Kơ iĕng Kơdră chĕp pơgơ̆r Kuô̆k hô̆i Nguyễn Khắc Định tơbăt, rim khôi luơ̆t đei Kuô̆k hô̆i pơdrơ̆ng kiơ̆ hlôi tơtom tơlĕch hơdăh trong bơ̆ jang đơ̆ng Đảng găh tơ iung pơjing păng pơm pơkeh trong bơ̆ jang, hơmet pơ ‘lơ̆ng tơtom dôm tơdrong tơnap tap, pơjing rơvơn hloh ăn kon pơlei, hơnih mơdro sa. Hơnih bơ̆ jang Khul kơdră Kuô̆k hô̆i athei Khul kơdră Teh đak athei Khul kơdră Teh đak, rim hơnih bơ̆ jang găh Khul kơdră Teh đak tơtom tơlĕch trong pơprŏ tơlĕch jang kiơ̆ khôi luơ̆t, tơdrong tơchơ̆t. Mă kăl, Tĕnh koăng pơjing, tơlĕch jang kiơ̆ rim hla bơar tơchơ̆t găh 104 tơdrong khôi luơ̆t pơjao ăn Khul kơdră teh đak, rim Hơnih tơm tơchơ̆t hơdăh, pơtho tơbăt jang kiơ̆ Khôi luơ̆t groi teh (hơmet ming): "Hơnơ̆ng pơjing păng tơlĕch jang kiơ̆ trong pơprŏ hơdăh vă hrôih tơlĕch rim trong tơchơ̆t lơ̆m rim khôi luơ̆t, tơdrong tơchơ̆t kơ Kuô̆k hô̆i lơ̆m hơrih sa. Mă kăl rim trong tơchơ̆t ‘nao, kăl, rim trong jang sơkơ̆t hơdăh đei jang kiơ̆ hrôih hloh pơtêng hăm tơdrong gơ̆h jang atŭm kơ Khôi luơ̆t. Tĕnh koăng pơjing păng tơlĕch jang kiơ̆ ‘moi kiơ̆ rim tơdrong tơchơ̆t hơdăh, pơtho tơbăt jang kiơ̆ hăm vă jê̆ 400 tơdrong đei pơjao lơ̆m rim khôi luơ̆t păng tơdrong tơchơ̆t. Sơđơ̆ng ăn rim tơdrong tơchơ̆t ƀlep, trŏ lăp hăm rim hla bơar tơchơ̆t khôi luơ̆t đei ƀơm truh, ưh kơ lê̆ hơgrop, pơjing đei dơ̆ng tơdrong tơhlăk tơhlĭn lơ̆m tơlĕch jang kiơ̆".

Kơ iĕng Thủ tướng Tehđak Trần Lưu Quang tơbăt, lăp đơ̆ng rŏng pơtôch rim ‘măng hop akom kơ Kuô̆k hô̆i, rim hơnih tơm, hơnih bơ̆ jang pơm tơm pơm tơlĕch rim khôi luơ̆t, tơdrong tơchơ̆t hlôi pơchoh trong pơtruh ăn Thủ tướng Teh đak tơchơ̆t tơlĕch jang kiơ̆ dăh mă tơlĕch jang kiơ̆, kiơ̆ gơ̆h jang rim Trong pơprŏ jang vă tơlĕch jang kiơ̆ rim khôi luơ̆t, tơdrong tơchơ̆t đei Kuô̆k hô̆i pơdrơ̆ng kiơ̆:"Vă tơchơ̆t hơdăh rim khôi luơ̆t, tơdrong tơchơt đei pơdrơ̆ng kiơ̆ tơ̆ ‘măng hop akŏm mă 6 păng hop akŏm hăt hot ‘măng mă 5, Khul kơdră Teh đak, Thủ tướng Teh đak, rim Kơdră dơnơm hơnih bơ̆ jang đei tơdrong jang tơlĕch jang kiơ̆ 56 hla bơar pơkăp, 29 Tơdrong Pơkăp, 5 Tơdrong tơchơ̆t păng 22 Tơdrong pơtruh ăn vă tơchơ̆t hơdăh 10 Khôi luơ̆t păng Tơdrong tơchơ̆t. Hrei au, rim hơnih tơm đei pơjao chĕp pơgơ̆r chih tơlĕch tŏk bŏk iung jang tơlĕch jang kiơ̆, kiơ̆ ƀlep tơdrong tơchơ̆t kơ Khôi luơ̆t pơm tơlĕch tơdrong pơkăp khôi luơ̆t hăm hơdrin kơtang vă sơđơ̆ng jang keh đang păng trŏ lăp hlŏh kơ rim hla bơar pơkăp".

