Anih pơgơ̆r vei lăng kon pơlei dêh char Đak Lăk 'nao pơgơ̆r Hop akŏm sơkơ̆t hơdăh tơdrong pơm kiơ̆ dôm tơdrong jang mă teh đak tơchơ̆t đơ̆ng sơnăm 2021 - 2023, trong jang, sơnong jang tơm đơ̆ng sơnăm 2023 - 2025 păng pơkăp pơm jang lơ̆m sơnăm 2026 - 2030. 

Pơm kiơ̆ 3 tơdrong jang mă teh đak tơchơ̆t gah (tơring pơsĕl 'nao, tơjur hin dơnuh kơjăp sơđơ̆ng păng hơtŏk mŭk drăm – tơpôl tơring kon kông păng groi kông), Đak Lăk hlôi đei pơjao ăn jê̆ 2.320 ti hlj. Lơ̆m noh, Tơdrong jang hơtŏk mŭk drăm – tơpôl tơring kon kông păng groi kông 'noh mă tơm, hăm kơsô̆ jên jang hloh 1.000 ti hlj; Tơdrong jang tơjur hin dơnuh kơjăp sơđơ̆ng hlôi pơjao hloh 382 ti hlj; Tơdrong jang pơjing tơring pơsĕl 'nao hlôi pơjao hloh 927 ti hlj. 'Nguaih kơ jên mong teh đak, Đak Lăk hlôi hơvơn đei pơhlom 1.542 ti hlj lơ̆m 3 sơnăm 2021 - 2023 vă pơm jang tơdrong tơchơ̆t tơlĕch đơ̆ng teh đak gah pơjing tơring tơrang 'nao.

Ƀok Phạm Ngọc Nghị, Kơdră Anih pơgơ̆r vei lăng kon pơlei dêh char, Kơdră Jơnŭm pơgơ̆r jang kiơ̆ Tơchơ̆t tơlĕch đơ̆ng teh đak dêh char Đak Lăk sơkơ̆t hơdăh, dêh char gô adrin pơklaih tơnap tap oei đei, vă dôm tơdrong jang gơh đei jơnei kơjung hloh. Lơ̆m noh, gah teh bơ̆ hnam, teh choh jang lơ̆m tơring kon kông gô đei hơmet pơ-'lơ̆ng ăn kon pơlei kon kông gơh sơđơ̆ng tơdrong hơrih: “Dang ei kiơ̆ tơroi 'noh pơhlom 23% kon pơlei kon kông oei hin dơnuh lơ lơ̆m tơpôl kon pơlei kon kông, mă lei 65% kon pơlei kon kông oei lơ̆m unh hnam hin dơnuh kơ dêh char, minh kơsô̆ tih tên. Hin dơnuh 'noh đei lơ tơdrong mă adrol hloh noh đe adoi oei kơƀah teh choh jang, teh oei, ưh kơ măh dôm tơdrong vă kon pơlei tơlĕch pơm jang chă hơrih sa. Bơ̆n oei akŏm ăn tơdrong jang kon kông păng groi kông 'noh kăp gĭt hloh kơ Anih jang kơpal tơ̆ dêh char, Anih pơgơ̆r vei lăng kon pơlei, athei sek asong teh choh jang, teh oei ăn kon pơlei. Bơ̆n gơh jang lơ tơdrong mă kon pơlei adoi oei kơƀah teh choh jang, teh oei, ưh kơ măh lơ tơdrong vă pơm jang vă hơrih sa 'noh ưh đei kăp gĭt kiơ ôh”

Yơ̆ng âu ki, tơ̆ pơlei tơm Pleiku, adoi pơgơ̆r hop akŏm sơkơ̆t hơdăh găh tơdrong jang đei đơ̆ng pơm kiơ̆ Tơchơ̆t kơ Anih juăt jang kơpal hloh dêh char Gia Lai gah (hơtŏk tơdrong pơgơ̆r đơ̆ng rim jăl pơgơ̆r gah pơjing tơring tơrang 'nao lơ̆m tơpôl kon pơlei kon kông).  Kiơ̆ tơroi tơbang, 5 sơnăm kơ âu, rim tơring lơ̆m dêh char hlôi hơvơn đei hloh 1.500 ti hlj vă tơlĕch pơjing tơring tơrang 'nao lơ̆m tơring kon kông. Lơ̆m noh, jên mong teh đak đei jê̆ 1.300 ti hlj, jên đơ̆ng anih jang mŭk drăm tơgŭm đei jê̆ 24 ti hlj, jên kon pơlei chă tơgop hloh 153 ti hlj, jên mong đei 43,5 ti hlj. Đơ̆ng rŏng 5 sơnăm, dang ei jâ̆p dêh char đei 110 thôn, pơlei kon kông trŏ ƀlep hăm tơchơ̆t tơring tơrang 'nao, tơdrong hơrih kon pơlei roi năr roi đei hơtŏk.

