih hơdrơ̆ng au. Păng mưh ƀôh tơmoi hlĭch mơ̆t lơ̆m tơring sơlam teh đak ‘noh nhôn năm tơroi hloi ăn ƀô̆ đô̆i vei lăng sơlam teh đak băt. Ƀô̆ đô̆i vei lăng sơlam teh đak hơnơng năm pơtrui kơna bơ̆n chă jang mir tơ̆ au jei tôch sơđơ̆ng jơhngơ̆m”.

Găh ‘nhŏng Nguyễn Văn Tuynh ‘noh tơbăt, hăm tơdrong tơklep kơjăp đơ̆ng ƀô̆ đô̆i vei lăng sơlam teh đak, bơ̆ jang ‘lơ̆ng chă pơrô̆ pơrôp, pơtho khan, kon pơlei oei tơ̆ tơring sơlam teh đak ling lang băt hlôh ƀôh hơdăh hơnăp vang iung jang vei lăng năng tông sơđơ̆ng, vei lăng năng tông tơdrong pơm tơ-‘ngla groi teh tơring sơlam teh đak. “Tơ̆ au ‘noh bro jih tơring sơlam teh đak, kơna mư̆h bơ̆n ƀôh tơdrong hlĭch au to, pơtih gia ƀôh tơmoi hlĭch mơ̆t ‘nŏh ba năm tơroi hloi ăn hơnih gak dăh mă kơđông ƀô̆ đô̆i vei lăng sơlam teh đak hloi. Tơdrong pơvei dih băl ƀar păh Kơđông ƀô̆ đô̆i vei lăng sơlam teh đak hăm kon pơlei oei tơ̆ au tôch kơ ‘lơ̆ng”.

Groi teh tơring sơlam teh đak Thuận Hạnh đei 13 hơdrung vang hơrih sa. Vă tơ iung pơjing trong jang kon pơlei vang vei lăng sơlam teh đak roi năr roi pran kơjăp iăp kơtang, Kơđông Ƀô̆ đô̆i vei lăng sơlam teh đak Dak Song hlôi pơchoh trong păng atŭm hăm kơdră tơring pơjing păng vei kơ jăp tơdrong jang 9 khul kon pơlei vang vei lăng sơlam teh đak, hơdrơ̆ng hơdrar teh đak păng 11 khul kon pơlei vei lăng sơđơ̆ng kơdih pơlei pơla. Gơnơm vang iung jang kơtang đơ̆ng kon pơlei, kơna dôm sơnăm tơjê̆ au, tơ̆ tơring Thuận Hạnh ưh kơ ƀôh đe chă mơ̆t glăi.

Kiơ̆ đơ̆ng Trung tá Lương Đình Hùng, Chính trị viên Kơđông Ƀô̆ đô̆i vei lăng sơlam teh đak Dak Song, dêh char Dak Nông, xơkơ̆t hơdăh vei lăng năng tông kơjăp iăp kơtang tơring sơlam teh đak ưh khan lăp tơdrong jang hơdrô̆ kơ khul ƀô̆ đô̆i vei lăng sơlam teh đak mă lei oei jing hơnăp jang đơ̆ng pơ đĭ kon pơlei, kăl gơnang lơ̆m jơhngơ̆m pran kơ kon pơlei. Tơklep hăm kon pơlei, hơnih hơnơ̆ng vei lăng năng tông bơ̆ jang oei sa tơpôl, “Vang oei sa jang sa hơdoi” mĭnh nơ̆r ƀơ̆r đon hăm kon pơlei oei lơ̆m tơring sơlam teh đak. Adoi jang ‘lơ̆ng bơ̆ jang pơchoh trong, atŭm hăm kơdră chĕp pơgơ̆r đảng, kơdră chĕp pơgơ̆r tơring atŏk kơtang tơdrong jang đĭ đăng kon pơlei vang vei lăng sơđơ̆ng sơlam teh đak, hơdrơ̆ng hơdrar teh đak, mă kăl hăm ŭnh hnam hơrih sa dăh mă đei teh jang sa tơjê̆ bro sơlam teh đak: “Nhôn sơkơ̆t hơdăh ‘ngoăih rim trong jang bơ̆ jang vei lăng sơlam teh đak ‘nŏh hơnih au kăl gơnang lơ̆m kon pơlei, kon pơlei ‘nŏh tơ-‘ngla lơ̆m vei lăng năng tông sơlam teh đak, ƀô̆ đô̆i vei lăng sơlam teh đak ‘nŏh khul bơ̆ jang tơm hloh. Rim sơnăm ‘noh hơnih iung jang hơdoi hăm kơdră tơring pơgơ̆r lơ tơdrong pơgơ̆r joh ayŏ kơdŏ soang, đă ƀŏng lŏng tơplŏng kơdau păng hop akŏm pơtôch 1 sơnăm jang kiơ̆ tơdrong jang đĭ đăng kon pơlei vang vei lăng sơlam teh đak vă atŭm hăm kon pơlei bơ̆ jang ‘lơ̆ng tơdrong jang vei lăng năng tông tơdrong pơm tơ-‘ngla sơđơ̆ng tơring sơlam teh đak lơ̆m tơring”.

          Kơdră chĕp pơgơ̆r Kơđông Ƀô̆ đô̆i vei lăng sơlam teh đak Dak Song tơbăt dơ̆ng “Đĭ đăng kon pơlei vang vei lăng tơdrong pơm tơm groi teh, vei lăng sơđơ̆ng tơring sơlam teh đak lơ̆m chăl hle” kăl đei tơklep hăm tơdrong jang pơting dih băl ‘mêm kơ eng teh đak hăm tơ iung pơjing tơring tơrang ‘nao, pơtrŭt atŏk tơ iung mŭk drăm, hơtŏk hơrih sa sơđơ̆ng dơ̆ng kơjăp, hơnŭk hơnoa ăn kon pơlei. Khei năr kơnh hơnih gô hơnơ̆ng iung jang hơdoi kơjăp hăm kơdră đảng, kơdră chĕp pơgơ̆r tơring, rim hơnih bơ̆ jang vă chă pơrô̆ pơrôp, pơtho khan, tơgŭm djru kon pơlei atŏk tơ iung muk drăm-tơpôl, xut xa pơngot rơvĕt, tơjur dơnuh, tơgop tơ iung pơjing tơdrong jang đĭ đăng kon pơlei vang vei lăng sơlam teh đak pran kơjăp iăp kơtang.