Pơma dơnuh tơ̆ hnam hop akom găh mĭnh ƀar tơdrong oei đei nơ̆r tơgop phara dih băl kơ trong vă pơjing Khôi luơ̆t Tư pháp bơngai tim mă tơ̆l hơdruh tơdăm, rim bơngai tang măt drơ̆ng kiơ̆ kơtang trong vă pơjing Khôi luơ̆t tơchơ̆t pơtho khan tơ̆ Hnam trương pơtho pơhrăm pơnă ‘noh trong jang kăl hloh păng tơchơ̆t hơdăh kiơ̆ tơdrong pơm yoch vă jang kiơ̆ tơdrong tơchơ̆t ou. Bơngai tang măt Phạm Văn Hòa, khul Đồng Tháp akhan: "Trong jang pơtho khan lơ̆m hnam trương pơtho pơhrăm pơnă ‘noh tôch trŏ lăp hăm yan ou kơ teh đak bơ̆n hrei ‘nou, pơm lơ liơ vă rim đe hơ ioh đei tơdrong yoch kơtang dăh mă tôch kơtang hoei chă chĭt kron. Tơdăh rôp chĭt lơ̆m khei ‘năr chă hơlen, xek tơlang lei rŏ năng đơ̆ng 9-12 khei, đơ̆ng rŏng ‘noh năm ba tơ̆ nai lei đe oh jei hlôi rôp chĭt bơih, kơna đơ̆ng blŭng hloi tơdăh găh lơ̆m gơ̆h chă pơm tơjur lei dăh tơjur đơ̆ng blŭng hloi".

Rim kơdră tang măt athei hơnơ̆ng dăr lăng mă brĕ rim tơdrong tơchơ̆t găh trong phak hăm rim bơngai tim mă tơ̆l hơdruh tơdăm sơđơ̆ng ăn pơm rơdu adoi trŏ lăp hăm tơdrong kĕ brar, tang găn hơlou pơm yoch, adoi pơm kiơ̆ tơdrong ‘mêm mơnat dih băl. Adoi kăl đei trong jang vă rim bơngai tim mă hơdruh tơdăm băt hlôh ƀôh hơdăh tơdrong kơdih sư chă pơm glăi vă đe sư chă hơmet pơ ‘lơ̆ng jơhngơ̆m đon pơm glăi, bơ̆h ƀơm. Bơngai tang măt Nguyễn Tạo, khul Lâm Đồng pơma hơdăh: "Tơdrong tơm lơ̆m trong pơjing ‘măng mă ou ‘noh vă pơtho tơbrar, tơgŭm djru dôm bơngai tim mă hơdruh tơdăm đei tơdrong glăi, hơmet ming tơdrong glăi kơdih vă đei jing kon pơlei oei sa ‘lơ̆ng ăn tơpôl. Mă lei, Apăng 40 kơ trong vă pơjing khôi luơ̆t ou tơchơ̆t găh dôm bơngai tim mă hơdruh tơdăm ƀôh hơdăh tơdrong kơdih chă pơm glăi kơna băt chă brar, hơmet ming tơdrong đĭ pơm glăi ou. Tơdăh jang kiơ̆ rim trong jang xek tơlang kiơ̆ ‘mêm mơnat hăm dôm bơngai tim mă hơdruh tơdăm đei tơdrong glăi ưh kơ gan kơhret, ưh kơ trŏ lăp ‘lơ̆ng hơ iă lei gô pơm ăn đe sư ưh kơ brar păng vih hơlơ̆k pơm tơdrong yoch dơ̆ng. Lơ loh, bơ̆n gô ưh kơ iŏk đei trong tơlĕch ăn kơ khôi luơ̆t ou ‘noh vă pơtho tơbrar vă đe sư đei jing dôm bơngai đei iŏk yua ăn tơpôl".

Lơ nơ̆r tơgop drơ̆ng nơ̆r hăm trong vă pơjing Khôi luơ̆t kăl hơmet kơ dih tơdrong glăi đei bơngai tim mă hơdruh tơdăm pơm glăi vă xek tơlang. Mă lei, bơngai tang măt Lê Tất Hiếu, khul Vĩnh Phúc tơƀôh hơdăh, bơngai tim mă hơdruh tơdăm pơm glăi roi năr roi lơ, lơ tơdrong pơm glăi bơngai tim mă hơdruh tơdăm chĕp kơ̆l ... kơ yuơ lơ loh, mưh xek tơlang kăl đei nơ̆r pơma tơroi mă hơdăh, tôm tong đơ̆ng dôm bơngai pơm glăi ‘noh hloi: "Tơdăh tơklăh kơdih lei pơ đĭ dôm bơngai pơm glăi ‘noh bơngai tim mă hơdruh tơdăm păng dôm bơngai yoch sơnăm ‘lŏ kră jei vang năm lơ̆m 2 ‘măng pơgơ̆r xek tơlang ‘noh hloi. Mă kăl hloh dơ̆ng, mưh xek tơlang tơdrong kon pơlei lơ̆m tơdrong pơm yoch kơtang. Pơtih gia nhen tơdrong chă pơjăng dih băl găh hrŭ ăn hiong răm lei gô sek tơlang lơ̆m ‘măng tơlang ayơ? Lơ̆m ‘măng sek tơlang dôm bơngai tim mă hơdruh tơdăm dăh mă ‘măng xek tơlang dôm bơngai đĭ truh sơnăm hơdruh tơdăm?. Apăng 40 tơchơ̆t gô mơ̆ng kiơ̆ tơdrong yoch, tơdăh đei tôm rơvơn gơ̆h tơklăh lei tơklăh, tơdăh ưh kơ gơ̆h lei ưh kơ tơklăh lơ̆m xek tơlang tơdrong yoch".

Rim kơdră tang măt athei akŏm hơlen đĭ đăng trong phak đơ̆ng noh hơmet ming kiơ̆ trong: ưh kơ hloh 12 sơnăm chĭt phak hăm bơngai pơm glăi đơ̆ng 14 sơnăm truh tim mă truh 16 sơnăm păng ưh kơ hloh 18 sơnăm phak hăm dôm bơngai pơm glăi đơ̆ng 16 sơnăm truh 18 sơnăm păng đei pơlăp hăm rim tơdrong pơm glăi. Tơchơ̆t lơ loh mĭnh păh sơđơ̆ng pơm pơ ‘lơ̆ng trong jang xek tơlang ƀar păh bơngai tim mă hơdruh tơdăm pơm glăi 1 tơdrong yoch hăm bơngai tim mă hơdruh tơdăm pơm glăi lơ ‘măng; adoi hoei pơm hơtŏk kơtang hơnăp jang xek tơlang pơtêng hăm tơdrong tơchơ̆t kơ Khôi luơ̆t hinh sư̆; adoi hoei pơm ưh kơ trŏ lăp lơ̆m akŏm xek phak.