Ƀơ̆t mă lơ̆m teh đak chơt hơ iă sơng sơnăm ‘nao 2023 păng pơyan puih mak Quý Mão vă jê̆ truh, Thủ tướng Phạm Minh Chính chhôk hơiă păng chhưu jơhngơ̆m vang truh akŏm Tơdrong jang “ Têt ngôi hơdai – Pơyan puih mak tơklep hơdai sơ năm 2023” hăm kŏng nhân, bơngai jang tơ̆ dêh char Phú Yên – tơring teh ‘lơ̆ng hơiă ƀĕnh tơdrong joăt joe kach mang. Thủ tướng pơma hơdăh, ‘nâu jĭ tơdrong jang hơdăh ‘lơ̆ng hăm bơngai jang ƀlep ƀơ̆t năr Têt truh, pơyan puih mak vih yua đơ̆ng kŏng đoan rim tơring pơgơ̆r.

Thủ tướng tơbăt, kŏng nhân dang ei đei kơ sô̆ dang 14% kơsô̆ kon pơlei, 27% khŭl bơ̆ jang tơpôl, rim sơnăm pơm đei hloh 65% kơjă akŏp tơmam tơpôl păng hloh 70% kơjă iŏk ăn jên jang teh đak, hŏk jrŭ, gơh jang, tơdrong jang kơmăy kơmŏk, đon băt pơm kiơ̆ ki luơ̆t roi ‘năr roi đei tơplih ‘lơ̆ng păng mơ̆t jang hơdai hăm apŭng plĕnh teh. Kơsô̆ kŏng nhân đei hŏk jrŭ, băt kơbăt khoa hŏk kơmăy kơmŏk hơgei tŏk lơ. Mă loi ‘noh, Thủ tướng chhưu jơhngơ̆m đei băt ƀơ̆t jĭ COVID-19 đei ƀôh, vă đĭ đăng đe ‘nhŏng đe mŏ oh kŏng nhân hlôi hơdrin, mơnat, vang tơgŭm hăm dôm tơdrong mơ mat tat đơ̆ng anih mơdro sa, hơdrin kŭm hăm lơ̆m teh đak tang găn jĭ hơbuh. Tơplih jing tơdrong hmă ‘nao, đe ‘nhŏng, đe mŏ oh kŏng nhân hlôi bơ̆ jang hloi, tôch kơ pơnam măng năr vă đei dôm tơmam hơnhăk hơnăn “made in Viet Nam” đei măt tơ̆ anih tĕch mơdro lơ̆m teh đak păng apŭng plĕnh:

“Ĭnh lui ngeh akhan, tơdrong chơt hơiă âu gô kiơ̆ jơ̆ng đe ‘nhŏng, đe mŏ oh kŏng nhân, bơngai jang vih hăm ŭnh hnam, vih tơ̆ dôm pơlei pơla vă vang pơm đei 1 Têt ƀĕnh tơdrong ‘mêm kơ eng păng hiôk hian. Oei dôm bơngai ưh kơ đei jơ rơvơn vih tơ̆ pơlei kŭm gô đei sơng 1 năr Têt chơt hơiă, tôm, vă đĭ đăng dai đei Têt tơnŏ hiôk mă ưh đei kơ bu đei hŭt lê̆ tơ̆ rŏng”.

Thủ tướng pơma hơdăh, têt joăt joe hơdrĕch hơdrŭng đei tơdrong ‘lơ̆ng gĭt kăl lơ̆m tơdrong arih sa jơhngơ̆m đon, jĭ ‘măng vă rim bơngai kon teh Việt lăng găh tơm a, yă ƀok sơ̆, vă đei oei hơdai kŭm ŭnh hnam, pơm tơdrong chhôk hơiă, đei dơ̆ng tơdrong ‘lơ̆ng vă yak mơ̆t lơ̆m sơnăm ‘nao hăm lơ đon lui, hơmĕng, yak truh dôm tơdrong ‘lơ̆ng hơiă hloh. Tơdrong vei lăng têt hơnhăk tơdrong ‘lơ̆ng, tơƀôh jơhngơ̆m đon tơgoăt tơgoăl, ‘mêm băl đơ̆ng hơdrĕch hơdrŭng bơ̆n.

