Dôm sơnăm au ki, tơdrong jang “Puih mak sơlam teh đak-Chhơp jơhngơ̆m đon pơlei” đei khul Ƀô̆ đô̆i vei lăng sơlam teh đak dêh char Gia lai tơlĕch jang tơ̆ rim tơring sơlam teh đak apŭng Ia Grai, Đức Cơ, Chư Prông kơ Gia Lai. 

Tơ̆ rim ‘măng pơgơ̆r, rim ƀô̆ đô̆i vei lăng sơlam teh đak atŭm hăm kon pơlei chă ‘nŭng ƀĕng chư̆ng, tôn chĭng chêng, joh hơri vă tơgoăt kơjăp jơhngơ̆m đon tơgoăt tơgoăl dih băl ƀô̆ đô̆i-kon pơlei. Atŭm hăm ‘noh, rim bơngai đei jơhngơ̆m đon ‘lơng pơgơ̆r dôm hơdrơ̆r tĕch mơdro tơmam drăm 0 hlak jên, pôk ăn kon ơlei kơ hrĕng tơmam drăm ‘noh khăn buk, kơƀŭng, phe, kơsơ̆p hla bơar hŏk, hla bơar chih, tơmam drăm hok pơhrăm ăn hŏk tro. Đại tá Nguyễn Văn Nghị - Kơ iĕng chĕp pơgơ̆r jang Chinh trĭ kơ Hơnih chĕp pơgơ̆r Ƀô̆ đô̆i vei lăng sơlam teh đak dêh char Gia Lai pơma: “Kon pơlei tôch chơt hơ iă, lui kiơ̆ kơjăp hăm khul ƀô̆ đô̆i pơma atŭm, hăm ƀô̆ đô̆i vei lăng sơlam teh đak pơma hơdrô̆, adoi tơgoăt kơjăp tơgoăt tơgoăl dih băl ƀô̆ đô̆i kon pơlei, đei tơdrong yă kiơ jei tơgum djru dih băl ngăl; ‘Nau jei jing jơhngơ̆m pran vă kon pơlei vang tơklep kơjăp dih băl ƀar păh pơlei, jang kiơ̆ ‘lơ̆ng trong bơ̆ jang đơ̆ng Đảng păng Teh đak lơ̆m tơ iung pơjing hơrih sa ‘lơ̆ng lơ̆m pơlei pơla".

          Lơ̆m dôm năr blŭng sơnăm 2024, dôm tơdrong jang ‘lơ̆ng hơ iă, git kăl đơ̆ng rim kơđông ƀô̆ đô̆i vei lăng sơlam teh đak tơlĕch, hlôi tơgŭm ăn kon pơlei sa roi chơt hơ iă ‘nă hal, chơt hơ iă hloh dơ̆ng. Yă Nguyễn Thị Lành - Kơ iĕng Kơdră chĕp pơgơ̆r Đảng apŭng Ia Grai, dêh char Gia Lai tơbăt:“Tơ̆ yơ đei ƀô̆ đô̆i vei lăng sơlam teh đak ‘nŏh tơ̆ noh kon pơlei đei tơdrong hơrih sa phĭ tơtŏ hơnŏ ‘lơ̆ng, hơnŭk hơnoa. Ƀô̆ đô̆i vei lăng sơlam teh đak hlôi pơtho ăn kon pơlei atŏk tơ iung mŭk drăm, ‘long pơtăm, kon tơrong, tơ iung pơjing hơrih sa ‘lơ̆ng hơ iă tơ̆ pơlei pơla; mă kăl pơtho ăn kon pơlei lơ̆m chă pơkom, pơm tơplih jơhngơ̆m đon tơchĕng, trong jang sa vă yak hloh dơnuh hin kơjăp ‘lơ̆ng".

