Sơkơ̆t hơdăh, khei năr tơjê̆ au kơjă phe tŏk măt, pơjing rơvơn ăn tơdrong tĕch phe tơ̆ teh đak đe kơ Việt Nam, hơnhăk đei jơhngơ̆m chơt hơ iă ăn kon pơlei choh jang sa. Mă lei, ‘nau jĭ tơdrong tơtăm kơ bơngai răt yua păng pơm ưh kơtang lơ̆m tĕch mơdro phe tơ̆ teh đak đe, Bơngai tang măt Lê Thị Song An, khul Long An apĭnh:“ Kơjă ƀa hơnơ̆ng tŏk măt kơna mĭnh ƀar tơring hlôi đei ƀôh chă răt akŏm phe ƀa tôch kơtang, pơm ưh sơđơ̆ng lơ̆m tĕch răt, đơ̆ng nŏh pơm hơtŏk kơjă tơmam drăm au măt hloh tơdrong păng jei jing tơdrong tơtăm đơ̆ng kon pơlei răt yua, bơngai kŏng nhân mư̆h kơjă phe tŏk măt. Tơdrong mă au pơm ăn truh ưh kơ gan ‘lơ̆ng lơ̆m tĕch mơdro tơ̆ teh đak đe, tim mă pơjing đeu jang hơdoi kơjăp ƀar păh kon pơlei hăm hơnih mơdro sa. Kơ yuơ lơ loh, kơdră tang măt athei Ƀô̆ trương tơbăt trong jang hơdăh, trŏ lăp vă mĭnh păh sơđơ̆ng phe ƀa lơ̆m teh đak, adoi pơtrŭt kơtang chŏh jang sa, tĕch mơdro phe tơ̆ teh đak đe kơjăp ‘lơ̆ng ƀlep trong chĕp pơgơ̆r đơ̆ng Thủ tướng Teh đak?

Ƀô̆ trương Lê Minh Hoan tơbăt, đunh kơ au 10 sơnăm ‘nŏh teh jang ba kơ teh đak bơ̆n lơ̆m hloh 4 triu hektar. Hrei au kiơ̆ chih jô̆ chŭn na ƀa đak lăp pă 3 triu 930.000 hektar.Kiơ̆ Tơdrong tơchơ̆t đơ̆ng Kuô̆k hô̆i păng Tơdrong tơchơ̆t đơ̆ng Khul kơdră chĕp pơgơ̆r Teh đak ‘nŏh iŏk yua sơđơ̆ng lơ̆m 5 triu hektar teh chŭn na ƀa đak. Ƀô̆ trương tơƀôh hơdăh, tơdrong sơđơ̆ng tơ̆ au ‘nŏh jĭ sơđơ̆ng phe ƀa păng vă tơdrong atŏk tơ iung mŭk drăm-tơpôl ‘noh jei kăl pơjing đei teh choh jang sa, lơ̆m au đei teh jang chŭn na ƀa đak. Ƀô̆ trương Lê Minh Hoan tơbăt, pơprŏ teh jang chŭn na ƀa đak găh lơ̆m pơprŏ groi teh păng kơ yuơ Hơnih tơm vei lăng Mŭk drăm Bri brăh păng Cham char iŏk jang tơm tơdrong jang au. Lơ̆m pơprŏ jang kơ rim tơring jei hlôi đei tơchơ̆t hơdăh găh hơgăt teh jang chŭn na ƀa đak, sơkơ̆t hơdăh groi teh ‘măn ăn teh choh jang sa:"Lơ̆m atŏk tơ iung mŭk drăm-tơpôl rim tơring kăl lăng mă brĕ truh groi teh choh jang sa, mưh tơplih teh jang chun na ƀa đak kơ yuơ oei đei lơ tơdrong pơm ăn ưh trŏ lăp đơ̆ng rŏng ‘noh nhen găh plei ƀa, tơdrong jang sa iŏk đei kơ kon pơlei choh jang sa adoi nhen trong jang au to ... Hơnih tơm vei lăng Choh jang sa păng Atŏk tơ iung tơring tơrang gô hơdrin atŭm hăm rim tơring vă hơlen hơdăh găh tơdrong dang yơ tơplih, dang yơ ưh kơ gơ̆h tơplih hăm trong jang hơlen mă brĕ ƀar păh atŏk tơ iung păng vei kơjăp teh jang chŭn na ƀa đak".

