Kiơ̆ đơ̆ng ƀok Y Thanh Hà Niê Kđăm - Kơdră chĕp pơgơ̆r Kon kông kơ Kuô̆k hô̆i, Kơ iĕng Kơdră Khul dăr lăng kơ Kuô̆k hô̆i tơbăt, pơtôch tơlĕch jang kiơ̆ rim Tơdrong jang tơm Teh đak ( tơ iung pơjing tơring tơrang ‘nao, tơjur dơnuh kơjăp ‘lơ̆ng păng atŏk tơ iung mŭk drăm-tơpôl tơring kon kông păng groi kông) ‘măng mă blŭng hlôi iŏk đei jơnei hơ iă; tơdrong jang mŭk drăm, tơpôl tơring choh jang sa, tơring groi kông đei hơmet pơ ‘lơ̆ng. ‘Ngoăih kơ ‘noh oei đei lơ tơdrong tơhlăk tơhlĭn, tim mă ‘lơ̆ng pơm ăn tơdrong jang keh đang trong pơkăp tơlĕch kon jên jang Trung ương truh sơnăm 2025 kơ 3 Tơdrong jang tơm Teh đak ‘noh tôch tơnap tap.

Ƀơm truh rim trong jang vă atŏk kơtang tĕnh koăng tơlĕch kon jên jang teh đak tơmơ̆t jang, rim tơdrong jang tơm Teh đak vă pơm hơtŏk đei iŏk yua kơjăp iŏk yua kon jên tơmơ̆t jang, tơgop ăn trong tơlĕch jang tŏk kơtang păng keh đang trong hnam au to tơgŭm ăn atŏk tơ iung păng hơrih sa kơ kon pơlei, tơ̆ hop akŏm hơtuch sơnăm au ki, Jơnŭm vei lăng kon pơlei dêh char Dak Lăk, ƀok Võ Ngọc Tuyên, Kơdră chĕp pơgơ̆r Hơnih pơprŏ Tơdrong jang-Tơmơ̆t jên jang dêh char Dak Lăk tơbăt:“Lơ̆m khei năr truh, nhôn lăng kơjăp truh tơdrong jang tơm Teh đak. Đei trong vang iung jang hơdoi ‘lơ̆ng ƀar păh Hơnih Pơprŏ Tơdrong jang-Tơmơ̆t jên jang păng rim hơnih bơ̆ jang. Tơdrong jang tơm Teh đak găh tơring tơrang ‘nao ‘nŏh Hơnih vei lăng Choh jang sa dêh char, tơdrong jang tơjur dơnuh kơjăp ‘lơ̆ng ‘nŏh Hơnih vei lăng Tơdrong jang dêh char, tơdrong jang atŏk tơ iung mŭk drăm tơring kon kông păng groi kông ‘noh Hơnih vei lăng Kon kông dêh char ‘noh nhôn gô pơma dơnuh lơ̆m Hơnih chĕp pơgơ̆r Tơdrong jang tơm Teh đak vă đei drơ̆ng mĭnh nơ̆r păng dăr lăng hơdrol pơjao trong pơprŏ jang đơ̆ng blŭng sơnăm hloi vă tơlĕch jang kon jên jang tơtom”.

Tơ̆ hop akŏm au, Jơnŭm vei lăng Kon pơlei dêh char Dak Lăk hlôi pơjing Tơdrong tơchơ̆t găh tơdrong pơjao pơkăp jang, trong pơprŏ kon jên tơmơ̆t jang đơ̆ng kon jên jang Trung ương păng kon jên jang dêh char jang kiơ̆ Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông lơ̆m sơnăm 2024 ‘nŏh vă jê̆ 660 ti hlak jên.

Jei tơ̆ hop akŏm hơtuch sơnăm 2023 kơ Jơnŭm vei lăng kon pơlei dêh char Gia Lai, ƀok Phạm Minh Trung - Kơdră chĕp pơgơ̆r Hơnih jang Mŭk drăm bri brăh Cham char dêh char au athei rim tơring iung jang hơdoi tơlĕch jang pơm hla bơar ƀơk teh ăn kon pơlei lơ̆m Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông: “Găh ƀơk ăn teh ăn kon kông lơ̆m Tơdrong jang tơm Teh đak atŏk tơ iung mŭk drăm-tơpôl tơring kon kông păng groi kông, Hơnih vei lăng kon pơlei dêh char pơjao ăn Hơnih jang Mŭk drăm bri brăh-Cham char pơchoh trong, pơtho tơbăt găh teh oei. Hơnih au hlôi đei hla bơar pơtho tơbăt hơdăh ăn rim apŭng. Athei rim apŭng đei trong vă jang, chih hơnăn hơdăh vă kĭ tơchơ̆t, tơlĕch jang kiơ̆”.

