Tang măt ăn kơdră chĕp kơ̆l Đảng, Tĕh đak, Thủ tướng đei nơ̆r jet gia pơma nuh păng nơ̆r hmach thơ thou sơnăm ‘nao hiôk sơđơ̆ng, ‘lơ̆ng rŏ, hơnŭk hơnoa păng pôk pơ ư, hơiă hăm dôm tơdrong jơnei mă khul Công đoàn, công nhân bơngai jang lơ̆m tĕh đak pơma atŭm, ‘nhŏng ŏh công nhân dêh char Phú Yên pơma adrô̆ hlôi iŏk đei lơ̆m dôm sơnăm âu ki.

Tơ̆ hơnăp kơnh, Khul kơdră tĕh đak vă pơtho ăn dôm anih tơm, anih jang kơpal tơrĕk, ‘măn tơmam, jên jang mă lăp vă sek tơlang dôm tơdrong kăl, pơm hơtŏk tơdrong arih xa ăn đe ‘nhŏng, mŏ, oh công nhân, bơngai jang. Tơ̆ âu, Thủ tướng Phạm Minh Chính păng Kơdră chĕp kơ̆l Tổng Liên đoàn Lao động Việt Nam, dêh char Phú Yên păng Anih Trung ương MTTQ Việt Nam hlôi hơpăh 220 tơpu tơmam Tết ăn đoàn viên, công nhân, bơngai jang rơgei, đei tơdrong arih xa mơmat tat, akŏm đĭ đăng đei kơjă dang 288 triu hlak jên.