Phường Vĩnh Phước jĭ 1 lơ̆m dôm phường tơter đak dơ sĭ kơ thĭ xăh Vĩnh Châu. Lơ sơnăm âu ki, Đảng bộ phường ling lang lăng kăl tơdrong jang hơtŏk tơiung đảng viên, lơ̆m noh đei tơmơ̆t đảng viên ‘noh bơngai kon kông.

Phŏ Bí thư Anih jang Đảng phường Vĩnh Phước Nguyễn Thanh Tùng tơbăt, rim sơnăm, kiơ̆ lơ̆m tơdrong tơlĕch jang, tơchơ̆t pơjao tơdrong hơgăt kŭm nhen dôm hla ar athei đơ̆ng anih jang đảng thĭ xăh găh tơdrong jang hơtŏk tơiung đảng viên, Anih jang Đảng phường hlôi akŏm tơlĕch jang lơ trong jang vă hơtŏk lơ kơ sô̆, tơdrong ‘lơ̆ng tơ mơ̆t đảng viên; lơ̆m noh, pơjing tơlĕch ăn dôm hla ar athei, tơchơ̆t pơjao tơdrong hơgăt tơmơ̆t đảng viên mă hơdăh ăn chi bộ iŏk đơ̆ng blŭng sơnăm; hơdai hăm jang ‘lơ̆ng tơdrong jang proh hơmet hơdrol bơngai vă hơtŏk tơiung đảng viên:

Bơngai nhôn lăng kăl truh đoàn viên, bơngai jang lơ̆m khŭl, đang kơ 'noh kon pơlei hơgei, mă loi ‘noh bơngơ̆t truh bơngai kon kông lơ̆m phường. Pơtôch dăr hơlen chih tơmơ̆t dơ̆ng proh hơmet hơdrol. Găh proh hơmet hơdrol kơ sơnăm 2022 ‘noh akŏp kơ sô̆ 27 ‘nu kon pơlei, ăn năm hŏk pơhrăm ming dôm lăm đei 21. Pơtôch ‘noh nhôn hơtŏk tơiung đảng viên  17/16 pơtêng hăm tơdrong hơgăt pơjao, iŏk đei 106%, lơ̆m noh, đảng viên ‘noh bơngai kon kông đei 9 ‘nu, đei hloh 52%.

Dôm lăm đảng viên mơ lôh tơ̆ Phường Vĩnh Phước tă kơ đei pơhrăm, jang đei đơ̆ng tơring. Kiơ̆ đơ̆ng dôm tơdrong jang đơ̆ng dôm anih jang đoàn, khŭl, lơ bơngai hơgei hlôi đei roi tơƀôh păng đei tơmơ̆t lơ̆m Đảng. Mŏ Ngô Thảo Trang ‘noh jĭ Bí thư Chi đoàn Khóm Xẻo Me, phường Vĩnh Phước, thĭ xăh Vĩnh Châu. Mŏ Trang ‘noh jĭ drŏ kăn chĕp kơ̆l hơdruh tơdăm ling lang kơchăng kiơ̆ lăng tơring, tơchă lơ trong jang akŏm hơdruh tơdăm, pơtho pơgơ̆r tơdrong jang. Sư ling lang lăng kăl pơvei păng hơtŏk ‘lơ̆ng hŏk pơhrăm tơ̆ chi đoàn, tơtom băt hơdăh tơdrong hơ pơi ‘meh vă đơ̆ng đoàn viên, hơdruh tơdăm. Đơ̆ng noh, sư hlôi hơdai hăm tơring pơgơ̆r lơ tơdrong jang hơdăh ‘lơ̆ng păng đei yua lơ̆m dôm tơdrong jang nhen: tơdrong jang Hơdruh tơdăm năm jang tơgŭm, plang song pham, tơdrong jang băt bơnê, iung jang hơtŏk tơiung mŭk drăm... Hloh 2 sơnăm bơ̆jang păng pơhrăm kơdih, mŏ Trang đei proh hơmet tơmơ̆t đảng. Mŏ Ngô Thảo Trang chhôk hơiă tơroi:

