VOV4.Bahnar - Đơ̆ng rŏng 10 sơnăm jang kiơ̆ tơdrong jang kla ăn kon jên iŏk yua cham char bri, hlŏh 15.000 ŭnh hnam bơngai K’Ho tơ̆ dêh char Lâm Đồng hlôi đei sa yuơ kơtă, atŏk jang sa iŏk yua kơ jăp đơ̆ng bri, hơmet pơ ‘lơ̆ng tơdrong erĭh sa păng roi năr roi sơđơ̆ng erĭh sa ‘nao. Gơnơm đơ̆ng nŏh, mă đơ̆ng đei ƀơm kơnê̆ đơ̆ng jĭ hơbuh Covid-19, mă lei Têt au kon pơlei kon kông erĭh sa tơ̆ au oei tŏk bŏk hơmet ăb vă pơgơ̆r chơt hơ iă puih mak, sơng Têt tôm tong păng tơnŏ ‘lơ̆ng.

            Sơkơ̆t hơdăh gô chơt hơ iă puih mak lơ̆m tơdrong hle, oei sa hơdoi hăm jĭ hơbŭh Covid-19 nhen rim ŭnh hnam anai lơ̆m pơlei, mă lei sơng Têt sơnăm au, hăm ŭnh hnam ƀok Liêng Trang Ha Solly, oei tơ̆ thôn 2, tơring Đạ Sar, apung Lạc Dương, dêh char Lâm Đồng ‘nŏh chơt hơ iă ‘nă hal hlŏh. Ư̆h kơ chơt lơ liơ mă gơ̆h mư̆h chehphe ŭnh hnam mă đơ̆ng ư̆h kơ gan đei lơ pơtêng hăm sơ̆ mă lei kơ jă măt, atŭm hăm kon jên sơng iŏk đơ̆ng tơdrong jang kla ăn kon jên iŏk yua cham char bri ... ư̆h khan lăp sơđơ̆ng tơdrong erĭh sa kơ ‘năr mă lei lơ̆m sơnăm 2021 mư̆h ŭnh hnam ƀok oei mong răk đei kon jên jei lơ mơ̆n. Mŭk drăm sơđơ̆ng, unh hnam răt yua tôm tơmam drăm kăl vă sơng hơvơn sơnăm ‘nao chơt hơ iă ‘nă hal atŭm lơ̆m pơlei.“Sơ̆ erĭh sa tôch tơnap tap, mư̆h đei trong jang kla ăn kon jên iŏk yua cham char bri ‘nŏh tơgŭm ăn kon pơlei đei dơ̆ng kon jên vă chă răt sa ăn ŭnh hbnam. Têt Nguyên đán au, ŭnh hnam ayơ jei răt tôm tơmam drăm, vang chơt hơ iă atŭm hăm rim bơngai, vang chă et sa păng sơng kơkŭh puih mak ‘nao ‘mĕh vă jang sa iŏk yau kơ jăp hlŏh dơ̆ng”.

Ƀơ̆t kong tơnŭh ŭnh khơ̆ng bơblông vă tơpŭh hŭt tơngiĕt găng lơ̆m gơmăng tơ̆ pơsŭn mir tŏk bŏk groi, găh bri vei rong tu thoong đak Dạ Nhim, atăih trong glung 27C-jăl trong tơƀư̆h 2 păh pơlei tơm Đà Lạt hăm Nha Trang dang 5km găh Hơlĕch Tu, ƀok kră pơlei Păng Ting Doanh, Bí thư chi bộ thôn 1, tơring Đạ Sar păng hlŏh 10 ‘nu bơngai lơ̆m khŭl iŏk vei lăng bri gak tơ̆ au vă tang găn ŭnh sa bri lơ̆m pơyan phang. Ƀok Păng Ting Doanh tơbăt, kơ yuơ vei lăng bri kơ na rim bơngai lơ̆m khŭl iŏk vei lăng jei akŏm tơ̆ au ngăl. Ba hlôi pơkăp iŏk vei lăng bri ăn Tĕh đak ‘nŏh kăl jang mă tơnăp.

Kră pơlei Păng Ting Doanh tơroi, sơ̆ mĭnh ŭnh hnam iŏk vei lăng bri đei tĕh đak tơgŭm ăn kon jên 400.000 hlak jên lơ̆m 1ha 1 sơnăm ‘nŏh dang ei hlôi tŏk trŭh 650.000 hlak jên lơ̆m 1ha 1 sơnăm. Jô̆ hơtŏ mĭnh ŭnh hnam iŏk vei lăng đơ̆ng 20 trŭh 25ha bri, hơnhăk đei iŏk yua ăn ŭnh hnam sơđơ̆ng đơ̆ng 13 trŭh 16 trĭu hlak jên lơ̆m 1 sơnăm. Atŭm iŏk đei đơ̆ng jang sa păng rong kon tơrong, kon kơlap ... tơdrong erĭh sa kơ kon pơlei hlôi sơđơ̆ng pơtêng hăm sơ̆. Hơdrô̆ sơnăm au, gơnơm chehphe măt, atŭm hăm iŏk đei kon jên đơ̆ng kla ăn kon jên iŏk yua cham char bri lơ̆m hơtuch sơnăm kơna kon pơlei rim pơlei pơla jei jang sa iŏk yau kơ jăp vă hơmet ăn sơng Têt ƀĕnh ƀang tơdrong chơt hơ iă ‘nă hal păng phĭ tơtŏ dơnŏ ‘lơ̆ng dơ̆ng kơ jăp. “Iŏk đei dơ̆ng đơ̆ng tơdrong iŏk vei lăng bri ‘nŏh tơdrong erĭh sa kơ kon pơlei sơđơ̆ng hlŏh kơ sơ̆ tôch kơ dêh, tơgum ăn đei kon jên chă răt sa kơ ‘năr. Tơdăh ư̆h kơ đei tơdrong iŏk đei đơ̆ng au ư̆h kơ jor tơdrong erĭh sa kơ kon pơlei gô tơ ƀơ̆p tơnap tap.  Têt mă đơ̆ng kon pơlei pơgơ̆r chơt hơ iă ‘nă hal mă lei tơdrong jang vei lăng bri jei ư̆h kơ gơ̆h hơchăng char. Kơ yuơ kon jên iŏk đei đơ̆ng iŏk vei lăng bri tôch sơđơ̆ng, hoei đei tơdrong au to pơtêng hăm chŏh jang sa, kơ yuơ lơ lŏh bơ̆n kăl bơ̆ jang tơnăp, ‘lơ̆ng hlŏh dơ̆ng nhen bơ̆n hlôi pơkăp, ling lang iung jang kơ jăp vei lăng năng tông bri mă hroong”.

