Thĭ xăh Buôn Hồ, dêh char Đắk Lắk đei hloh 100 rơbâu ‘nu, hăm 25 hơdrĕch hơdrŭng vang arih sa, lơ̆m noh đei vă jê̆ 31%  ‘noh jĭ bơngai kon kông. Jang kiơ̆ tơdrong jang vei lăng bơngai kon kông păng tơdrong jang tơgŭm bơngai kon kông, lơ̆m 5 sơnăm âu ki, thĭ xăh Buôn Hồ hlôi pơgơ̆r 20 ‘măng tơroi tơƀôh tơdrong jang, ăn năm jang tơ̆ teh đak đe hăm vă jê̆ 3.000 ‘nu bơngai vang jang, lơ̆m noh 1 puăt ‘noh jĭ bơngai kon kông. Pơgơ̆r 27 lăm pơtho tơdrong jang ăn kơ vă jê̆ 1.000 ‘nu bơngai jang tơring tơrang ‘noh jĭ bơngai kon kông găh ŭnh hnam dơnuh hin, ŭnh hnam vă jê̆ dơnuh hin đei ‘meh vă hŏk tơdrong jang. Dôm sơnăm âu ki, thĭ xăh Buôn Hồ đei klăih song vă jê̆ 20 ti hlak jên vă jang kiơ̆ dôm tơdrong jang tơmơ̆t jên jang, ming man anih jang kăl ăn dôm pơlei, hơmet pơ ‘lơ̆ng teh oei, hnam oei, teh choh jang sa, đak yua ăn kơ dôm pơlei mơmat tat păng tơgŭm hŏk tơdrong jang ăn kơ hơdruh tơdăm.

Trong nơnăm lơ̆m thĭ xăh đei pơm hơrăng ‘lơ̆ng; đĭ đăng kon pơlei đei yua ŭnh điên păng đak rơgoh. Tơdrong jang chĕp răk păng tơƀăk mong tơdrong joăt so ‘lơ̆ng hơiă đei bơngơ̆t truh tơmơ̆t jên jang. Tơdrong jang pơjing khŭl jang chĭnh trĭ tơklep hăm pơtho pơhrăm, pơjing khŭl kang ƀô̆ ‘noh jĭ bơngai kon kông bơngơ̆t truh lăng kăl.

Ƀok Y Cing Mlô, Phŏ kơdră Anih vei lăng kon pơlei thĭ xăh Buôn Hồ tơbăt: thĭ xăh hơnơ̆ng hơvơn lơ kon jên jang đơ̆ng trung ương truh tơring vă akŏm tơmơ̆t jên jang hơtŏk tơiung mŭk drăm - tơpôl ăn kơ dôm tơring kon pơlei kon kông. “Tơ̆ hơnăp kơnh Anih vei lăng kon pơlei thĭ xăh akŏm tơlĕch jang kiơ̆ 1,2 hơnăp jang tơm, dôm tơdrong jang tơgŭm đơ̆ng Đảng, khôi luơ̆t đơ̆ng teh đak ƀơm truh tơdrong jang vei lăng kon kông păng tơdrong jang tơgŭm kon kông lơ̆m jăl jang hrei ‘nâu, tơmơ̆t jên jang pơm anih jang kăl, mŭk drăm tơpôl vă hơtŏk ‘lơ̆ng tơdrong arih sa kơ kon pơlei. Akŏm hơtŏk tơiung mŭk drăm tơpôl, pơtho ăn kon pơlei iŏk yua dôm khoa hŏk ki thuơ̆t vă hơtŏk tơmam đei lơ, ‘lơ̆ng. Hơtŏk loi dơ̆ng vei sơđơ̆ng chĭnh trĭ, sơđơ̆ng lơ̆m tơpôl”.

