Quân đoàn 3 đei pơjing lơ̆m năr 26/3/1975 ‘moi kiơ̆ akŏm đĭ đăng khul bô̆ đô̆i tơm dơnơm lơ̆m kơdrăn tơblăh Tây Nguyên jing Quân đoàn tơm dơnơm hloh. Quân đoàn 3 hlôi tơƀôh hơdăh hơnăp jang ‘noh hơnih tơm dơnơm, tơgop tih tên lơ̆m pơm rơngei Tây Nguyên păng yak truh pơm rơngei ăn tơring Pơbăh, teh đak rơngei keh kong lơ̆m năr 30/4/1975. Quân đoàn jei iung tơblăh vei lăng kơjăp iăp kơtang tơring sơlam teh đak tơring Pơmơ̆t pơbăh, Pơmơ̆t Tu păng vang iung jang tơdrong jang apŭng plĕnh teh tơgŭm ăn kon pơlei Campuchia yak hloh tơdrong pơlôch rŭng đơ̆ng khul Pol Pot. 

Lơ̆m khei năr pơjing păng tơ iung pơjing, vei lăng Teh đak, Quân đoàn 3 hlôi tơklep kơjăp iăp kơtang hăm khul kơdră đảng, kơdră chĕp pơgơ̆r tơring păng kon pơlei rim hơdrĕch hơdrung mă hơnih au oei; tơgop git kăl lơ̆m tơdrong atŏk tơ iung muk drăm, vei lăng sơđơ̆ng teh đak kơ Gia Lai pơma hơdrô̆, rim dêh char tơ̆ Tây Nguyên pơma atŭm.

Hăm dôm tơdrong jơnei tih tên păng iŏk đei jơnei kơtang lơ̆m ‘măng tơblăh vang păng lơ̆m ‘măng tơ iung pơjing păng vei lăng Teh đak, Quân đoàn 3 đei Đảng păng Teh đak pôk ăn hơnăn Ƀô̆ đô̆i kon pơlei nuih mơng pran kơtang lơ̆m năr 20/12/1979; đei pôk ăn 3 Mê đai Hồ Chí Minh, 57 Mê đai Quân công, 242 Mê đai jơnei pran kơtang rim tơdrong jang atŭm hăm lơ tơmam hơpăh gĭt kăl anai; đei Teh đak Camphuchia pôk ăn Mê đai Ăng Co; 81 khul păng 47 ‘nu bơngai đei Đảng, Teh đak pôk ăn hơnăn Ƀô̆ đô̆i kon pơlei nuih mơng pran kơtang. Lơ̆m au đei 9 khul đei pôk pơ ư Ƀô̆ đô̆i nuih mơng pran kơtang mă ƀar; Lữ đoàn CB7 păng Trung đoàn BB66 đei pôk ăn hơnăn Ƀô̆ đô̆i nuih mơng pran kơtang ‘măng mă pêng lơ̆m chăl tơplih ‘nao.

Kiơ̆ yok rok jơ̆ng joăt joe pran kơtang, hlŏh 49 sơnăm tơ iung pơjing, iung tơblăh păng atŏk tơ iung, kang ƀô̆, ƀô̆ đô̆i Quân đoàn 3 ling lang pơkăp mĭnh nơ̆r ƀŏr đon hăm Đảng, hăm Teh đak păng Kon pơlei, kiơ̆ yok kơjăp jơhngơm đon ‘lơ̆ng kơ Ƀô̆ đô̆i Ƀok Hô, chih tơmơ̆t dơ̆ng dôm tơdrong jang jơnei pran kơtang vă pơm hơtŏk iŏk đei jơnei tih tên dơ̆ng 12 chư măih: “Hơdrin jơnei, tơchăr hơgei, tơgoăt tơgoăl, lăp mĭnh ƀơ̆r đon, jang ‘lơ̆ng, nŏng kơtang” kơ quân đoàn nuih mơng pran kơtang tơ iung pơjing Quân đoàn pran kơjăp iăp kơtang tôm tong.

Iung pơma tơ̆ jơ tơƀơ̆p muh măt, Trung tướng Nguyễn Doãn Anh hmach chơt hơ iă  ăn dôm tơdrong jơnei, iŏk đei kơtang đơ̆ng Quân đoàn 3, adoi athei hơnih au lơ̆m khei năr kơnh, hơnơ̆ng tơlĕch jang kiơ̆ kơtang rim trong bơ̆ jang đơ̆ng Đảng, Teh đak găh jang khul lĭnh, vei lăng teh đak. Lăng kơjăp jang ‘lơ̆ng pơtho pơhrăm chinh trĭ jơhngơ̆m đon, pơm hơtŏk jơhngơm đon joăt joe nuih mơng pran kơtang kơ Quân đoàn lơ̆m jăl ‘nao, pơm jŭk yŭk trong hơlau lơ̆m jang kiơ̆ trong tơlĕch jang đơ̆ng Quân ủy Trung ương, Hơnih tơm Ƀô̆ đô̆i vei lăng sơnam teh đak sơnăm 2024. Trung tướng Nguyễn Doãn Anh- Kơdră jang lơ̆m TƯ Đảng, Kơ iĕng kơdră bơ̆ jang pơchoh trong Khul Ƀô̆ đô̆i Kon pơlei Việt Nam pơma hơdăh:“Inh lui akhan, kang ƀô̆, ƀô̆ đô̆i Quân đoàn 3 gô kơrŭn đĭ jơhngơ̆m, iŏk đei jơnei tih tên hloh dơ̆ng lơ̆m rim tơdrong jang, atŭm hăm kơdră đảng, kơdră chĕp pơgơ̆r tơring păng Kon pơlei tơring tơ iung pơjing tơring kăl Tây Nguyên păng Quân khu 5 pơdrŏng găh mŭk drăm, pran kơtang găh chinh trĭ, vei kơjăp sơđơ̆ng teh đak-sơđơ̆ng dơ̆ng kơjăp; tơgop atŭm hăm Đảng, kon pơlei, ƀô̆ đô̆i tơ iung pơjing jơnei păng vei lăng kơjăp iăp kơtang Teh đak Việt Nam XHCN lơ̆m chăl ‘nao”.

Trung tướng Nguyễn Doãn Anh jei athei Quân đoàn lăng kơjăp pơm hơtŏk ‘lơ̆ng sơđơ̆ng bơ̆ jang pơvih pơvăn, kih thuơ̆t ăn rim tơdrong jang; jang kiơ̆ ‘lơ̆ng trong jang “mŭk drăm sơđơ̆ng-ƀô̆ đô̆i pran kơtang”, atŏk kơtang choh jang sa, jang kiơ̆ kơjăp pơkom, lăng ba kơjăp hơrih sa sơđơ̆ng dơ̆ng kơjăp ăn ƀô̆ đô̆i; tơlĕch jang kiơ̆ jơnei bơ̆ jang pơrô̆ pơrôp kon pơlei, mă kăl tơ̆ tơring atăih yăih, tơring tơnap tap hloh, tơgop tơ iung pơjing đei jơhngơ̆m đon kon pơlei sơđơ̆ng dơ̆ng kơjăp.