            Tơdrong jang kiơ̆ tơdrong jang kla ăn kon jên iŏk yua cham char bri tơ̆ Lâm Đồng, lơ̆m au đei tơring bri kơ yuơ Dơnŏ anĭh vei lăng bri tu đak Đạ Nhim tơ̆ apŭng Lạc Dương ư̆h khan hơnhăk đei tơdrong erĭh sa sơđơ̆ng dơ̆ng kơ jăp ăn kon pơlei, mă lei oei pơm hơtŏk loi dơ̆ng jơhngơ̆m đon hlô̆h vao lơ̆m bơ̆ jang vei lăng năng tông bri hăm kon kông bơngai K’ho tơ̆ au. Kiơ̆ đơ̆ng ƀok Đinh Hữu Đạo, Kơ iĕng Kơdră chĕp pơgơ̆r Dơnŏ anĭh vei lăng bri tu đak Đạ Nhim, đĭ đăng hơgăt tĕh bri hlŏh 40.800ha kơ hơnĭh au jei pơjao ăn rim khŭl, rim bơngai vei lăng. Lơ̆m au, đei 37.690ha đei pơjao ăn vă jê̆ 1.500 ŭnh hnam bơngai K’ho oei tơ̆ rim tơring Đạ Sar, Đa Nhim păng Đạ Chais kơ apŭng Lạc Dương iŏk vei lăng bri. ‘Ngoăih tơgŭm ăn kon pơlei đei dơ̆ng tơdrong jang sa iŏk đei, sơđơ̆ng erĭh sa, bơ̆ jang vei lăng bri jei roi năr roi ‘lơ̆ng hlŏh dơ̆ng. Ƀok Đinh Hữu Đạo, tơbăt:“Mư̆h jên kla ăn iŏk yua cham char bri tŏk lơ ‘nŏh hơnăp jang kơ rim ŭnh hnam iŏk vei lăng bri sa roi tơnăp hlŏh dơ̆ng, mă kăl ‘nŏh bơ̆ jang tang găn ŭnh sa bri lơ̆m pơyan phang. Rim khul chă klăh asong dĭh băl gak tơ̆ rim hơnĭh hơmơt đei ŭnh sa kơtang vă ƀô̆h păng pĭt ŭnh sa bri tơdăh đei. Kơ yuơ lơ lŏh dôm sơnăm tơjê̆ au lơ̆m bri mă hơnĭh au vei lăng jei pă đei ƀô̆h tơdrong ŭnh sa bri bơih. Lơ̆m dôm năr Têt Nguyên đán, rim ŭnh hnam iŏk vei lăng bri lăp đơ̆ng rŏng chă răt rak tơmam drăm, hơmet ăn sa têt, sơng sơnăm ‘nao đang ‘nŏh kon pơlei jei vang iung jang hơdoi hăm rim hơnĭh vei lăng bri vă gak tang găn ŭnh sa bri nhen, năm pơtrui, dăr lăng bri”.

            Atŭm tŏk lơ kon jên kla ăn iŏk yua cham char bri, tơgŭm ăn bơngai vei lăng bri sơđơ̆ng erĭh sa, kon pơlei bơngai K’ho oei tơ̆ rim tơring Đạ Sar, Đa Nhim păng Đạ Chais kơ apŭng Lạc Dương (Lâm Đồng) oei sơng iŏk đei dơ̆ng đơ̆ng lơ tơdrong jang, trong tơgum djru anai kơ yuơ Đảng păng Tĕh đak tơmơ̆t jên jang, nhen tơdrong jang tơjur dơnŭh tĕnh koăng păng kơ jăp ‘lơ̆ng, tơ iung pơjing tơring tơrang ‘nao, pơtho tơbăt kih thuơ̆t chŏh jang sa, tơplĭh ‘long pơtăm .... ‘Nau tơpă jing dôm trong jang tơgŭm djru tôch hơdăh păng tơpă, tơgŭm ăn kon kông K’ho oei tơ̆ Lạc Dương pơma hơdrô̆ păng Lâm Đồng pơma atŭm đei dơ̆ng jơ rơvơn, jơhngơ̆m pran vă atŏk tơ iung hlŏh dơ̆ng.

Bơngai chĭh: Quang Sáng

Tơblơ̆ nơ̆r: Amazưt