Việt Nam păng Lào đei trong sơlam teh đak hơdoi hơtăih 2.340km găn hloh 10 dêh char kơ Việt Nam păng 10 dêh char kơ Lào. Ƀar păh đei 8 ‘măng sơlam apŭng plĕnh teh, 7 ‘măng sơlam teh đak, 18 trong yak kloh klĕch dih băl păng hơnih jang mŭk drăm gĭt kăl.

Tơ̆ pơma dơnuh rim sĩ quan sơnăm mơlôh Ƀô̆ đô̆i vei lăng sơlam Teh đak Việt Nam hăm Hơnih vei lăng sơđơ̆ng, Kanh sát găh Hơnih tơm Kŏng ang Lào vang hơlen pơtôch jang hơdoi lơ̆m khei năr ou ki. Sơkơ̆t hơdăh hơnăp jang kăl kơ khul sĩ quan sơnăm mơlôh lơ̆m pơchoh trong, vei kơjăp bơ̆ jang hơdoi tơlĕch jang kiơ̆ rim tơdrong jang. Thượng uý Nguyễn Văn Quang, Jang tơgŭm bơ̆ jang vei lăng kon pơlei, Khul pơtho pơhrăm, Hơnih bơ̆ jang Chinh trĭ, Ƀô̆ đô̆i vei lăng sơlam teh đak dêh char Kon Tum, tơbăt:“Đei vang năm pơma dơnuh ‘noh jĭ rơvơn vă kơ ĭnh păng khul sĩ quan sơnăm mơlôh tơƀơ̆p dih băl, pơma dơnuh dih băl păng pơm hơtŏk jơhngơ̆m đon bơ̆ jang hơgei, atŏk kơtang hloh dơ̆ng bơ̆ jang vei lăng năng tông sơlam teh đak. Đơ̆ng pơgơ̆r ou, kơdih ĭnh ƀôh ‘noh kăl iung jang hơdoi kơjăp hloh dơ̆ng hăm khul  sĩ quan mơlôh teh đak boăl Lào, đơ̆ng nŏh tơtom đei ƀôh dôm tơdrong hơlĕnh pơdăr, tơchă trong đơ̆ng rim bơngai pơm yoch vă tơtom pơchoh trong ăn kơdră chĕp pơgơ̆r tơlĕch rim trong jang, trong tang găn rim tơdrong đe pơm glăi”.

Đơ̆ng blŭng sơnăm 2023 truh dang ei, rim sĩ quan sơnăm mơlôh Ƀô̆ đô̆i vei lăng sơlam teh đak Việt Nam păng sĩ quan mơlôh Hơnih vei lăng sơđơ̆ng, Kanh sát găh Hơnih tơm Kŏng ang Lào hlôi pơm hla bơar ăn 499 khul kang ƀô̆ ƀar teh đak mơ̆t lĕch dih băl bơ̆ jang; iung jang hơdoi năm pơtrui 264 ‘măng hăm rơbou ‘nu kang ƀô̆, ƀô̆ đô̆i vang năm; iung jang hơdoi druh rôp, xek tơlang hloh 1.500 ‘măng hăm 2.400 ‘nu bơngai pơm glăi...