Mă lei tơdrong pơm kiơ̆ 3 tơdrong jang mă teh đak tơchơ̆t ăn dôm dêh char Tây Nguyên adoi oei ƀơm lơ tơnap tap; minh ƀar tơdrong jang, tơchơ̆t tơlĕch tam mă iŏk jang păng jên asong tam mă đei kơlih tam mă đei tơdrong pơtho tơƀôh tôm tong đơ̆ng  Trung ương.

Tơdrong chă hơlen, sơkơ̆t hơdăh anih asong, sơkơ̆t hơdăh hơnăn pơm jang oei lơ pơsơ̆k pơsuơ̆l. Ƀok Trương Thế Vinh, kăn ƀô̆ jang gah kon kông tơ̆ apŭng Ia Grai, dêh char Gia Lai akhan, kăn ƀô̆ tơ̆ tơring tŏk bŏk ƀơm tơnap tap ƀơ̆t iŏk jang kiơ̆ tơchơ̆t tơlĕch: “Đei lơ hla bar pơtruh đơ̆ng dêh char tam mă tơtom pơtêng hăm iŏk pơm jang kiơ̆ tơlĕch, mă kăl tơ̆ tơring tam mă đei pơtho hơdăh. Mă kăl Tơdrong jang 1 tơgŭm gah hnam oei, teh oei, teh choh jang kiơ̆ tơchơ̆t kơsô̆ 04 đơ̆ng Thủ tướng teh đak 'noh tơgŭm teh oei hăm pơkăp 44 trĭu minh unh hnam păng teh choh jang 'noh 22 trĭu minh unh hnam, 'noh tơnap kơ iŏk jang. Teh choh jang ăn kon pơlei 'noh kơjă tôch măt, hăm kơsô̆ jên tơgŭm nhen tơ̆ kơpal păng jên tŏk iŏk thoi noh kon pơlei ưh kơ măh jên răt tôm hơgăt teh choh jang, bơ̆ hnam ôh”.

Tơ̆ Kon Tum, 'nao âu, hloh 1.000 đoan viên hơdruh tơdăm dêh char Kon Tum hlôi akŏm Tơdrong tơƀơ̆p pơma dơnuh hăm Kơdră Anih pơgơ̆r vei lăng kon pơlei dêh char, hăm hơnăn “Iŏk yua sơnong jang kơ đe hơdruh tơdăm lơ̆m tơdrong pơm kiơ̆ Tơdrong jang mă teh đak tơchơ̆t ăn dêh char Kon Tum”. Kơdră Anih pơgơ̆r vei lăng kon pơlei dêh char Kon Tum Lê Ngọc Tuấn sơkơ̆t hơdăh, âu jing dôm tơdrong kăp gĭt vă tơƀôh ăn đe mơlôh băt hơdăh lơ̆m pơm kiơ̆ dôm tơdrong jang tơm, tơgop jang đei jơnei sơnong jang mŭk drăm – tơpôl sơnăm 2023 kơ dêh char. Vă đe mơlôh Kon Tum tơgop lơ hloh dơ̆ng lơ̆m iŏk jang dôm Tơdrong jang mă teh đak tơchơ̆t, Kơdră Anih pơgơ̆r vei lăng kon pơlei dêh char Kon Tum Lê Ngọc Tuấn tơblang: “Anih juăt jang đoan tơ̆ dêh char, tơ̆ apŭng, pơlei tơm iŏk jang tơnăp dôm tơdrong pơm jang kăch mang jâ̆p jă jâ̆p jang, vă sơkơ̆t hơdăh, pơm jang đei jơnei kơjăp, gơh hơgei. Lơ̆m noh akŏm lơ̆m tơdrong tơroi tơbăt gah pơjing tơring tơrang 'nao, tơjur kơsô̆ unh hnam hin dơnuh, akŏm vang ming hơmet trong nơnăm nhen hơmet gơng, trong tơ̆ pơlei pơla. Pơjing dôm tơdrong tơguăt jang hadoi hơtŏk mŭk drăm ăn đe hơdruh tơdăm”.