Sơnăm 2023 au ki, Chi ƀô̆ pơlei Chư̆, tơring Ya Ly, apŭng Sa Thây pôk tơmơ̆t dơ̆ng ƀar ‘nu đảng viên ‘nao bơngai Jrai ‘noh A Nŏi hăm Phạm Quang Anh. Ƀĭ thư Chi ƀô̆, jang hloi Thôn trơng pơlei Chư̆, ƀok A Thoải tơbăt, Chi ƀô̆ hlôi ăn pêng ‘nu kon pơlei hơrih sa ‘lơ̆ng kơ bơngai Jrai ‘noh: Y Phư, A Hlưm păng A Num năm hŏk lăm găh Đảng. Pơ đĭ pêng ‘nu bơngai au jĭ dôm bơngai jang sa hơgei adoi nhen jang ‘lơ̆ng lơ̆m tơdrong jang tơ iung pơjing tơring tơrang ‘nao. Kiơ̆ đơ̆ng Ƀĭ thư Chi ƀô̆ A Thoải, ‘meh vă kon pơlei mơ̆ng kiơ̆, lui kiơ̆ păng pơm kiơ̆ lei rim bơngai đảng viên kăl jang sa hơgei, yŭk trong hơlau lơ̆m rim tơdrong jang kơ pơlei: “Sơnăm au ki, Chi ƀô̆ nhôn hlôi pôk tơmơ̆t dơ̆ng đei 2 ‘nu đảng viên ‘nao, lơ̆m vă đĭ sơnăm ‘nŏh đei dơ̆ng 1 ‘nu. Nhôn hlôi ăn 3 ‘nu bơngai năm hŏk vă pôk tơmơ̆t jang lơ̆m Đảng. Lơ̆m sơnăm gô tơmơ̆t đei lơ hloh nơ̆r pơkăp 5 ‘nu. Gơnơm tơdrong lăng ba, pơrô̆ iung jang kơtang, hơlêm tơtom kơna mă iŏk đei jơnei lơ lau. Hrei au, nhôn tŏk bŏk hơnơ̆ng tơlĕch jang tơ iung pơjing tơring tơrang ‘nao, kăl hơbĕch hơbal, pơrô̆ pơrôp trŏ lăp, tơgoăt tơgoăl mĭnh nơ̆r ƀơ̆r đon ‘lơ̆ng hơ iă. Tơ iung pơjing tơring ‘nao kăl hơnhăk đei iŏk jơnei tơpă. Teh đak hlôi lăng ba kơjăp, bơ̆n kăl hơdrin hloh dơ̆ng, ưh kơ gơ̆h gơnang gôchang Teh đak, kơdih bơ̆n kăl hơdrin yak hloh tơnap tap. Đơ̆ng rŏng au, kôn mon kon sau bơ̆n đei iŏk yua sa yuơ, trong nơnăm hlôi đei, hơrih sa sơđơ̆ng ‘lơ̆ng hơ iă, tơdrong mă au bơ̆n tŏk bŏk lăng truh”. 

          Đảng bộ tơring Ya Ly, apŭng Sa Thây hrei au đei 9 Chi ƀô̆ hăm 81 ‘nu đảng viên, lơ̆m au 34 ‘nu đảng viên bơngai kon kông. Đơ̆ng blŭng jăl jang truh dang ei, rim Chi ƀô̆ găh Đảng ƀô̆ tơring Ya Ly hlôi atŏk tơ iung đei 22 ‘nu đảng viên ‘nao. Hơdrô̆ sơnăm 2024 Chi ƀô̆ kơ pêng pơlei: Chư̆, Tum, Chờ gô vă atŏk tơ iung đơ̆ng 5- 7 đảng viên ‘nao ‘noh bơngai kon kông kơtă.

Ƀĭ thư Đảng tơring Ya Ly Phan Chí Thiện, tơbăt: ‘moi kiơ̆ rim ‘măng hop akŏm, tơdrong pơgơ̆r kơ kon pơlei, kơdră đảng tơring, chi ƀô̆ păng rim đảng viên jei hơdrin chă lăng hơlen, ƀôh băt bơngai jang sa hơrih sa ‘lơ̆ng lơ̆m pơlei pơla. Vă Chi ƀô̆ pran kơtang, tơgoăt tơgoăl akŏm kon pơlei lơ̆m tơdrong jang atŏk tơ iung đảng viên ‘nao kăl chă rơih đei dôm bơngai ‘lơ̆ng lơ̆m hơrih sa kơ ‘năr păng jang sa. Adoi lăng ba kơjăp, pơtho tơbăt, pơtho khan ăn jơhnơr mơlôh, đei hŏk lăm lơ. Ƀĭ thư Đảng tơring Ya Ly, ƀok Phan Chí Thiện sơkơ̆t hơdăh, gơnơm tơ iung pơjing Chi ƀô̆, Đảng ƀô̆ pran kơjăp iăp kơtang, atŏk kơtang đei hơnăp jang, sơnong jang kơ rim đảng viên, mă kăl tơ̆ 3 pơlei kon kông, truh đĭ sơnăm 2023 tơring Ya Ly, apŭng Sa Thây hlôi jang keh đang 19 lơ̆m 19 trong tơlĕch jang tơ iung pơjing tơring tơrang ‘nao:“ ‘Moi kiơ̆ rim đảng viên lơ̆m Khul Kơdră chĕp pơgơ̆r Đảng, đảng viên tơ̆ Chi ƀô̆ jang hloi thôn trơng, đảng viên tơ̆ rim pơlei tơgum djru tôch kơ lơ ăn Đảng uỷ tơring lơ̆m tơlĕch jang kiơ̆ rim trong bơ̆ jang đơ̆ng Đảng, khôi luơ̆t Teh đak. Mă hơdăh, lơ̆m sơnăm au ki nhôn jang tơring tơrang ‘nao chă pơrô̆ hơvơn kon pơlei plang ăn teh, pơm trong, tơgŭm năr jang, pơjing pơlei pơla rơgoh ‘lơ̆ng, hơnăp jang kơ đảng viên rim Chi ƀô̆ jĭ tôch kơ gĭt kăl”.

