Dôm bơ ngai tang măt pơ ma nuh lơ̆m grŭp găh Tơ drong tơ chơ̆t jang pơ long năng 1,2 tơ drong tơ gŭm hơ drô̆ vă atŏk tơ iung plt Buôn Ma Thuột, dêh char Dak Lak. Lơ nơ̆r akhan, kăl đei Tơ drong tơ chơ̆t găh jang pơ long năng 1,2 tơ drong tơ gŭm hơ drô̆ vă atŏk tơ iung plt Buôn Ma Thuột, yoa ‘nâu jĭ plt dơ̆ng tŏk bŏk tơ ring Tây Nguyên, tơ ƀưh hăm dôm tơ ring jang mŭk drăm pran tơ̆ Nam Trung Bộ, Đông Nam Bộ păng tơ ring kơ lang 3 pang Lào, Việt Nam, Campuchia; đei tơ drong ‘lơ̆ng vă jang mŭk drăm, jŏh ayŏ kơ dŏ xoang, păng đei anih dơ̆ng gĭt kăl găh mŭk drăm tơ pôl, vei lăng sơ đơ̆ng tĕh đak tơ̆ tơ ring Tây Nguyên păng jơ̆p tĕh đak.

Bơ ngai tang măt Trần Văn Tiến, khul tang măt Kuô̆k hô̆i dêh char Vĩnh Phúc pơ ma hơ dăh: “Tơ drong tơ lĕch tơ drong Tơ chơ̆t đơ̆ng Kuô̆k hô̆i găh jang pơ long năng 1,2 tơ drong tơ gŭm hơ drô̆ vă atŏk tơ iung plt Buôn Ma Thuột ‘nŏh tôch kăl, vă hơ tŏk hrĕnh tơ drong pơ jing Buôn Ma Thuột jing tơ ring kơ drâm tơm tơ̆ tơ ring Tây Nguyên păng jing jơ hngâm pran vă atŏk tơ iung mŭk drăm, tơ pôl tơ̆ Tây Nguyên, ‘nâu jĭ tơ ring tôch gĭt kăl lơ̆m tơ drong vei sơ đơ̆ng tĕh đak păng jing tơ ring đei lơ kon pơ lei kon kông oei xa, mă lei mŭk drăm tơ pôl ưh đei tŏk hrĕnh kơ na kăl đei 1 tơ drong tơ gŭm hơ drô̆ vă atŏk tơ iung mŭk drăm tơ pôl tơ̆ tơ ring âu.”

Kơ dră Anih vei lăng jên hu kơ Kuô̆k hô̆i Nguyễn Phú Cường pơ re hla ar chih tơ roi găh jang pơ long năng 1,2 tơ drong tơ gŭm hơ drô̆ vă jang atŏk tơ iung plt Buôn Ma Thuột, dêh char Dak Lak

Bơ ngai tang măt Lê Ngọc Hải, khul tang măt dêh char Dak Lak ‘nŏh pơ ma hơ dăh, hrei ‘nâu Buôn Ma Thuột oei ưh kơ măh păng tam mă pran ‘lơ̆ng găh lơ tơ drong, mă loi jĭ găh anih jang, trong nơ năm, yoa thoi nŏh tơ drong tơ chơ̆t kăl pơih xă tơ drong tơ gŭm hơ drô̆, mă ‘lơ̆ng vă sơng iŏk jên tơ mât jang ăn tơ ring âu: “Tơ drong tơ gŭm ăn dôm anih jang xa, kơ lih vă pơm tơ ƀưh trong yak tôch mơ mat, kơ na tơ drong dôm anih jang xa bơ̆ jang tơ̆ tơ ring Tây Nguyên kŭm nhen plt Buôn Ma Thuột tôch mơ mat, kiơ̆ inh kăl đei tơ gŭm thuê̆ ăn anih jang xa vă sơng anih jang truh hăm kon pơ lei kon kông tơ̆ Tây Nguyên vă jang atŏk tơ iung mŭk drăm tơ pôl mă ‘lơ̆ng. Kŭm nhen athei vei lăng tơ drong tơ proh trong jang păng tơ gŭm ăn dôm bơ ngai juăt jang khoa hŏk vă gơ̆h iŏk đei tơ drong rơ gei, vă bơ̆ jang tơ iung pơ jing plt Buôn Ma Thuột mă ‘lơ̆ng.”

