VOV4.Bahnar - Tơ drong jang “Kon rong kơ đông linh vei lăng tơ ring sơ lam” đei anih jang Đảng, Anih chĕp kơ̆l Ƀô đô̆i vei lăng tơ ring sơ lam tơ lĕch lơ̆m dôm sơ năm âu ki, hlôi iŏk tơ gŭm ăn vă jê̆ 3.000 'nu mon hŏk tro, hăm jên tơ gŭm ăn `1 'nu mon ‘nŏh 500.000 mĭnh khei klĕp truh hŏk lăm 12. Tơ drong 'nŏh tơ ƀôh hơ dăh jơ hngâm đon 'mêm kơ eng đơ̆ng ƀô đô̆i vei lăng tơ ring sơ lam hăm đe kon mon đei tơ drong arih xa mơ mat tat tơ̆ tơ ring sơ lam.

Mon Y Phú Mlô (bơ ngai M'nông), tơ̆ plei Đrang Phốk, xăh sơ lam Krông Na, apŭng Buôn Đôn, dêh char Dak Lak pơ ti mĕ đơ̆ng ‘lơ̆p, ƀă hŭt hơ chăng. Đei yă ƀok iŏk rong. Yoa yă ƀok đĭ kră pă kĕ choh jang bơih, tơ drong rong sâu tơ ƀâp lơ mơ mat tat. Tơ̆ hơ năp tơ drong mơ mat tat mon Y Phú, yŏng kơ đông linh vei lăng tơ ring sơ lam Srêpốk, găh Anih chĕp kơ̆l ƀô đô̆i vei lăng tơ ring sơ lam Dak Lak apinh iŏk mon pơm kon rong kơ đông linh.

Trung tá Đỗ Văn Nhương-Ƀok phŏ Khul chă krao hơ vơn kon pơ lei kơ đông linh Srêpốk tơ roi dơ̆ng: "Ƀât ‘nao truh mon tôch rơ mơ̆n, đơ̆ng rŏng khei ‘năr vei rong truh dang ei, mon tih vơ̆ djơ̆ ‘lơ̆ng, kơ jung, pran jăng, jâng ti tơ khĭl tơ khăl, jơ hngâm đon chơt rơ hău păng ưh đei hrơ mơ lou nhen adrol ki bơih. ‘Nhŏng ŏh nhôn adrin hơ met jơ năr vă pơ tho, rong mon, đơ̆ng pơ ma xa truh arih xa, nhôn iŏk jơ hngâm đon ‘mêm mơ nat vă rong kon jing bơ ngai đei yoa. Năng mon nhen thoi kon hơ ‘lơ̆p lơ̆m hnam, hơ pơi ‘mĕh ning mônh kon ‘lŏ, hlôh vao, jing bơ ngai đei yoa ăn tơ pôl".

Ƀô đô̆i vei lăng tơ ring sơ lam Dak Lak oei hơ tŏk tơ drong jang "Kon rong Kơ đông linh" .

Y Phú Mlô tơ roi: Đơ̆ng năr đei oei hăm ƀô đô̆i vei lăng tơ ring sơ lam, kơ dih kâu sŏng xa phĭ tơ nŏ, đei hŏk chư, hŏk iŏk dôm tơ drong trŏ ƀlep. Rim năr, đơ̆ng rŏng kơ jơ hŏk, ŏh đei truh hăm tơ drong ngôi pơ chơt, pơ tâp pơ hrăm jơ hngâm pran hăm ƀô đô̆i. Ưh hlôh ƀai đơ̆ng thây kô ăn pơm tơ̆ hnam ‘nŏh ŏh đei "đe ƀă hrŭk hơ băn ao linh" pơ tho tơ gŭm. Mưh năm hŏk ŏh oei đei đe ma iŏk gre hon đa chơ truh tơ̆ hnam trưng păng sơng vih tơ̆ kơ đông dơ̆ng. Oei hăm ƀô đô̆i, ŏh đei tơ drong arih xa phĭ tơ nŏ, ƀĕnh jơ hngâm đon ‘mêm kơ eng. Mon tơ roi: "Mĕ inh lôch bơih, yă ƀok ‘nŏh tôch tơ nuh, ưh đei pŏr sŏng vă rong inh. Ƀât ‘nao ‘lŏ ‘nŏh truh oei hăm đe ma linh vei lăng tơ ring sơ lam, đe ma ‘me sŏng xa phĭ, ngôi pơ chơt, đe ma chă pơ tho chư ăn kơ inh dơ̆ng. Sơ năm truh ‘nŏh mât hŏk lăm 1, inh vă adrin hŏk mă gơ̆h vă pơm hiôk jơ hngâm ăn yă ƀok păng đe ma tơ̆ âu."

