VOV4.Bahnar - Dêh char Kon Tum đei trong sơ lam tĕh đak kơ jung hlŏh 292km tơ ter hăm 2 tĕh đak Lào păng Campuchia. Kŭm hăm vei kơ jăp tơ drong pơm tơm, pơ jing trong sơ lam rơ ngei hiôk hian, ‘lơ̆ng hơ iă, rim ‘măng Têt truh, kăn ƀô̆, linh vei lăng tơ ring sơ lam Kon Tum oei pơ gơ̆r lơ tơ drong jang chă hơ met têt ăn kon pơ lei, tơ iung jơ hngâm đon ‘mêm băl đơ̆ng linh hăm kon pơ lei tơ̆ tơ ring sơ lam tĕh đak.

Unh hnam mŏ Y Thêu, bơ ngai Jeh- Triêng tơ̆ plei Đăk Ga, xăh sơ lam Đăk Plô, apŭng Đăk Glei, dêh char Kon Tum jĭ 1 lơ̆m 12 unh hnam đei tơ drong arih xa tôch mơ mat tat. Yoa lơ tơ drong kơ na tơ drong arih xa kơ 5 ‘nu bơ ngai lơ̆m hnam hơ nơ̆ng kơ ƀăh kơ ƀôch. Vă jê̆ têt tơ drong hơ pơi 'mĕh tih hlŏh đơ̆ng unh hnam mŏ 'nŏh đei măh mai phe xa ƀa sŏng, mă ưh pơ̆n tơ chĕng truh bơ̆n ƀĕng chưng, ƀeng keo kiơ. Tơ drong hơ iă truh hăm unh hnam mŏ Y Thêu ƀât kăn ƀô̆, linh đơ̆ng Kơ đông vei lăng tơ ring sơ lam Đăk Blô truh ngôi tơ̆ hnam, pơ ma nuh, hơ păh ăn unh hnam tôm tơ mam yoa ƀât Têt. Kŭm hăm 'nŏh đe kăn ƀô̆, linh vei lăng tơ ring sơ lam oei krao unh hnam truh ngôi lơ̆m Năr pơm têt păng ƀơk ăn têt vă chĕp brŏk xa ngôi tơ̆ hnam.

Mŏ Y Thêu pơ ma: “Hnam nhôn tôch mơ mat gô têt truh mă lei ưgh đei yă kiơ vă pơ gơ̆r xa ngôi. Inh tôch bơ nê mưh iŏk đei tơ mam tơ gŭm. Sơ năm ‘nao truh bơih inh tôch hơ iă chă răt ngôi bơ̆n ƀĕng keo vă sơng xa têt kŭm hăm unh hnam, ngôi pơ chơt hơ dai hăm unh hnam”.

Kăn ƀô̆, linh vei lăng tơ ring sơ lam Kon Tum kŭm hăm kon pơ lei vang pơm Têt

Ưh đei lê̆ unh hnam yơ ưh đei têt ‘nŏh jĭ tơ drong tơ chơ̆t đơ̆ng kăn ƀô̆, linh 2 kơ đông linh Đăk Blô păng Sông Thanh pơm tơ̆ xăh Đăk Plô, apŭng Đăk Glei. Kŭm hăm tơ drong pơ ngơ̆t têt ăn kon pơ lei đơ̆ng anih jang Đảng, Dơ nŏ anih vei lăng kon pơ lei xăh Đăk Plô, 2 kơ đông linh vei lăng tơ ring sơ lam oei pơ jing trong jang hơ doi hăm Anih jang Đảng, khul kơ dră tơ ring pơ gơ̆r lơ tơ drong ngôi pơ chơt têt ăn kon pơ lei tơ̆ tơ ring sơ lam, hơ iă hlŏh jĭ tơ drong ngôi pơ chơt “Pơ yan Puih mak tơ nŏ jơ hngâm đon kon pơ lei” păng “Năr pơm têt”. Yă Y Thanh, Kơ dră vei lăng kon pơ lei apŭng Đăk Glei ăn tơ băt, apŭng đei 3 xăh sơ lam tơ ter hăm tĕh đak Lào, đei: Đăk Plô, Đăk Nhoong păng Đăk Long.

Gơ nơm dôm tơ drong jang đơ̆ng khul linh vei lăng tơ ring sơ lam pơ gơ̆r, kon pơ lei tơ̆ tơ ring sơ lam đei dơ̆ng tơ drong chơt hơ iă vă sơng xa têt, ngôi pơ chơt pơ yan Puih mak ‘nao: “Đe linh vei lăng tơ ring sơ lam tơ̆ dôm kơ đông kŭm hăm kon pơ lei tơ̆ tơ ring sơ lam chă pơ gơ̆r ngôi pơ chơt têt hơ dai. Kon pơ lei iŏk đei lơ tơ mam đơ̆ng đe linh kŭm hăm dôm khul jang đơ̆ng Anih chĕp kơ̆l pơ gơ̆r, đang kơ ‘nŏh jĭ Anih chĕp kơ̆l khul linh vei lăng tơ ring sơ lam truh ngôi kơ na kon pơ lei tôch hơ iă. Đơ̆ng nŏh pơ jing đei tơ drong pơ vei kơ jăp ‘lơ̆ng đơ̆ng linh hăm kon pơ lei tơ̆ tơ ring sơ lam. Kon pơ lei đei xa têt chơt hơ iă, 'nă hal”.