Thủ tướng hlôh vao, ‘mêm mơnat tôch pơnĕh hăm dôm tơdrong mơmat tat, gleh hrat đơ̆ng kŏng nhân păng bơngai jang lơ̆m khei ‘năr âu ki. Tơ̆ hơnăp kơnh, Khul kơdră tĕh đak vă jang pran hlŏh dơ̆ng, hơnơ̆ng pơtho tơƀôh dôm anih tơm, anih jang kơpal, tơring tơrang, ‘măn tơmam, jên jang mă lăp vă sek tơlang dôm tơdrong kăl, pơm hơtŏk tơdrong arih ăn đe ‘nhŏng, mŏ ŏh kŏng nhân, bơngai jang. Lơ̆m nŏh, akŏm jơhngâm tơlĕch jang mă ‘lơ̆ng Tơdrong jang man 1 triu tŏ hnam oei lơ̆m tơpôl; atŭm hăm ‘nŏh, jăh tơlĕch trong jang mă hơdăh, đei yoa vă atŏk tơiung hnam oei ăn kŏng nhân. Tơdrong tơm ‘nŏh vă công nhân, bơngai jang đei xa yoa dôm tơdrong jơnei đơ̆ng jang atŏk tơiung tĕh đak; vă rim pơyan Tết truh gơ̆h jing jơnăr ngôi hơdai hiôk chơt đơ̆ng đe ‘nhŏng, mŏ, ŏh kŏng nhân, bơngai jang hăm unh hnam ‘mêm kơeng kơdih.

"‘Nâu gô jing tơdrong ‘lơ̆ng pran kơtang vă lăp đơ̆ng rŏng Têt, đe ‘nhŏng, đe mo oh bơ̆jang hơlơ̆k lơ̆k dơ̆ng hăm tơdrong chhôk hơiă, hơdrin jang đang ‘lơ̆ng dôm tơdrong hơgăt, hơnăp jang, tơgop hơtŏk tơiung anih jang mơdro sa, hơtŏk tơiung teh đak yua kơ tơdrong tơm kon pơlei pơdrŏng, teh đak pran, kon pơlei pơm tơm, hơtŏ hơnơ̆ng, hơgei, vă rim kon pơlei đei tơdrong arih sa roi ‘năr roi ‘lơ̆ng hloh. Ĭnh apĭnh gơih nơ̆r hmach thơ thâu sơnăm ‘nao hăm dôm tơdrong ‘mêm ‘lơ̆ng hơiă hloh truh đĭ đăng đe ‘nhŏng mŏ oh kŏng nhân, bơngai jang đei 1 Têt tơnŏ hiôk, ngôi hơdai, ƀĕnh tơdrong hiôk hian păng ‘mêm kơeng.”

Tang măt kơdră Đảng, teh đak, Thủ tướng gơih nơ̆r apĭnh gia păng nơ̆r hnamch thơ thâu sơnăm ‘nao hiôk ‘lơ̆ng păng pôk pơ ư, chih iŏk păng chơt hơiă dôm jơnei mă khŭl jang Công đoàn, kŏng nhân, bơngai jang lơ̆m teh đak pơma atŭm, ‘nhŏng mŏ oh kŏng nhân dêh char Phú Yên pơma hơdrô̆ hlôi iŏk đei lơ̆m dôm sơnăm âu ki, tơgop gĭt kăl lơ̆m jơnei atŭm kơ teh đak. Tơ̆ tơdrong jang Thủ tướng Phạm Minh Chính păng kơdră chĕp kơ̆l Tổng Liên đoàn Lao động Việt Nam, dêh char Phú Yên păng Anih jang Trung ương MTTQ Việt Nam hlôi pơjao 220 tơpu tơmam Têt ăn đoàn viên, kŏng nhân, bơngai jang hơgei hloh păng đei tơdrong arih sa mơmat tat, hăm akŏp kơ jă dang 288 triệu hlak jên./.