Mĭnh ƀar nơ̆r tơgop akhan, sơđơ̆ng phe ƀa teh đak kăl tơklep kơjăp hăm hơmet ming trong jang mŭk drăm, sơđơ̆ng phe ƀa lơ̆m rim tơdrong, ưh khan lăp akŏm lơ̆m tơdrong hlôi đei mă lei kăl sơđơ̆ng hơtŏ hơnơ̆ng tơdrong ‘lơ̆ng, sơđơ̆ng tơmam drăm sa, athei Ƀô̆ trương tơbăt, Hơnih tơm hlôi tơlĕch dôm tơdrong jang hơdăh lơ liơ? Tơl nơ̆r apĭnh au, Ƀô̆ trương Lê Minh Hoan tơbăt:"Sơđơ̆ng phe ƀa tơmam drăm sa ưh khan lăp hơdrô̆ phe ƀa mă lei oei pơ đĭ rim tơmam drăm choh jang sa ƀa hơƀo ƀum vă pơjing đei kơchơt ‘lơ̆ng ăn kon bơngai hơrih păng truh hloi dôm tơmam hiĕm kon tơrong, ƀum pơkao jei đei pơjing. Tơdrong kăl iung jang kơ bơ̆n ‘noh kăl atŏk tơdrong hơrih sa kơ kon pơlei hăm lơ trong jang tơm teh đak vă kĕ iung jang, ưh khan lăp chă pơtrŭt kon pơlei pơtăm hơƀo mir mă dôm tơdrong au ưh khan tơdrong tơm kăl hloh ăn đunh đai tai sơnăm. ‘Noh jĭ tơdrong jang sa iŏk đei păng tơdrong hơrih sa ‘moi kiơ̆ lơ trong jang kơ 3 Tơdrong jang tơm vă dôm trong jang Hơnih tơm vei lăng Choh jang sa păng Atŏk tơ iung tơring tơrang găh jang sa tơ̆ rơng bri vă đei iŏk yau kơjăp hloh dơ̆ng".

Tơl nơ̆r apĭnh găh trong pơjing jang hơdoi lơ̆m choh jang sa đơ̆ng Bơngai tang măt Phạm Hùng Thắng, khul Hà Nam, Ƀô̆ trương Lê Minh Hoan drơ̆ng akhan, jang kiơ̆ jang hơdoi kăl đơ̆ng hơnih vei lăng choh jang sa ‘nŏh vă tơplih ăn jang sa hơdrô̆ hơdrăn, kơdih kơdih lơ̆m choh jang sa. Tơdrong đei tơlĕch ăn ‘nŏh atŏk kơjăp ‘lơ̆ng kơ rim trong jang hơdoi lơ̆m khei năr au kơnh. Lơ̆m khei năr kơnh, Hơnih tơm gô yak hơdoi hăm rim tơring vă tơ iung pơjing rim trong jang hơdoi tôm tong, trŏ lăp, keh kong hloh dơ̆ng păng atŭm hăm rim hơnih tơm, rim bơngai khoa hŏk, rim hơnih mơdro sa vang iung jang vă trong jang adoi atŏk tơ iung kơjăp ‘lơ̆ng hlŏh dơ̆ng. Iung pơma pơtôch ‘măng apĭnh păng tơl nơ̆r apĭnh tơ̆ hop akŏm mă 25 kơ Hơnih bơ̆ jang chĕp pơgơ̆r Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ pơma truh lơ tơdrong tim mă lăp păng tŏk bŏk đei tơpôl ưh kơ lăp đon hlôi đei lăng hơlen, xek tơlang tơtom."Ĭnh lui akhan, hăm rim trong vă jang mă rim Ƀô̆ trương hlôi pơkăp, hăm kơrŭn đĭ ai đơ̆ng tơpôl khul Kơdră chĕp pơgơ̆r Teh đak, tơdrong lăp đon vang iung jang đơ̆ng Kuô̆k hô̆i, rim kơdră tang măt Kuô̆k hô̆i, tơdrong vei lăng găh sơnong jang kơ Hơnih tơm Tư pháp gô đei lơ tơplih ‘lơ̆ng hơ iă, atŏk tơ iung ‘nao, mă kăl lơ̆m khei ‘năr tơdrong pơkoăl iung jang tơnăpo roi năr roi kơtang kiơ̆ Tơdrong tơchơt kơsô̆ 27 đơ̆ng Trung ương Đảng; hơnih jang vei lăng choh jang sa yak hloh tơnap tap, tơdrong long, hơnơ̆ng jing hơyak pran kơjăp kơ tơdrong jang mŭk drăm, pơjing hơyak kăl vă lăng truh chŏh jang sa hơgei, vang mơ̆t hơdoi apŭng plĕnh teh păng hơrih sa hơdoi gei kơjăp hăm tơplih tŏ ‘mi kial".