Dang ei oh hlôi hŏk đang lăm hlôh vao găh Đảng, tơ̆ hơnăp kơnh ‘noh oh gô ưh kơ pơdơh hơtŏk ‘lơ̆ng tơdrong hlôh vao, hŏk pơhrăm dôm tơdrong jang găh chĭnh trĭ vă pơm ‘lơ̆ng kơ dih kâu hloh păng jang đang ‘lơ̆ng hloh hơnăp jang đei pơjao vă đei dơ̆ng lơ̆m khŭl Đảng.

Jĭ tơring đei lơ bơngai kon kông kơ dêh char Sóc Trăng, bơngai Khmer đei hloh 52%, bơngai Hoa đei hloh 17% kơ sô̆ kon pơlei lơ̆m thĭ xăh, lơ̆m dôm sơnăm âu ki, Đảng bộ thĭ xăh Vĩnh Châu ling lang lăng khŭl hơtŏk loi dơ̆ng tơdrong jang hơtŏk tơiung tơring kon pơlei kon kông păng lăng ‘nâu jĭ hơnăp jang hơnơ̆ng, gĭt kăl. Đảng bộ thĭ xăh Vĩnh Châu dang ei đei 42 đảng bộ, chi bộ ‘noh đei 10 đảng bộ xăh, phường, 5 đảng bộ anih jang păng 27 chi bộ anih jang; đei 207 chi bộ găh đảng bộ tơring. Kiơ̆ kơ ‘noh, tơring đei hloh 4.200 đảng viên, lơ̆m noh đei hloh 1.700 đảng viên ‘noh jĭ bơngai kon kông. Kiơ̆ kơ Phŏ Bí thư Anih jang Đảng thĭ xăh Vĩnh Châu Phan Thị Xinh Hưởng, đảng viên jĭ bơngai kon kông ‘noh bơngai tơgop tôch kơ lơ lơ̆m tơdrong hơtŏk tơiung atŭm kơ thĭ xăh, đe sư ‘noh jĭ bơngai đei lui yom hai, bơngai năm hơdrol lơ̆m bơ̆jang kiơ̆ dôm tơdrong jang kach mang tơ̆ tơring hai, mă loi ‘noh jĭ lơ̆m pơ jing tơring tơrang ‘nao. Phŏ Bí thư Anih jang Đảng thĭ xăh Vĩnh Châu Phan Thị Xinh Hưởng tơroi:

“Tơ̆ hơnăp kơnh, Khŭl chĕp kơ̆l pơgơ̆r Anih jang Đảng thĭ xăh Vĩnh Châu kŭm băt hơdăh pơm hơtŏk tơiung đảng viên lơ̆m tơring kon kông ‘noh jĭ 1 hơnăp jang đei bơngơ̆t truh păng pơgơ̆r ‘lơ̆ng hơiă. Sơnăm 2023 Khŭl chĕp kơ̆l pơgơ̆r Anih jang Đảng thĭ xăh Vĩnh Châu hlôi tơlĕch jang 1,2 trong jang vă hơtŏk tơiung đảng viên lơ̆m tơring kon kông.”

Hăm dôm trong jang hơbĕch hơbăl, pơcheh hơgei, tơdrong jang hơtŏk tơiung Đảng ‘noh bơngai kon kông tơ̆ thĭ xăh Vĩnh Châu hlôi hơnhăk ăn dôm jơnei ‘lơ̆ng. Tơdrong ‘noh đei tơƀôh hơdăh kiơ̆ tơdrong jang yan âu, tơdrong jang chĭnh trĭ, dôm khŭl jang đảng pran kơ jăp, tơƀôh hơdăh hơnăp jang chĕp kơ̆l pơgơ̆r tơpôl kon pơlei lơ̆m hơtŏk tơiung mŭk drăm, tơpôl, vei sơđơ̆ng khŭl linh, sơđơ̆ng tơpôl ... tơ̆ tơring.