Pơma pơtôch hop akŏm, Thủ tướng Phạm Minh Chính hlôi pơjao tơdrong jang ăn rim anih tơm, anih jang kơpal, khul grŭp, anih tĕch mơdro păng hơnăp jang đơ̆ng tơring lơ̆m tơdrong mong akŏm jên, tơmam vă tơgŭm sut pơđĭ hnam hiăh hiok ăn unh hnam tơnuh păng vă jê̆ tơnuh.

Thủ tướng pơma hơdăh, tơdrong pơjei băl “Vang sut pơđĭ hnam pơm pơgia, hnam hiăh hiok lơ̆m teh đak sơnăm 2025” hlôi đei tơlĕch jang ‘lơ̆ng, ưh đei ƀôh jang vă pơtrŏ kiơ ră. Mă lei vă jang đei tơdrong sut pơđĭ hnam hiăh hiok lơ̆m teh đak ƀât hơtuch sơnăm 2025, hơiă kơ Hop akŏm lơ̆m teh đak ‘măng mă XIV kơ Đảng păng tơbăt 80 sơnăm năr Quốc khánh, 50 sơnăm tơblăh iŏk rơngei tơring Pơbăh, pơjing đei 1 teh đak kơjăp ‘lơ̆ng, athei tơplih ‘nao trong jang, bơ̆ jang mă pran ƀiơ̆, rơgei đei yoa ƀiơ̆.

Ƀât drâm kơsơ̆ brei mơ̆n, Thủ tướng Phạm Minh Chính sơng Bơngai tang măt ăn teh đak Trung Quốc tơ̆ Việt Nam, Hà Vĩ ƀlep ƀât sư pơtơm iŏk jang jăl jang tơ̆ teh đak Việt Nam.