Đei dêh char Kon Tum rơih jang pơlong lăng, apŭng sơlam Sa Thầy hlôi pơgơ̆r đang Hop akŏm bơngai tang măt dôm hơdrĕch kon kông ‘măng mă IV sơnăm 2024. Apŭng sơlam Sa Thầy, dêh char Kon Tum đei kơsô̆ kon pơlei hloh 54.000 ‘nu, lơ̆m noh kon pơlei kon kông đei hloh 57%, apŭng đei 11 xăh, thị trấn hăm 64 pơlei, lơ̆m noh đei 45 pơlei kon kông. Jang kiơ̆ Tơdrong jang bơ̆jang păng Hơdrin đĭ jơhngơ̆m kiơ̆ kơ thơ Hop akŏm bơngai tang măt dôm hơdrĕch kon kông ‘măng mă III tơlĕch ăn, 5 sơnăm âu ki dôm hơdrĕch kon kông lơ̆m apŭng hlôi 1 jơhngơ̆m đon, hơdrin tơgop pơtrŭt mŭk drăm - tơpôl hơtŏk tơiung.

Truh dang ei, đĭ đăng trong nơnăm đơ̆ng anih kơdrơ̆m apŭng truh tơ̆ dôm xăh păng 64 pơlei hlôi đei man ‘lơ̆ng, năm vih vơ̆t hiôk lơ̆m 2 pơyan tŏ ‘mi; đĭ đăng dôm ŭnh hnam kon pơlei lơ̆m apŭng đei yua ŭnh điên teh đak; đĭ đăng rim xăh, thị trấn đei hnam pơgang ‘lơ̆ng; apŭng đei 5 xăh jang đang tơring tơrang ‘nao păng 1 xăh jang đang ‘lơ̆ng tơring tơrang ‘nao ‘lơ̆ng rŏ; 7 pơlei đei drơ̆ng ăn pơlei tơring tơrang ‘nao tơ̆ tơring kon pơlei kon kông.

Tang măt hơdrĕch đei tŏ sĕt bơngai Rơ Măm năm hop akŏm, ‘nhŏng A Thái, Bí thư Chi bộ, bơngai pơgơ̆r pơlei Plei Le, xăh Mô Rai, tơbăt: “Vang truh hop akŏm bơngai tang măt dôm hơdrĕch kon kông apŭng Sa Thầy ‘măng mă IV sơnăm 2024 ĭnh tôch kơ chơt hơiă. Hăm hơnăp jang ‘noh jĭ bí thư chi bộ, bơngai pơgơ̆r pơlei ĭnh ling lang năm hơdrol lơ̆m tơdrong jang krao hơvơn kon pơlei hơtŏk tơiung mŭk drăm, jang sa vă tơplih ‘lơ̆ng tơdrong arih sa. Mă loi ‘noh jĭ jang kiơ̆ Tơchơ̆t 08 đơ̆ng Anih jang Đảng dêh char pơm tơplih đon tơchĕng, trong jang hăm kon pơlei kon kông păng sut hŭt dôm tơdrong joăt so ưh kơ ‘lơ̆ng. Vang truh hop akŏm ĭnh hŏk pơhrăm lơ tơdrong hlôh vao, tơdrong jang đơ̆ng dôm pơlei, dôm xăh nai găh krao hơvơn kon pơlei păng tơmơ̆t yua lơ̆m tơdrong arih sa.”

Tơ̆ Hop akŏm bơngai tang măt dôm hơdrĕch kon kông apŭng Sa Thầy ‘măng mă IV, dôm bơngai tang măt vang hơlen lăng dơ̆ng jơnei jang kiơ̆ tơdrong jang vei lăng hơdrĕch kon kông Hơdrin đĭ jơhngơ̆m kiơ̆ kơ thơ Hop akŏm ‘măng mă III; yơ̆r ti pơdrơ̆ng kiơ̆ Hơdrin đĭ jơhngơ̆m kiơ̆ kơ thơ Hop akŏm ‘măng mă IV hăm tơdrong tơm hơnơ̆ng pơjing grŭp tơgoăt pôm nơ̆r ƀơ̆r đon dôm hơdrĕch hơdrŭng; hơtŏk ‘lơ̆ng bơngai jang bơngai kon kông; hơvơn, iŏk jang păng iŏk yua đei jơnei dôm kon jên, tơmam ‘lơ̆ng kơ apŭng; chĕp răk păng tơƀăk mong kơjă kăp gĭt tơdrong joăt so dôm hơdrĕch kon kông ... Hop akŏm pôk 22 ‘nu bơngai tang măt năm Hop akŏm bơngai tang măt dôm hơdrĕch kon kông dêh char Kon Tum ‘măng mă IV sơnăm 2024.