Tơ̆ Đăk Lăk, đơ̆ng năr 6 trŭh năr 8/1, Tổng Liên đoàn Lao động Việt Nam jang hơdoi hăm Liên đoàn Lao động dêh char Đak Lăk pơgơ̆r tơdrong jang “Têt kông đoàn sơnăm 2023”. ‘Nau jing tơdrong jang tôch gĭt kăl tơgop lơ̆m vei lăng năng tông tơdrong erĭh sa ăn kŏng nhân, bơngai jang tơnap tap, ŭnh hnam dơnuh, vă hoei hơchăng hŭt tơ̆ rŏng mư̆h Têt trŭh, puih mak vih. Chĕp lơ tơmam drăm ‘nao chă răt lơ̆m jơnŭm kơchơ “Kơchơ Têt kông đoàn sơnăm 2023” ‘nhŏng Nguyễn Hữu Lâm Sơn, Kông nhân Công ty Thép Asean, hơnih jang kmăi kmŏk Hòa Phú  tơbăt:“Ĭnh sơng iŏk đei 2 kơphĭu 150.000 hlak jên ‘nŏh năm răt pŭk kơmưt au, tơmam drăm ăn đĕch 1 tŏ gŏ rơ̆ đak, 1 tŏ get chai đak rơmă păng mĭnh blăh ao.”

‘Măng mă blŭng năm tơ̆ kơchơ “Têt Kông đoàn”, mŏ Nguyễn Thị Phượng, kông nhân Công ty vei lăng cham char tơring kơdrơ̆m dêh char Đak Lăk akhan, tơdrong jang au tơgŭm ăn rim bơngai jang lơ̆m kŏng đoàn păng bơngai jang đei rơvơn chă răt lơ tơmam drăm Têt hăm kơjă re:“Sơnăm au, ‘nŏh sơnăm mă blŭng ba năm tơ̆ au sơng iok đei tơmam drăm au, ba tôch chơt hơ iă. Dôm tơmam drăm au tơgŭm ăn unh hnam nhôn đei sa Têt chơt hơ iă hlŏh.”

Kơchơ Têt Kông đoàn sơnăm 2023 dêh char Đak Lăk đei pơgơ̆r đơ̆ng năr 6 trŭh năr 8/1/2023, đei 40 hơdrơ̆r tơmam drăm, tĕch mơdro tôm tơmam drăm hăm kơ jă re dăh mă  “tơmam drăm tơgŭm ăn đĕch” ăn hlŏh 3.000 ‘nu kŏng nhân bơngai jang. Atŭm hăm ‘nŏh, Liên đoàn Lao động dêh char Đak Lăk jei pôk ăn 400 tơmam drăm ăn bơngai jang. Adoi pơgơ̆r rim tơdrong jŏh ayŏ, pơchơt pơ hiơ̆, rim tơdrong pơgơ̆r pơtho tơbăt khôi luơ̆t; khăm jĭ, tơbăt jơhngơ̆m jăn păng ƀơk pơgang ăn rim bơngai jang. Ƀok Nguyễn Công Bảo, Kơdră chĕp pơgơ̆r Liên đoàn Lao động dêh char Đak Lăk tơbăt:“Kơchơ Kông đoàn ‘nŏh jĭ trong pơgơ̆r vei lăng năng tông ăn bơngai jang. ‘Nau jing ‘măng mă blŭng Kông đoàn dêh char pơgơ̆r kơchơ Têt Kông đoàn, ‘măng blŭng nhôn tôch pơngơ̆t, mă lei hăm tơdrong tơgum djru đơ̆ng Tổng Liên Đoàn, tơdrong lăng ba đơ̆ng dơnŏ anĭh đảng dêh char, iung jang hơdoi đơ̆ng dơnŏ anĭh vei lăng kon pơlei păng rim hơnĭh jang ƀơm trŭh păng mă kăl ‘nŏh tơdrong hơdrin đơ̆ng ‘nhŏng oh kông đoàn rim hơnih, nhôn hlôi tơlĕch tơtom, chă hơvơn đei vă jê̆ 40 hơnih vang chă pơdă tĕch tơmam drăm. ”