‘Nao âu, Trung ương Đoàn TNCS Hồ Chí Minh jang hơ doi hăm Anih chĕp kơ̆l pơ gơ̆r Ƀô đô̆i vei lăng tơ ring sơ lam pơ gơ̆r tơ ƀâp đe hŏk tro rơ gei lơ̆m tơ drong jang “Kon rong ƀô đô̆i vei lăng tơ ring sơ lam”. Chơt hơ iă đei truh tơ̆ âu, ŏh Seo Thị Hoa, kon rong Kơ đông linh vei lăng tơ ring sơ lam Ƀô đô̆i vei lăng tơ ring sơ lam dêh char Nghệ An tơ roi: Hnam nhôn đei 4 ‘nu ‘nhŏng ŏh oei hăm yă đĭ kră bơih. Sơ năm 2014, Hoa đĭ đei đon vă pơ dơ̆h hŏk, tơ gŭm ăn yă vei lăng đe ŏh bơih, mă lei đei đe kăn ƀô̆ Ƀô đô̆i vei lăng tơ ring sơ lam iŏk rong, tơ gŭm ăn ŏh đei năm hŏk dơ̆ng păng hŏk roi hơ gei hai: “Đe ma hơ nơ̆ng năm ngôi tơ̆ hnam pơ tho ăn mon hŏk ƀai, păng pơ lung mon adrin hŏk pơ hrăm mă ‘lơ̆ng vă ning mônh kơnh gơ̆h pơm tơ plih tơ drong arih xa ăn kơ dih kâu. Mon adrin hŏk, khei ‘năr âu ki 4 sơ năm mon hơ nơ̆ng jing hŏk trong rơ gei tôm môn, păng 3 sơ năm mon jĭ hŏk tro rơ gei kơ apŭng găh môn văn hăm nơ̆r Anh”.

Tơ drong tơ ƀâp, pôk pơ ư “Kon rong Kơ đông linh” rơ gei

Đại tá Đỗ Quang Thấm-Phŏ chính ủy Ƀô đô̆i vei lăng tơ ring sơ lam dêh char Dak Lak ăn tơ băt, dôm sơ năm âu ki, tơ drong jang “Kon rong ƀô đô̆i vei lanwg tơ ring sơ lam” hlôi tơ gŭm ăn lơ mon bơ̆n tơ mam drăm păng jơ hngâm đon hai, tơ gop pơ jing tơ drong ‘lơ̆ng ăn đe mon đei hŏk pơ hrăm truh um. Tơ̆ hơ năp kơnh, Anih chĕp kơ̆l pơ gơ̆r Ƀô đô̆i vei lăng tơ ring sơ lam dêh char Dak Lak vă hơ nơ̆ng dăr lăng, pơih xă trong jang “Kon rong Kơ đông linh vei lăng tơ ring sơ lam” tơ̆ jơ̆p tơ ring lơ̆m dêh char: "Dôm sơ năm đơ̆ng rŏng dơ̆ng, năng kiơ̆ hơ năp jang đơ̆ng Ƀô đô̆i vei lăng tơ ring sơ lam, tơ drong mơ mat tat đơ̆ng kon pơ lei tơ̆ tơ ring sơ lam kŭm nhen tơ drong ‘lơ̆ng đơ̆ng tơ drong jang, nhôn vă hơ nơ̆ng pơ gơ̆r jang ‘lơ̆ng hlŏh tơ drong ‘nâu. Ƀô đô̆i vei lăng tơ ring sơ lam Dak Lak vă hơ nơ̆ng jang hơ doi hăm dôm anih jang kơ pal tơ̆ tơ ring, pơ gơ̆r hơ len năng, chih măt đe kon mon đei tơ drong arih xa mơ mat tat vă iŏk rong, tơ gŭm ăn đe kon mon đei năm hŏk truh um, pơ tho pơ hrăm jing kon pơ lei ‘lơ̆ng ăn tơ pôl."

Trong jang “Kon rong kơ đông linh vei lăng tơ ring sơ lam” yoa Anih chĕp kơ̆l pơ gơ̆r Ƀô đô̆i vei lăng tơ ring sơ lam tơ lĕch vă tơ gŭm ăn đe kon mon pơ nam hŏk, đei tơ drong arih xa mơ mat tat, pơ ti mĕ ƀă, ưh đei bơ ngai vei rong, kon hơ 'lơ̆p unh hnam đei kŏng tơ̆ tơ ring sơ lam, kiơ̆ đơ̆ng nŏh pơ jing tơ drong 'lơ̆ng ăn đe ŏh đei sŏng xa, hŏk pơ hrăm, tih vơ̆, ning mônh kơnh jing bơ ngai 'lơ̆ng, đei yoa ăn unh hnam păng tơ pôl. Kiơ̆ đơ̆ng tơ drong jang 'nâu, vang tơ gop pơm hơ tŏk tơ drong pơ vei 'lơ̆ng đơ̆ng linh hăm kon pơ lei tơ̆ tơ ring sơ lam, pơ jing đei tơ drong jang đĭ đăng kon pơ lei vang vei kơ jăp tơ ring sơ lam.

Dơ̆ng: Tơ blơ̆