Vă tơ drong ngôi pơ chơt têt gơ̆h truh hăm đĭ đăng bơ ngai tơ̆ tơ ring sơ lam, Tết Nguyên đán Nhâm dần sơ năm ‘nâu, Anih chĕp kơ̆l pơ gơ̆r khul linh vei lăng tơ ring sơ lam dêh char Kon Tum athei hơ met kon jên răt, ƀơk 300 kĭ phe tơ yông ăn rim kơ đông linh vei lăng tơ ring sơ lam hăm 2 tĕh đak Lào păng Campuchia vă pơ gơ̆r Năr pơm Têt. Kăn ƀô̆, linh đơ̆ng dôm Kơ đông oei tơ gŭm jên kơ dih vă răt dôm tơ mam yoa kăl truh ngôi, tơ gŭm tơ tom ăn dôm unh hnam đei tơ drong arih xa mơ mat tat ưh đei lê̆ unh hnam yơ ưh đei têt. ‘Ngoăih kơ ‘nŏh, Tơ drong jang “Pơ yan Puih mak tơ nŏ jơ hngâm đon kon pơ lei” đei pơ gơ̆r tơ̆ đĭ đăng 13 xăh sơ lam kơ 4 apŭng Đăk Glei, Ngọc Hồi, Sa Thầy păng Ia H’Drai hăm lơ tơ drong jang tôch đei yoa vang pơm hơ tŏk tơ drong chơt hơ iă, ‘mêm băt băl đơ̆ng linh hăm kon pơ lei tơ̆ tơ ring sơ lam.

Đại tá Lê Minh Chính, Chính ủy Ƀô đô̆i vei lăng tơ ring sơ lam dêh char Kon Tum hơ păh tơ mam Têt ăn Khul kơ dră pơ gơ̆r păng kon pơ lei xăh Đăk Plô, apŭng Đăk Glei

Đại tá Lê Minh Chính, Chính ủy Ƀô đô̆i vei lăng tơ ring sơ lam dêh char Kon Tum ăn tơ băt: “Lơ̆m tơ drong jang ‘nâu pơ gơ̆r hloi lơ tơ drong, năm hơ pong hai, hơ păh tơ mam ăn dôm unh hnam đei kŏng, unh hnam tơ nuh hai, pơ gơ̆r lơ tơ drong tơ gŭm ăn unh hnam mơ mat tat hai. Atŭm hăm ‘nŏh pơ gơ̆r hơ ri hơ xoang, ngôi pơ chơt kră sơ̆ vă kon pơ lei đei jơ hngâm hưch hanh, ngôi pơ chơt pơ yan Puih mak ‘nao, vă rim bơ ngai đei xa têt chơt hơ iă ‘nă hal, ưh đei hŭt hơ chăng bu tơ̆ rŏng”.

Kŭm hăm jơ hngâm đon hơ iă sơng xa Tết Nguyên đán Nhâm dần 2022, tơ̆ tôch trong sơ lam tĕh đak kơ jung hlŏh 292km sơ lam hăm 2 tĕh đak Lào păng Campuchia, kon pơ lei tơ̆ 99 pơ lei, găh 13 xăh kơ 4 apŭng tơ̆ dêh char Kon Tum oei đei lơ tơ drong hơ iă, sơ đơ̆ng jơ hngâm mât lơ̆m sơ năm ‘nao. Truh dang ei đei 4/13 xăh sơ lam kơ dêh char Kon Tum jang kĕh tơ drong pơ jing tơ ring tơ rang ‘nao. Tơ drong arih xa kơ hlŏh 16.200 unh hnam, hăm 25 hơ drĕch hơ drung arih xa hơ dai roi đunh roi tŏk ‘lơ̆ng, kơ sô̆ unh hnam tơ nuh jur hrĕnh. Têt so kơ hơ drĕch hơ drung ‘nŏh jĭ jơ năr vă kăn ƀô̆, linh vei lăng tơ ring sơ lam Kon Tum kŭm hăm khul kơ dră tơ ring, kon pơ lei hơ met kơ jăp tơ drong tơ guăt 1 ƀơ̆r đon, mĭnh jơ hngâm vang vei kơ jăp tơ drong pơm tơm tĕh đak, vei sơ đơ̆ng tơ̆ tơ ring sơ lam păng jang atŏk tơ iung mŭk drăm, tơ pôl pơm hơ tŏk tơ drong arih xa ăn kon pơ lei tơ̆ tơ ring sơ lam tĕh đak.

Khoa Điềm: Chih

Dơ̆ng: Tơ blơ̆