Atŭm hăm tơdrong  lăng ba vă ưh kơ lê̆ ŭnh hnam ayơ ưh kơ đei Têt đơ̆ng rim kơdră chĕp pơgơ̆r, hơnih bơ̆ jang tơring, lơ ŭnh hnam dơnuh lơ̆m dêh char moei đei dơ̆ng tơdrong chơt hơ iă gĭt kăl hloh dơ̆ng mưh đei sơng Têt lơ̆m pơbŭng hnam ‘lơ̆ng liĕm đơ̆ng Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông jăl jang 2021-2030 đơ̆ng Khul kơdră Teh đak pơm ăn. Sơnăm ‘nao, jơhngơ̆m đon chơt hơ iă ‘nao tŏk bŏk tơgŭm ăn rim ŭnh hnam dơnuh đei dơ̆ng lui kơdih vă yak hlŏh dôm tơdrong tơnap tap atŏk tơ iung choh jang sa vă đei tơdrong hơrih sa phĭ tơtŏ dơnŏ ‘lơ̆ng hlŏh dơ̆ng.

Pơbŭng hnam ‘nao kơ klo akăn ‘nhŏng A Hâm hăm mŏ Y Lược oei tơ̆ pơlei Vi Chring, tơring Hiếu.

          Pha hăm tơ̆ ‘ngoăih tơngiĕt tơngiot, lơ̆m pơbŭng hnam ‘nao kơ klo akăn ‘nhŏng A Hâm, Y Lược oei tơ̆ pơlei Vi Chring, tơring Hiếu, apŭng Kon Plông, dêh char Kon Tum tŏk bŏk chhrŭr tơnŏ hăm jơhngơ̆m đon chơt hơ iă sơng sơnăm ‘nao. Mŏ Y Lược tơbăt, klo akăn mŏ ‘nao “hơchăng” hăm pơbŭng hnam so “găh hơnăp bơbrŏng, găh rŏng hrơ hrêu” ưh kơ đei bing tơnŏ ăn ŭnh hnam lơ̆m dôm năr ‘mi tơngiĕt, tŏk oei tơ̆ hnam hle tơtom sơng Têt. Ŭnh hnam găh ŭnh hnam dơnuh, dôm sơnăm sŏng sa ưh kơ măh tăh sa ưh kơtĕch sơnăm, mă lei dang ei tơdrong hơpơi ‘meh vă đơ̆ng klo akăn mŏ vih hơrih sa lơ̆m pơbŭng hnam kơjăp ‘lơ̆ng hlôi pơm ăn klo akăn mŏ chơ̆t hơ iă ‘nă hal:“Pơbŭng hnam mă blŭng kơ nhôn hiăh hiok đĭ bơih. Dang ei Teh đak tơgŭm djru lơ lau ba chhôk ‘nă dêh. Ba gô hơdrin jang sa vă kĕ yak hloh tơnap tap, đơ̆ng rŏng au gô đei hiôk hian ƀiơ̆ kơ sơ̆”.

         Jei nhen ŭnh hnam ‘nhŏng A Hâm, Y Lược, đei 6 ŭnh hnam dơnuh anai lơ̆m tơring Hiếu atŭm hăm 29 ŭnh hnam dơnuh tơ̆ rim tơring: Đăk Ring, Đăk Nên, Ngọc Tem, Măng Cành, Măng Bút kơ apŭng Kon Plông jei đei tơdrong chơt hơ iă sơng Têt lơ̆m pơbŭng hnam ‘nao ‘lơ̆ng liĕm, kơjăp ‘lơ̆ng. Mŏ Y Hố, mĭnh lơ̆m dôm ŭnh hnam dơnuh đei Teh đak tơgum djru pơm hnam oei tơbăt, kơ yuơ klo jĭ jăn, adoi hơrih sa lơ̆m hnam hiăh hiok kơna lơ sơnăm kơ au ŭnh hnam ưh kơ đei chă pơgơ̆r yă kiơ lơ̆m rim ‘măng Puih mak vih, Têt truh. Mă lei, Têt sơnăm au ‘noh hlôi pha bơih:“Hnam so hiăh hiok, mư̆h ‘mi ‘noh hơ iuh đĭ đăng. Ŭnh hnam dơnuh tim mă byơ̆h pơgơ̆r sa Têt hiă mĭnh ‘măng. Hnam ‘nao ‘noh tơnŏ ƀiơ̆. Đei hnam ‘nao ‘noh pơgơ̆r sa Têt hơ iă dêh. Têt sơnăm au ‘noh ‘nŭng ƀĕng chư̆ng, răt ƀĕng keo chơt hơ iă đei hnam ‘nao”.

