VOV4.Bahnar - ‘Nao âu, tơ̆ plt Buôn Ma Thuột, dêh char Dak Lak, Khul linh so Việt Nam pơ gơ̆r Hop akŏm khul linh so vang vei lăng cham char, hăm tơ drong vang akŏm đơ̆ng bơ ngai tang măt ăn dôm khul linh so tơ̆ 14 dêh char, plt tơ ring Tŏk bŏk - Tây Nguyên. ‘Nâu jĭ jơ năr vă dôm khul grŭp, kăn ƀô̆, linh so chă pơ ma nuh găh tơ drong kăl, hŏk pơ hrăm, pơih xă dôm trong jang hơ iă, đei yoa tơ gop ‘lơ̆ng ăn dôm tơ drong jang atŏk tơ iung mŭk drăm, tơ pôl tơ klep hăm vei lăng cham char.

Kiơ̆ Khul linh so Việt Nam, đơ̆ng sơ năm 2006, Khul kŭm hăm Anih tơm vei lăng tơ mam drăm, cham char kĭ pơ kăp lơ tơ drong jang hơ doi găh vei lăng cham char păng vei lăng tĕh. Truh dang ei, rim khul grŭp pơ jing đei 1.650 grŭp linh so vang vei lăng cham char. Dôm grŭp iŏk bơ̆ jang tơ păt tơ drong vang vei lăng cham char, vang krao hơ vơn, roi tơ băt tơ drong jang ‘nâu hai. Lơ grŭp roi tơ băt găh tơ drong vei lăng cham char tơ̆ xăh hlôi đei khul linh so pơ jing păng bơ̆ jang tôch đei yoa.

Tơ̆ jơ pơ ma nuh, dôm bơngai tang măt vang tơ blang, pơ ma hơ len găh dôm tơ drong mă khul linh so vang bơ̆ jang vei lăng cham char, chih iŏk dôm tơ drong kăl lơ̆m tơ drong roi tơ băt, krao hơ vơn kon pơ lei; hơ tŏk đon hlôh vao ăn đe linh so, tưk tơ iung hơ năp jang vei lăng cham char.

Ƀok Trần Quế Lâm, găh Khul linh so xăh Ea Kly, apŭng Krông Pach, dêh char Dak Lak đei nơ̆r pơ ma: “Nhôn tơ chĕng athei roi tơ băt mă rơ đăh ăn kon pơ lei, ăn tơ pôl, dôm anih tĕch mơ dro, dôm hnam trưng. Đĭ đăng anih jang đơ̆ng khul tơ pôl truh unh hnam adoi đei đon hlôh vao păng hơ tŏk tơ năp jang kơ dih lơ̆m tơ drong hơ met râm rĕk păng vei lăng cham char. Athei băt vei lăng cham char ‘nŏh jĭ vei lăng tơ drong arih xa kơ dih bơ̆n vă gơ̆h bơ̆ jang ‘lơ̆ng ƀiơ̆. Kiơ̆ đơ̆ng nŏh athei hơ tŏk dơ̆ng hơ năp jang đơ̆ng anih jang đảng, dôm khul vei lăng kơ dih, tơ̆ rim anih jang chinh trĭ tơ pôl lơ̆m Grŭp Mặt trận vă bơ̆ jang, pơm ăn rim bơ ngai vang vei lăng cham char”.

Dôm bơ ngai tang măt oei akhan, tơ drong pơ jing păng pơih xă trong jang vei lăng cham char athei năng jing 1 tơ drong hơ găt vă hơ len năng khul jang tơ̆ tơ ring hăm jang kĕh tơ drong jang đei pơ jao ưh. Đơ̆ng noh roi tơ rĕk truh tơ drong pơ tâp pơ hrăm, pơ tho tơ ƀôh găh tơ drong vei lăng cham char ăn rim bơ ngai jang lơ̆m khul linh so.

