VOV4.Bahnar - Pơ gê 17/2, Thủ tướng Phạm Minh Chính truh Hop akŏm pơ tôch tơ drong jang kơ tĕh đak hơ met pơ ‘lơ̆ng hiong răm đơ̆ng ƀôm mĭn đơ̆ng rŏng kơ tơ blăh tơ̆ Việt Nam đơ̆ng 2010 – 2020 păng trong vă jang đơ̆ng 2021 -2025. Đơ̆ng rŏng 10 sơ năm bơ̆ jang, tơ drong hơ met pơ ‘lơ̆ng hiong răm đơ̆ng rŏng tơ blăh pơ ma atŭm, lơ̆m nŏh đei hơ met pơ ‘lơ̆ng hiong răm đơ̆ng ƀôm mĭn hlôi đei bơ̆ jang tôch đei yoa păng iŏk đei lơ tơ drong jơ nei gĭt kăl.

Thủ tướng truh hop akŏm pơ tôch tơ drong jang hơ met pơ ‘lơ̆ng hiong răm đơ̆ng ƀôm mĭn

Akŏm đĭ đăng jên jang lơ̆m 10 sơ năm hlŏh 12 rơ bâu ti, lơ̆m nŏh, jên lơ̆m tĕh đak hlŏh 10 rơ bâu ti păng jên tơ gŭm đĕch đơ̆ng tĕh đak đe hlŏh 2 rơ bâu ti. Lơ tơ drong jang gĭt kăl pơ yoa ăn tơ drong jang atŏk tơ iung mŭk drăm, tơ pôl kơ tĕh đak đei tơ lĕch jang tơ̆ lơ tơ ring, hlôi pơm rơ gŏh ƀôm mĭn, tơ mam đôh. Hlŏh 5 rơ bâu ‘nu bơ ngai răm đơ̆ng ƀôm mĭn păng dôm bơ ngai pŭ răm đơ̆ng tơ drong nai đei tơ gŭm găh pơ gang, pơ tho tơ drong jang, chă tơ drong jang tơ gŭm kon tơ rong, ‘long pơ tăm vă atŏk tơ iung mŭk drăm hăm kơ sô̆ jên hlŏh 50 ti.

Dơ̆ng: Tơ blơ̆