Sơnăm 2023 Đảng ƀô̆ apŭng Sa Thầy, dêh char Kon Tum hlôi pôk tơmơ̆t đei 97 ‘nu đảng viên ‘nao, jơnei 102% pơtêng hăm trong tơlĕch jang, pơm hơtŏk măt bơngai đảng viên lơ̆m Đảng ƀô̆ đei truh 2.033 ‘nu đảng viên. Truh dang ei, đĭ đăng 64 pơlei pơla lơ̆m apŭng hlôi jang keh đang tơdrong pơjing đei kơchư̆k Ƀĭ thư Chi ƀô̆ jang hloi thôn trơng dăh mă Kơdră chĕp pơgơ̆r Khul jang măt trân pơlei. Yă Y Sâm, Kơ iĕng kơdră chĕp pơgơ̆r Đảng, Kơdră chĕp pơgơ̆r Jơnŭm vei lăng kon pơlei apŭng Sa Thây tơbăt, vă rim ‘nu bơngai mơlôh oei tơ̆ rim pơlei pơla đei hŏk lăm lơ, gơ̆h hơgei ‘meh vă mơ̆t jang lơ̆m khul Đảng, Hơih Đảng apŭng Sa Thây lăng kơjăp tơdrong tơ iung pơjing Chi ƀô̆ pran kơtang tơklep hăm mŭk drăm-tơpôl tơring choh jag sa atŏk tơ iung:“Nhôn lăng ba kơjăp truh tơdrong atŏk tơ iung đảng viên tơ̆ tơring choh jang sa păng mă kăl ‘noh tơdrong atŏk tơ iung đảng viên bơngai kon kông. Nhôn atŏk kơtang tơ iung pơjing mŭk drăm ŭnh hnam tơring kon kông ‘noh akŏm lơ̆m tơplih ‘long pơtăm, yŏng kon tơrong vă kon pơlei lui yom kơjăp hăm tơdrong jang chĕp pơgơ̆r, pơrô̆ jang đơ̆ng Đảng. Hloh đơ̆ng tơdrong pơm ăn jơhnơr mơlôh hơdăh tơdrong jang đơ̆ng Đảng, kơdră chĕp pơgơ̆r lăng tông nông gia kơjăp truh tơdrong atŏk tơ iung mŭk drăm ŭnh hnam adoi nhen tơdrong tơ iung pơjing khul kang ƀô̆ sơnăm mơlôh. ‘Moi kiơ̆ đơ̆ng noh, nhôn pơjing khul, pơtho pơhrăm ming ăn jơhnơr mơlôh vă pôk tơmơ̆t jang lơ̆m Đảng”.

Đơ̆ng tơdrong tơ iung pơjing Chi ƀô̆ pran kơjăp iăp kơtang tơklep hăm mŭk drăm-tơpôl atŏk tơ iung, kiơ̆ nơ̆r hơlen đơ̆ng Hơnih Đảng apŭng Sa Thây tơƀôh hơdăh trong bơ̆ jang đơ̆ng chi ƀô̆ tơ̆ rim pơlei pơla đei tơplih ‘nao, ‘lơ̆ng hơ iă hloh. Jĭ apŭng sơlam teh đak kơ dêh char Kon Tum hăm trong iung jang blŭng a găh tơdrong mŭk drăm-tơpôl đei lơ tơdrong tơnap tap mă lei truh đĭ sơnăm 2023 apŭng Sa Thây hlôi đei 4 tơring iŏk đei jing tơring tơrang ‘nao, jang sa iŏk đei jô̆ hơtŏ măt bơngai đei 52 triu hlak jên. Lơ̆m apŭng đei 54/64 thôn, pơlei đei drơ̆ng nơ̆r “Thôn, Pơlei hơrih sa ‘lơ̆ng”./.