Tơ̆ tơring sơlam teh đak Krông Na, apŭng Buôn Đôn, dêh char Dak Lăk, Ƀô̆ đô̆i vei lăng sơlam teh đak Dak Lăk iung jang hơdoi hăm rim hơnih jang lơ̆m tơring pơgơ̆r “Puih mak sơlam teh đak chhơp jơhngơ̆m pơlei pơla-Têt Giáp thìn 2024. Đơ̆ng pơgê hrôih hloi, kơ hrĕng kon pơlei oei lơ̆m tơring Krông Na păng tơring tơjê̆ luh năm tơ̆ Hnam pơgang tơring Krông Na, hơnih bơ̆ jang kơ Hơnih vei lăng kon pơlei tơring vă vang năm năr lêh. Kon pơlei đei khăm jĭ jăn, ƀơk ăn pơgang; sơng iŏk nơ̆r hmach têt, ƀĕng chư̆ng, tơmam drăm Têt, kon jên hŏk pơhrăm ăn hŏk tro đơ̆ng khul ƀô̆ đô̆i vei lăng sơlam teh đak păng dôm bơngai đei jơhngơ̆m đon ‘lơ̆ng ….  Atŭm hăm ‘noh, kon pơlei đei mơ̆ng nơ̆r pơtho tơbăt iung jang hơdoi hăm khul ƀô̆ đô̆i vei lăng sơlam teh đak vang jang vei lăng hơdrơ̆ng sơlam, trong sơlam teh đak păng vei lăng sơđơ̆ng dơ̆ng kơjăp tơring sơlam kơ teh đak. ‘Nhŏng Y Quyết Êban (hơdrung M’nông, kon pơlei oei lơm ƀuôn Trí A, tơring Krông Na, apŭng Buôn Đôn tơbăt, dôm tơmam drăm păng rim tơdrong pơgơ̆r đơ̆ng kang ƀô̆ ƀô̆ đô̆i vei lăng sơlam teh đak dêh char Dak Lăk hlôi pơm tơnŏ jơhngơ̆m đon kon pơlei lơ̆m jơ ‘năr Têt truh, Puih mak vih:“Vang năm lơ̆m năr lêh “Puih mak sơlam teh đak chhơp jơhngơm đon kon pơlei” kon pơlei bơ̆n tôch chhôk hơ iă ‘nă hal. Păh khul chĕp pơgơ̆r hlôi pơgơ̆r rim tơdrong pơchơt pơ hiơ̆ sơ̆ ki, khăm jĭ păng ƀơk ăn pơgang, pôk ăn ƀĕng chư̆ng, tơmam drăm Têt … ‘Moi kiơ̆ lơ̆m năr lêh au, kon pơlei đei chă tơƀơ̆p, hŏk pơhrăm, tơklep kơjăp dih băl kơ ƀô̆ đô̆i-kon pơlei, đei lơ tơdrong chơt hơ iă hloh dơ̆ng rim ‘măng Têt truh puih mak vih.”

Tơdrong pơgơ̆r “Puih mak sơlam teh đak-Chhơp jơhngơ̆m đon kon pơlei” ‘noh tơdrong jang hơnơ̆ng đơ̆ng Hơnih chĕp pơgơ̆r Ƀô̆ đô̆i vei lăng sơlam Teh đak dêh char, vă tơgŭm ăn kon pơlei rim tơring sơlam teh đak đei năr Têt chơt hơ iă ‘nă hal hloh dơ̆ng; adoi pơm kơjăp hloh dơ̆ng tơdrong tơgoăt tơgoăl dih băl ƀô̆ đô̆i kon pơlei oei tơ̆ tơring sơlam teh đak; hơlêm kon pơlei rim hơdrung, kang ƀô̆, ƀô̆ đô̆i tơring sơlam teh đak hơnơ̆ng tơgoăt tơgoăl pôm nơ̆r ƀơ̆r đon, vang kơrŭn đĭ jơhngơ̆m jang kiơ̆ vei lăng năng tông pơm tơ-‘ngla tơring sơlam teh đak kơ pơlei pơla. Tơdrong pơgơ̆r “Puih mak sơlam teh đak-Chhơp jơhngơ̆m đon kon pơlei” đei Ƀô̆ đô̆i vei lăng sơlam teh đak dêh char Dak Lăk tơlĕch jang đơ̆ng năr 13/1 truh năr 4/2, tơ̆ 4 tơring ‘noh Krông Na kơ apŭng Buôn Đôn, rim tơring Ea Bung, Ia R’vê păng Ia Lốp kơ apŭng Ea Sŭp. Lơ̆m jơ ‘năr au, gô đei rơbau tơnô̆ tơmam drăm kơjă kơjên 752 triu hlak jên pôk ăn rim ŭnh hnam oei tơ̆ tơring sơlam teh đak dêh char Dak Lăk. Đại tá Đỗ Quang Thấm - Kơdră chĕp pơgơ̆r jang Chinh trĭ Ƀô̆ đô̆i vei lăng sơlam teh đak dêh char Dak Lăk tơbăt:“Sơnăm 2024 ‘noh nhôn gô pơgơ̆r “Puih mak sơlam teh đak chhơp jơhngơ̆m đon kon pơlei” tơ̆ rim tơring sơlam teh đak kơ dêh char Dak Lăk. Trong tơlĕch jang đơ̆ng nhôn ‘noh sơnăm au gô pơgơ̆r hrôih, hăm trong tơlĕch ăn ưh kơ lê̆ bơngai bu oei tơ̆ tơring sơlam teh đak hơchăng hŭt tơ̆ rŏng, ưh kơ đei Têt. Đơ̆ng noh, chă tơgŭm ăn kon pơlei oei tơ̆ tơring sơlam teh đak dă ƀiơ̆ tơnap tap, pơm sơđơ̆ng hơrih sa tơ klep kơjăp hăm tơring sơlam teh đak, vang iung jang hơdoi hăm khul ƀô̆ đô̆i vei lăng năng tông kơjăp tơdrong pơm tơm kơdih sơlam teh đak kơ teh đak.”