Kiơ̆ đơ̆ng Đăi tă Nguyễn Thanh Hải, Kơ iĕng kơdră Hơnih jang Chinh trĭ Ƀô̆ đô̆i vei lăng sơlam teh đak Việt Nam, khul sĩ quan sơnăm mơlôh ‘noh jơhnơr kiơ̆ yok rok jơ̆ng khul ƀô̆ đô̆i ƀar teh đak, rim tơdrong pơgơ̆r tơƀơ̆p pơma dơnuh dih băl jĭ tôch gĭt kăl lơ̆m tơdrong vei răk tơƀăk mong tơdrong tơgoăt tơgoăl dih băl joăt joe ‘lơ̆ng hơ iă đơ̆ng sơ̆, tơgoăt tơgoăl gĭt kăl Việt Nam- Lào:“Tơƀơ̆p pơma dơnuh dih băl sĩ quan sơnăm mơlôh Ƀô̆ đô̆i vei lăng sơlam teh đak Việt Nam păng sĩ quan mơlôh Hơnih vei lăng sơđơ̆ng, Kanh sát găh Hơnih tơm Kŏng ang Lào năr ou ‘noh tơƀôh hơdăh jang lơ tơdrong lơ̆m iung jang hơdoi ƀar păh Khul kơdră chĕp pơgơ̆r Ƀô̆ đô̆i vei lăng sơlam teh đak Việt Nam păng Hơnih vei lăng sơđơ̆ng, Kanh sát găh Hơnih tơm Kŏng ang Lào. Tơƀôh hơdăh tơdrong lăng ba, lui kiơ̆ kơjăp jơhnơr mơlôh ƀar khul đei tơƀơ̆p pơma dơnuh dih băl, adoi tơbăt dơ̆ng dôm tơdrong joăt joe nuih mơng pran kơtang, ‘lơ̆ng hơ iă kơ tơgoăt tơgoăl Việt Nam- Lào”.

Kơdră chĕp pơgơ̆r ƀar khul hlôi drơ̆ng mĭnh nơ̆r mĭnh ƀar tơdrong păng pơchoh trong ăn rim tơdrong jang tơm lơ̆m khei năr kơnh hăm khul sĩ quan sơnăm mơlôh Ƀô̆ đô̆i vei lăng sơlam teh đak Việt Nam păng sĩ quan mơlôh Hơnih vei lăng sơđơ̆ng, Kanh sát găh Hơnih tơm Kŏng ang Lào. Lơ̆m ou, lăng kơjăp atŏk kơtang tơbăt dih băl kơtơ̆ng ang đei ƀơm truh, iung jang hơdoi, vei kơjăp bơ̆ jang ‘lơ̆ng, kơjăp Tơdrong pơkăp găh Tơdrong tơchơ̆t vei lăng sơlam teh đak păng ‘măng sơlam teh đak tơ̆ groi teh ƀar păh Khul kơdră chĕp pơgơ̆r teh đak Cộng hòa xã hội chủ nghĩa Việt Nam hăm Khul kơdră chĕp pơgơ̆r Cộng hòa dân chủ nhân dân Lào; vei lăng, dăr lăng, mơ̆t, lĕch, mơ̆t oei, chă yơ yak kơ kon pơlei teh đak kơdih; iung jang hơdoi tang găn hơlau, iung tơjră phă tơrăm kĕ rim khul yoch, pơjing sơđơ̆ng dơ̆ng kơjăp păng pơjing rơvơn ăn kon pơlei păng rim hơnih mơdro sa ƀar teh đak yak mơ̆t klŏh klĕch ‘măng sơlam teh đak, tơring sơlam teh đak, jang hơdoi atŏk tơ iung mŭk drăm, pơgơ̆r joh ayŏ kơdŏ soang, năm ngôi dih băl.

Hơdrol kơ ‘noh, khul tang măt sĩ quan ƀar păh hlôi pơgơ̆r rim tơdrong jang pơtăm ‘long ƀlŏk hơdơ̆r; pôk ăn kon jên hŏk pơhrăm ăn hŏk tro dơnuh hơdrin hŏk pơhrăm; pơrô̆ pơrôp, pơtho tơbăt khôi luơ̆t ăn kon pơlei ƀar păh sơlam teh đak găh dêh char Kon Tum (Việt Nam) păng dêh char Attapư (Lào); pơgơ̆r pơlong joh ayŏ kơdŏ soang, đă ƀŏng lŏng tơplŏng kơdou, năm tơmang pơhiơ̆ mĭnh ƀar hơnih tơmang pơhiơ̆, hơnih oei sa jŏh ayŏ git kăl dăr sơnăm kơ hơdrĕch hơdrung lơ̆m pơlei tơm Kon Tum.