Đơ̆ng rŏng kơ hop akŏm, dôm bơ ngai tang măt năm dăr lăng 1,2 trong jang vei lăng cham char đơ̆ng đe linh so tơ̆ xăh Ea Bhôk, apŭng Cư Kuin, dêh char Dak Lak. Đei pơ jing đơ̆ng sơ năm 2020, Grŭp khul linh so vei lăng cham char thôn 1, xăh Ea Bhốk đei lơ tơ drong tơ gop gĭt kăl lơ̆m tơ drong jang roi tơ băt, pơ lung bơ ngai jang lơ̆m khul păng kon pơ lei tưk tơ iung tơ drong jang "Pơ lei pơ la rơ gŏh, mir na jing ‘lơ̆ng". Kiơ̆ kơ ‘nŏh, Khul kơ dră vei lăng Grŭp pơ jao tơ drong jang ăn rim bơ ngai bơ̆ jang lơ̆m năr, vei rơ gŏh cham char tơ̆ tơ ring; tơ tom tơ tă ăn dôm unh hnam lê̆ hŭt râm rĕk kư̆ kă; krao hơ vơn kon pơ lei pơm hơ drong rong kon tơ rong hơ tăih kơ hnam oei.

Kăl loi, rim khei, kon pơ lei tơ̆ plei pơ gơ̆r vang hơ met rơ gŏh cham char, hơ met rơ gŏh trong pơ lei, chong hơ met bơ̆n ‘ngiĕt tơ̆ jih trong. Hăm râm rĕk lơ̆m tơ drong arih xa rim năr, Khul kơ dră chĕp kơ̆l Grŭp pơ ma nuh hăm Khul vei lăng pơ lei, drơ̆ng nơ̆r athei kon pơ lei kĭ pơ kăp hăm công ty vei lăng cham char apŭng vă thu mong râm rĕk 2 ‘măng lơ̆m 1 giĕng, jên thu mong ‘nŏh 30.000 hlak jên 1 unh hnam 1 khei.

Ƀok Phan Văn Tịnh, Kơ dră vei lăng Khul linh so xăh Ea Bhốk tơ roi, tơ̆ xăh dang ei pơ jing 3 Grŭp linh so vei lăng cham char. Tơ drong hơ iă ‘nŏh đơ̆ng đei pơ jing truh dang ei dôm grŭp âu bơ̆ jang tôch tơ năp kơ na kon pơ lei ưh pă đei hŭt râm rĕk kư̆ kă, hơ bong đak ro ‘lơ̆ng, ưh đei chĭl kiơ, cham char rơ gŏh ‘lơ̆ng, ưh pă đei anih ‘mê̆ ‘mach đơ̆ng hŭt râm rĕk kư̆ kă. Găh noh dơ̆ng, kiơ̆ đơ̆ng pơ gơ̆r lơ tơ drong jang vei lăng cham char, pơm ăn kon pơ lei vang jang tôch tơ năp, mă loi ‘nŏh hăm jơ hnơr mơ lôh.

Truh dang ei, lơ̆m dêh char Dak Lak pơ jing đei 16 grŭp linh so vei lăng cham char. Kiơ̆ đơ̆ng noh dôm khul grŭp păng bơ ngai jang băt hơ dăh tơ drong gĭt kăl đơ̆ng tơ drong jang vei lăng cham char; hơ tŏk hơ năp jang đơ̆ng Khul linh so tơ̆ jơ̆p tơ ring lơ̆m tơ drong jang vei lăng cham char.

Gơ̆h pơ ma ma, dôm trong jang linh so vei lăng cham char tơ̆ Dak Lak đei pơ jing, blŭng a hlôi sek tơ lang ‘lơ̆ng tơ drong cham char ‘mê̆ ‘mach tơ̆ tơ ring kon pơ lei oei. Kiơ̆ đơ̆ng noh, hơ nơ̆ng tơ ƀôh hơ năp jang, anih dơ̆ng đơ̆ng đe linh so lơ̆m tơ drong jang vang pơ jing tơ ring tơ rang ‘nao, vei lăng cham char rơ gŏh ‘lơ̆ng, tưk tơ iung tơ drong jang mŭk drăm, tơ pôl tơ̆ tơ ring.

Dơ̆ng: Tơ blơ̆