Kơ iĕng kơdră Hơnih tơm vei lăng Mŭk drăm bri brăh păng Cham char Lê Minh Ngân tơbăt: Khôi luơ̆t Groi teh (hơmet ming) đei lơ tơdrong hle trŏ lăp hloh tơgop lơ̆m pơm pơkeh tơdrong tơchơ̆t, trong jang tơgŭm djru, atŏk iŏk jơnei lơ̆m vei lăng păng iok yua teh. Lăp đơ̆ng rŏng Khôi luơ̆t đei tơlĕch jang kiơ̆ Hơnih tơm hlôi akŏm pơm pơkeh rim hla bơar tơchơ̆t hơdăh,pơtho tơbăt jang kiơ̆ Khôi luơ̆t kiơ̆ gơ̆h jang: "Hăm khôi luơ̆t Groi teh, Hơnih tơm vei lăng Mŭk drăm bri brăh păng Cham char đei pơjao pơm tơlĕch 10 tơdrong, đei 6 Tơdrong tơchơ̆t păng 4 tơdrong tơchơ̆t đơ̆ng Hơnih jang tơm. Dang ei, rim hơnih jang tŏk bŏk pơm tơlĕch kiơ̆ ƀlep tơdrong tơchơ̆t kơ khôi luơ̆t, vă tơlĕch jang kiơ̆ ƀlep tơdrong gơ̆h jang dăh mă pơtruh ăn kơdră kơpal tơlĕch ăn lơ̆m khei 5 sơnăm 2024. Hơdrô̆ hăm Tơdrong tơchơ̆t găh tơdrong bơbĭt iŏk jih đak dơsĭ đei pơtruh ăn lơ̆m khei 3 sơnăm 2024 kiơ̆ hơmet pơ ‘lơ̆ng vă iŏk đei jơnei lơ̆m tơlĕch jang kiơ̆ đơ̆ng năr 1/4 kiơ̆ ƀlep tơdrong pơkăp hlôi đei tơchơ̆t hơdăh lơ̆m Khôi luơ̆t".

Vă iok đei jơnei tơdrong tơlĕch jang kiơ̆ rim Khôi luơ̆t, Tơdrong tơchơ̆t, Kơdră chĕp pơgơ̆r Hơnih bơ̆ jang Mŭk drăm Vũ Hồng Thanh athei Khul kơdră teh đak jang tơnăp lơ̆m pơrô̆ tơlĕch jang kiơ̆ rim hla bơar tơchơ̆t hơdăh jang kiơ̆ khôi luơ̆t lơ̆m sơnăm 2024, sơđơ̆ng ƀlep pơkăp, ‘lơ̆ng hăm rim khôi luơ̆t đei ƀơm truh ‘nao đei Kuô̆k hô̆i pơdrơ̆ng kiơ̆ nhen Khôi luơ̆t Groi teh, Khôi luơ̆t tĕch răt teh hnam, Khôi luơ̆t rim Hơnih mong, ăn tŏk iŏk jên: “Hăm Khôi luơ̆t Groi teh, Khôi luơ̆t tĕch răt teh hnam, Khul kơdră teh đak kăl jang tơnăp pơrô̆ tơdrong tơlĕch rim hla bơar pơkăp hơdăh jang kiơ̆ khôi luơ̆t lơ̆m sơnăm 2024; hrôih pơjao tơdrong jang tơklep hăm pơkăp hơdăh vă keh đang ‘lơ̆ng rim hla bơar pơkăp au; tơtom hơmet pơ ‘lơ̆ng dôm tơdrong rơvơn lơ̆m jang kiơ̆ Khôi luơ̆t Groi teh, Khôi luơ̆t Tĕch răt teh hnam păng rim hla bơar tơchơ̆t hơdăh; tơtom trŏ lăp hăm tơdrong ‘meh vă yan au, pơm hơtŏk jơnei vei lăng păng iŏk yua groi teh nhen trong hlôi tơlĕch ăn mưh pơm pơjing Khôi luơ̆t; Pơrô̆, dăr lăng rim hla bơar kơ khôi luơ̆t anai đei ƀơm truh athei hơmet ming, tơmơ̆t dơ̆ng tơdăh kăl".