‘Măng hop akŏm vă pơma dơnuh chă trong hơmet pơ ‘lơ̆ng mơmat tat, tơhlăk tơhlĭn găh hnam oei tơpôl, tơdrong tơlĕch jang, iŏk yua jang kiơ̆ tơdrong jang ‘nâu. Găh iŏk yua tơlĕch jang kiơ̆ tơdrong jang hnam oei tơpôl lơ̆m jăl jang đơ̆ng sơnăm 2021 truh dang ei kiơ̆ đơ̆ng akŏm tơroi tơbăt đơ̆ng dôm tơring, lơ̆m tơring  lơ̆m teh đak đei 503 tơdrong jang hnam oei tơpôl hlôi đei tơlĕch jang hăm 418.200 tŏ hnam, lơ̆m noh kơsô̆ tơdrong jang bơ̆jang đang ‘noh 75 tơdrong jang. Kơsô̆ tơdrong jang hlôi tơlĕch jang ming man ‘noh 128 tơdrong jang hăm 115.379 tŏ hnam; Kơsô̆ tơdrong jang hlôi đei drơ̆ng ăn tơmơ̆t jên jang ‘noh 300 tơdrong jang.

Pơma tơ̆ jơ hop akŏm, Thủ tướng Phạm Minh Chính pơma hơdăh, hơtŏk tơiung hnam oei tơpôl ‘noh jĭ tơdrong gĭt kăl đơ̆ng dôm tơdrong jang tơgŭm hơtŏk tơiung mŭk drăm - tơpôl, Khŭl jang chĭnh trĭ, rim kơdră, rim anih jang kăl kơ băt hơdăh hơnăp jang hơtŏk tơiung hnam oei ‘noh jĭ hơnăp jang chĭnh trĭ gĭt kăl kơ tơring, anih jang vă akŏm hloh dơ̆ng, kơtang hloh dơ̆ng, hơdrin jang đang mă đei tơdrong hơgăt kơsô̆ hnam oei tơpôl lơ̆m tơring hlôi tơlĕch ăn.