Đăk Lăk ‘nŏh mĭnh lơ̆m 22 dêh char đei Tổng Liên đoàn Lao động Việt Nam rơ̆ih pơgơ̆r tơdrong jang “Kơchơ Têt Kông đoàn sơnăm 2023”. Kiơ̆ đơ̆ng yă Trần Thị Thanh Hà, kơdră jang lơ̆m Khŭl kơdră chĕp pơgơ̆r, Kơdră Dơnŏ anĭh Tơgoăt tơgoăl Jang kơ Tổng Liên đoàn Lao động Việt Nam, ‘nau jing tơdrong jang tôch ‘lơ̆ng hơ iă kơ khul Kông đoàn tơgop vang tơgŭm djru vă ŭnh hnam rim bơngai jang lơ̆m au, bơngai jang ŭnh hnam tơnap tap đei chơt hơ iă, sơng Têt phĭ tơtŏ dơnŏ ‘lơ̆ng:“Rim jơnŭm kơchơ Têt Kông đoàn sơnăm au đei pơgơ̆r đơ̆ng 30 trŭh 120 hơdrơ̆r tơmam drăm ăn rim tơring, tơ̆ au rim hơdrơ̆r tơmam drăm tơgŭm ăn đĕch păng mă kăl ‘nŏh Tổng Liên đoàn Lao động Việt Nam đei đơ̆ng 2500 trŭh 3000 vocher ăn mĭnh jơnŭm kơchơ păng mĭnh vocher ‘nŏh 300.000 hlak jên vă bơngai jang gơ̆h chă răt rim tơmam drăm tơ̆ hơdrơ̆r tơmam drăm păng mă kăl nhôn chă hơvơn lơ tơmam drăm đơ̆ng trung ương păng tơring tĕch mơdro dôm tơmam drăm ‘lơ̆ng hăm tơjur kơ jă đơ̆ng 10 trŭh 50-70% vă ăn bơngai jang đei Têt chơt hơ iă ‘nă hal”

Tơ̆ Hơnĭh pơm tơlĕch tơmam drăm Linh Trung 1, pơlei tơm HCM, Kông đoàn rim Hơnih pơm tơlech tơmam drăm hlôi pơgơ̆r “Năr lêh ‘mêm mơnat-Têt đoàn viên” sơnăm 2023, vă vei lăng năng tông mơjĭt rơbau ‘nu bơngai kŏng nhân tơnap tap. Năr lêh đei pơgơ̆r hơ iă. Kŏng nhân đei ƀơk ăn kơphĭu răt tơmam drăm tơgŭm ăn ŭnh hnam păng jơ ‘năr Têt. ‘Ngoăih kơ ‘nŏh, tơdrong pơgơ̆r au jei pôk ăn vĕ hao gre păr, vĕ hao gre treng, vĕ gre, tơmam drăm têt ăn kŏng nhân tơnap tap. Kŏng nhân Nguyễn Thị Thiết jang tơ̆ Kông ty Freetrend, pơlei Quảng Trị đei pôk ăn vĕ hao gre treng brŏk tơ̆ pơlei ăn pơđĭ lơ̆m ŭnh hnam, chơt hơ iă tơbăt:“ ‘Nau jing ‘măng mă blŭng ĭnh đei sơng iŏk vĕ ‘mêm kơ eng vă brŏk vĭh tơ̆ pơlei sa Têt đơ̆ng rŏng 3 sơnăm bơ̆ jang. Hăm vĕ au tơdăh ĭnh răt lei hlŏh 2 trĭu hlak jên bơih, dang ei đei ƀơk ăn vĕ au jĭ dă ƀiơ̆ tơhoach kon jên hao gre. Ư̆h khan lăp hơdrô̆ ĭnh gơ̆h vĭh, hăm vĕ au pơ đĭ ŭnh hnam nhôn 4 ‘nu bơngai jei gơ̆h brŏk vih tơ̆ pơlei sa têt hloi”.

Kiơ̆ tơchĕng hơlau kơ Kông đoàn Hơnĭh Pơm tơlĕch tơmam drăm găh Dơnŏ anĭh jang Kmăi kmŏk pơlei tơm Hồ Chí Minh gô vei lăng năng tông ăn hlŏh 30.000 ‘nu bơngai jang ‘moi kiơ̆ rim trong pơgơ̆r: Năr lêh kŏng nhân, Jơnŭm kơchơ ‘mêm kơ eng, Têt akŏm chơt hiôk, tơƀơ̆p mŭh măt kông nhân oei kơtă, pôk ăn vĕ gre păr, gre treng, gre, kăt sŏk, pơlong hơri karaoke…, hăm akŏp kon jên hlŏh 20 ti hlak jên.