Hăm kon jên tơgŭm djru đơ̆ng Kon jên bơ̆ jang Trung ương 40 triu hlak jên, kon jên jang tơring 1 triu hlak jên ăn mĭnh ,pơbŭng hnam, vă ming man đei hnam ‘lơ̆ng kơ jăp ƀlep tơdrong pơkăp ‘noh: “Drơ̆h hơrăng-tơnăr hơrăng-pơbŭng kơjăp”, khul kơdră chĕp pơgơ̆r, khul jang rim tơring hlôi đei lơ trong jang ‘lơ̆ng hơ iă tơgŭm ăn rim ŭnh hnam, nhen: tơgŭm ŭnh hnam găh năr jang; tơgŭm bơ̆n ‘long au to; răt ăn tơmam drăm iŏk yua kơ ‘năr pôk ăn ŭnh hnam kon pơlei. Đei kơdră tơring, tơpôl kon pơlei lăng ba kơjăp rim unh hnam pơ̆n chă tŏk iŏk dơ̆ng 40 triu hlak jên hăm jên cheh tŏ sĕt kiơ̆ Tơdrong tơchơ̆t 28 đơ̆ng khul kơdră Teh đak vă pơbŭng hnam kơ ŭnh hnam să ƀiơ̆, kơjăp hloh dơ̆ng. Ƀok A Thảo, Kơ iĕng Kơdră chĕp pơgơ̆r Hơnih vei lăng kon pơlei tơring Hiếu, apŭng Kon Plông tơbăt, gơnơm lơ loh dôm pơbŭng hnam ‘nao kơ ŭnh hnam dơnuh Têt au jei đei dơ̆ng jơhngơ̆m đon chơt hơ iă ‘nă hal kơ yuơ đei kon pơlei pơla lăng tông nông gia dih băl ‘lơ̆ng hơ iă:“Teh đak tơgŭm djru, kon pơlei tŏk iŏk dơ̆ng. Ŭnh hnam đei ‘nhŏng oh ‘noh vang iung jang vă tơgŭm ăn ŭnh hnam dơnuh. Lơ̆m au mă kăl ‘noh đei Đoàn hơdruh tơdăm tơgŭm chă chơ bơ̆n chuơ̆h, tơmo vang tơgŭm djru vă kon pơlei đei pơbŭng hnam tơnŏ ‘lơ̆ng”.

Sơnăm 2023 au ki, dêh char Kon Tum hlôi tơlĕch đei 35 ti hlak jên tơgŭm djru ŭnh hnamn dơnuh, vă jê̆ dơnuh ming man ‘nao păng ming hơmet hnam oei. Lơ̆m au đei 174 ŭnh hnam tim mă đei hnam oei dăh mă hnam oei hiăh hiok tơ̆ 3 apŭng: Kon Plông, Ia H’Drai, Tu Mrông đei hnam ‘nao tơtom sơng Têt lơ̆m pơbŭng hnam kơjăp ‘lơ̆ng gei kơjăp đơ̆ng 20 sơnăm năm tơ̆ đunh. Ƀok U Minh Nam, Kơ iĕng Kơdră chĕp pơgơ̆r Hơnih vei lăng kon kông dêh char Kon Tum tơbăt, lơ̆m sơnăm au păng sơnăm 2025 dêh char Kon Tum tơlĕch vă tơgŭm djru 350 ŭnh hnam dơnuh, vă jê̆ dơnuh pơm hnam oei. Vă tơdrong chơt hơ iă hrôih vih hăm dôm ŭnh hnam tơnap tap kăl sơng iŏk đei tơdrong tơgŭm djru, đơ̆ng blŭng sơnăm 2024 hloi, Hơnih vei lăng kon kông dêh char Kon Tum hlôi tơlĕch jang kiơ̆ tơdrong jang au:“Rim hơnih bơ̆ jang, tơring hlôi akŏm tơlĕch jang kiơ̆ dăr lăng, xơkơ̆t hơdăh tơdrong ‘meh vă, rim bơngai vă hơnơ̆ng pơjing trong pơprŏ jang kiơ̆ lơ̆m sơnăm 2024- 2025. Hơdrin jang keh đang păng keh đang hloh trong pơkăp tơgŭm djru hnam oei ăn ŭnh hnam dơnuh, kon pơlei kon kông păng ŭnh hnam dơnuh hơdrung Yuăn hơrih sa lơ̆m tơring, pơlei tơnap tap hloh kiơ̆ tơdrong tơchơ̆t”.

Đơ̆ng tơdrong lăng ba đơ̆ng Đảng, Teh đak, rim hơnih bơ̆ jang tơring atŭm hăm jơhngơm đon ‘mêm kơ eng dih băl đơ̆ng kơtum kơtŏng ‘nhŏng oh, Têt au rim ŭnh hnam dơnuh tơ̆ dêh char Kon Tum đei dơ̆ng lơ tơdrong chơt hơ iă ‘nă hal. Dôm pơbŭng hnam ‘nao kơjăp ‘lơ̆ng nhen lĕ tŏk bŏk pơm hơtŏk loi dơ̆ng jơhngơ̆m pran păng tơgŭm ăn kon pơlei lui kơjăp tơ̆ hơnăp jăl trong mơ̆t lơ̆m sơnăm ‘nao Giáp Thìn 2024 hăm tơdrong pơ̆n, lui kơjăp tơ̆ hơnăp yak hloh tơnap tap lơ̆m choh jang sa vă đei tơdrong hơrih sa phĭ tơtŏ dơnŏ ‘lơ̆ng, hơnuk hơnoa.