Sơnăm 2023, jên pơm kiơ̆ Tơchơ̆t jang kơ teh đak găh hơtŏk tơ-iung tơring kon pơlei kon kông păng groi kông asong ăn dêh char Quảng Nam hloh 782 ti hlj.

Lơ̆m sơnăm 2022 păng jăl I sơnăm 2023, tơdrong tơlĕch pơm kiơ̆ Tơchơ̆t jang âu tŏk bŏk oei ƀơm tơnap tap. Tơdrong tơm noh dôm anih jang Trung ương adar tơlĕch hla bơ-ar pơtho pơm jang, rim tơring oei pơngơ̆t kơ đon lơ̆m tơdrong iŏk pơm jang. Kiơ̆ kơ ƀok Nguyễn Công Thành, Kơ-iĕng kơdră Anih jang Pơtho Pơhrăm dêh char Quảng Nam, lơ tơchơ̆t pơm jang ‘măn ăn đe hŏk tro tơring groi kông kiơ̆ Tơdrong tơchơ̆t pơtho pơhrăm lơ̆m Tơchơ̆t jang kơ teh đak găh hơtŏk tơ-iung mŭk drăm – tơpôl tơring kon pơlei kon kông păng groi kông kơ dêh char oei ƀơm lơ tơhlăk tơhlĭn: “Lơ̆m atŭm 1 hnam trưng hŏk, 1 lăm hŏk, lơ đe hŏk tro tơ-oei atŭm 1 kơƀang hăm dih băl mă 1 oh ‘noh đei sa tơgŭm đơ̆ng Trung ương, 1 oh đei sa tơgŭm đơ̆ng tơring đĕch, ‘noh ưh kơ ƀlep ôh. Nhôn pơtruh nơ̆r, dăh hơmet tơchơ̆t thoi yơ vă gơh đei sa tơgŭm hơtŏ hơnơ̆ng hloh”

Ƀok Lê Văn Dũng, Kơ-iĕng Ƀĭ thư Juăt jang anih jang Đảng dêh char Quảng Nam tơroi kơ minh ƀar tơdrong tơnap tap tơ̆ tơring groi kông ăh iŏk jang kiơ̆ tơchơ̆t nhen kơsô̆ unh hnam hin dơnuh oei lơ, tơdrong hơrih kon pơlei oei ƀơm tơnap tap, noh tơdrong asong tơgŭm iŏk jang kiơ̆ tơlĕch jang oei kơđeh. Atŭm hăm noh, tơdrong kloh klĕch đơ̆ng kang ƀô̆ pơm jang tơ̆ tơring groi kông tam mă trŏ ƀlep hăm tơdrong pơkăl đơ̆ng tơlĕch pơm jang. Ƀok Lê Văn Dũng pơtruh nơ̆r:“Athei pơm ƀônh hla bơ-ar pơkăp lơ̆m tơdrong tơlĕch jang, kơlih dang ei hla bơ-ar pơm jang ưh đei bot. Tơdrong kiơ mă gơh asong tăl jang noh pơkăp ăn dêh char, ăn apŭng, ăn tơring noh Trung ương athei tơlĕch tơchơ̆t asong kiơ̆ tăl pơm jang”

Pơma ăh jơ bơ̆ jang, ƀok Hầu A Lềnh, Ƀô̆ trương – Kơdră Anih jang găh Kon pơlei kon kông chih akŏm nơ̆r pơtruh, pơkăl đơ̆ng dêh char Quảng Nam. Lơ tơnap tap, tơhlăk tơhlĭn đei ƀôh lơ̆m tơlĕch jang kiơ̆ Tơchơ̆t kơ teh đak găh hơtŏk mŭk drăm – tơpôl tơring kon pơlei kon kông păng groi kông gô đei Khul Kơpal pơm jang kơ Jơnŭm pơgơ̆r teh đak dăh hrôih đei trong jang vă pơklaih tơnap tap. Ƀok Hầu A Lềnh pơkăl dêh char Quảng Nam dăh kơchăng jang hadoi kơjăp hăm rim Anih jang tơm, anih jang Trung ương lơ̆m tơdrong chă trong pơklaih tơnap tap, hơmet tơchơ̆t tơlĕch jang: “Tơdrong kiơ mă oei lơ̆m sơnong jang kơ trung ương noh trung ương athei jang, athei pơklaih. Thủ tướng Teh đak hlôi pơjao ăn dôm Anih jang tơm, anih jang akŏm hơmet pơ-‘lơ̆ng. Đei 3 grŭp tơdrong jang athei jang: Grŭp mă mônh noh pơklaih tơnap tap, grŭp mă 2 noh sek tơlang dôm tơdrong oei tơsŭl tơsăl păng grŭp mă 3 noh hơmet mă tôm dôm tơdrong kiơ tam mă đei”.