Lơ nơ̆r pơ ma akhan, dôm tơ drong đei ƀơm truh tơ drong tơ gŭm hơ drô̆ găh jên hu, trong tơ mât jên jang kăl đei tơ chĕng hơ len mă ‘lơ̆ng, yoa đei 1,2 tơ drong tam mă lăp hăm trong tơ gŭm atŭm. Nhen găh tơ gŭm thuê̆, hrei ‘nâu oei đei tơ gŭm thuê̆ hăm anih jang xa păng lơ bơ ngai tơ̆ tơ ring mơ mat tat, mơ mat tat dêh hlŏh, mă lei mưh jang kiơ̆ tơ drong tơ gŭm lơ̆m Tơ drong tơ chơ̆t âu tơ dăh set hơ len kơ tă lơ̆m dêh char Dak Lak tơ tă tơ gŭm ăn tơ ring jang tŏk pran hlŏh, lơ tơ ring nai ưh đei tơ gŭm. Yoa thoi nŏh kăl đei tơ chĕng hơ len mă ‘lơ̆ng vă pơm lăp ‘lơ̆ng, hrơ̆ch hơ dai mưh tơ lĕch jang kiơ̆ luơ̆t đơ̆ng Kuô̆k hô̆i tơ lĕch.

Pơ ma truh tơ drong kăl pơ jing tơ drong ‘lơ̆ng vă sơng bơ ngai jang rơ gei ăn Buôn Ma Thuột, bơ ngai tang măt Đỗ Tiến Sỹ, Khul bơ ngai tang măt Kuô̆k hô̆i dêh char Hưng Yên akhan: “Tơ drong tơ chơ̆t bơ̆ jang lơ̆m 5 sơ năm, kiơ̆ inh kăl pơ dui đơ̆ng 7-10 sơ năm. Yoa ‘nŏh jĭ tơ ring tôch gĭt kăl nhen tơ drong Hơ găt 67 đơ̆ng Anih tơm Chinh trĭ. Tơ drong nai dơ̆ng ‘nŏh tơ gŭm hăm bơ ngai juăt jang khoa hŏk rơ gei truh bơ̆ jang tơ̆ dôm anih jang kơ pal, lơ̆m khei ‘năr bơ̆ jang tơ drong tơ chơ̆t ‘nâu đei tơ gŭm ưh kơ nôp thuê̆ mưh iŏk yoa lơ lơ̆m dang 5 sơ năm. Kiơ̆ inh vă pơ jing tơ drong ‘lơ̆ng sơng bơ ngai rơ gei truh jang ‘nŏh kăl đei dang 10 sơ năm tơ lĕch tơ drong tơ gŭm ‘mơ̆i.”

Bơ ngai tang măt Lê Tấn Tới (khul Long An), Kơ dră Anih vei lăng tơ drong sơ đơ̆ng tĕh đak