Hăm hơnăp jang kơtang, tơpăt rơhăo, ưh kơ veh ver, tơtom ƀôh hơdăh dôm tơdrong tơnap tap, tơhlăk tơhlĭn, Kuôk hô̆i hơnơ̆ng yak hơdoi hăm Khul kơdră chĕp pơgơ̆r Teh đak vă tơchă trong jang trŏ lăp hlŏh, mă kăl mưh khei jang kiơ̆ 3 Tơdrong jang tơm Teh đak jăl jang 2021-2025 lăp pă 2 sơnăm dơ̆ng ‘noh hlôi pơtôch. ‘Măng hop akŏm mă 6, Kuô̆k hô̆i jăl XV hlôi pơdrơ̆ng kiơ̆ Tơdrong tơchơ̆t găh dăr lăng jang kiơ̆ 3 Tơdrong jang tơm Teh đak. Bơngai tang măt Rơ Châm Hphik, khul Gia Lai akhan: “Tơdrong tơchơ̆t tôch gĭt kăl păng tơtom, tôch trŏ lăp hăm jơhngơ̆m đon kon pơlei, tơdrong jang au jei hlôi đei hơmet pơ ‘lơ̆ng dôm tơdrong kăl tŏk bŏk tơhlăk tơhlĭn lơ̆m tơlĕch jang kiơ̆ 3 Tơdrong jang tơm Teh đak”.

‘Nau jĭ ‘măng mă blŭng, mĭnh tơdrong jang dăr lăng kơtang pơđĭ 3 tơdrong jang tơm Teh đak kơ teh đak. Iung pơma tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ pơma hơdăh: dăr lăng hăm trong jang kăl ‘noh hơmet pơ ‘lơ̆ng păng tơjră tang găn, lơ̆m au hơmet pơ ‘lơ̆ng ‘noh kăl hloh vă rim tơdrong jang roi năr roi ‘lơ̆ng liĕm hloh dơ̆ng. “Kuô̆k hô̆i drơ̆ng nơ̆r vă Khul kơdră chĕp pơgơ̆r Teh đak tĕnh koăng pơjing, pơtruh ăn Kuô̆k hô̆i tơ̆ ‘măng hop akŏm tơjê̆ hloh Trong vă pơjing Tơdrong tơchơ̆t găh jang pơlong năng rim trong bơ̆ jang, tơdrong tơgŭm djru kăl găh pơjao tơdrong jang ăn apŭng gơ̆h tơchơ̆t hơnăn tơdrong jang, trong vă jang, klăh asong iŏk yua kon jên jang teh đak tơlĕch jang kiơ̆ rim Tơdrong jang tơm Teh đak”.

Atŭm hăm pơdrơ̆ng kiơ̆ Tơdrong tơchơ̆t kăl găh tơlĕch jang kiơ̆ rim tơdrong tơchơ̆t đơ̆ng Kuô̆k hô̆i găh Tơdrong jang tơm Teh đak, Kuô̆k hô̆i jei hlôi pơjao ăn Khul kơdră chĕp pơgơ̆r Teh đak pơtruh ăn Kuô̆k hô̆i lơ̆m hop akŏm tơjê̆ hloh mĭnh Tơdrong tơchơ̆t kăl găh pơjao tơdrong gơ̆h jang, pơm dă ƀiơ̆ đei hla bơar bơ̆ jang vă tơtom hơmet pơ ‘lơ̆ng tơnap tap, tơhlăk tơhlĭn, tơgŭm tơlĕch jang kiơ̆ rim Tơdrong jang tơm Teh đak jơnei kơtang, jang keh đang ƀlep khei năr pơkă, pơjing jơhngơ̆m đon lui kiơ̆ păng tơdrong hơnih sa hơnŭk hơnoa kơ kon pơlei.