Pơ ma hơ dăh, hăm 4 grŭp tơ drong tơ gŭm đei tơ lĕch lơ̆m Hla ar chih tơ drong tơ chơ̆t găh trong jang tơ gŭm hơ drô̆ ăn plt Buôn Mê Thuột, Nguyễn Tuấn Anh, bơ ngai măt (khŭl Long An) akhan, tơ dăh Tơ drong tơ chơ̆t ‘nâu đei Kuôk hô̆i drơ̆ng nơ̆r, ‘nâu gô jing ‘măng mă blŭng Kuôk hô̆i tơ chơ̆t trong jang tơ gŭm hơ drô̆ ăn 1 plt ‘noh jĭ anih bơ̆ jang kơ apŭng, yoa thoi noh bơ ngai tang măt ‘meh vă dôm nơ̆r apĭnh, athei đơ̆ng bơ ngai tang măt Kuôk hô̆i kŭm nhen bơ ngai tah hla gô đei tơ chĕng hơ len, chih tơ mơ̆t dơ̆ng vă gơh pơ jing jing 1 tơ drong jang pơ long lăng kĕ hơ tŏk tơ iung ăn rim tơ ring nai. ‘Ngoăih kơ 4 grŭp tơ drong tơ gŭm hlôi đei tơ lĕch ăn lơ̆m hla ar chih ming tơ drong tơ chơ̆t, bơ ngai tang măt Nguyễn Tuấn Anh athei Khŭl chih hơ met ming hơ len lăng dơ̆ng 1,2 nơ̆r athei đơ̆ng bơ ngai tah hla plt. Mă hơ dăh, pơ jao kơ Jơ nŭm pơ gơ̆r kon pơ lei plt gơh tơ chơ̆t hơ met jên jang kơ plt vă tơ lĕch thim jên iŏk yua ăn kăn ƀô̆ jang teh đak găh anih vei lăng teh đak, anih jang chĭnh trĭ tơ pôl păng anih bơ̆ jang kơ teh đak yoa đơ̆ng plt vei lăng, kiơ̆ tơ drong đei yoa mư̆h jang tơ drong jang ‘ngoăih kơ kla thim jên tơ gŭm kiơ̆ tơ drong hơ găt đơ̆ng khôi luơ̆t tơ lĕch găh trong vei lăng ‘lơ̆ng tơ drong jang ‘moi kiơ̆ tơ drong hơ găt đơ̆ng luơ̆t hrei ‘nâu găh trong chă jên jang kơ dih hăm dôm anih jang kơ tĕh đak. Trong jang ‘nâu kŭm nhen Kuô̆k hô̆i asong jang tơ̆ tơ drong Tơ chơ̆t 54 sơ năm 2014 găh jang pơ long năng tơ drong tơ gŭm hơ drô̆ vă atŏk tơ iung plt HCM.

Lăp đon hăm 4 tơ drong tơ gŭm hơ drô̆ ăn Buôn Mê Thuột, Lê Tấn Tới, bơ ngai tang măt (khŭl Long An), Kơ dră chĕp kơ Anih vei lăng sơ đơ̆ng teh đak, kŭm apĭnh tơ mơ̆t dơ̆ng tơ drong tơ gŭm vă hơ tŏk tơ mam, jên ăn tơ drong vei lăng sơ đơ̆ng teh đak ăn plt yoa kơ Buôn Mê Thuột tơ̆ tơ ring Tây Nguyên, ƀơ̆t mă Tây Nguyên đei anih jang găh vei lăng sơ đơ̆ng teh đak gĭt kăl, ưh khan lăp tơ̆ găh hơ lĕch mă pơ đĭ hloi găh pơ mơ̆t kơ teh đak, thoi noh trong jang tơ gŭm hơ drô̆ vă hơ tŏk tơ iung mŭk drăm tơ pôl kơ Buôn Mê Thuột ‘noh tôch kơ gĭt kăl mă lei kăl kơ jang hơ dai hơ tŏk tơ iung mŭk drăm păng vei lăng sơ đơ̆ng teh đak, yoa kơ vei đei sơ đơ̆ng đei teh đak ‘mơ̆i mă gơ̆h hơ tŏk tơ iung đei mŭk drăm. Yoa thoi noh, bơ ngai tang măt Lê Tấn Tới apĭnh kăl kơ đei pơ đĭ hloi tơ drong jang tơ gŭm hơ drô̆ hăm khŭl linh kŏng an, ƀô̆ đô̆i tơ̆ tơ ring ‘nŏh hai.