Tơdrong đei jơnei đơ̆ng Khul ming man pơlei Tuôr B tơ-iung đei dôm trong jang ‘nao lơ̆m pơtho tơdrong jang, xek axong tơdrong jang tơ̆ dôm tơring teh pơxĕl, tơring kon pơlei kon kông tơ̆ dêh char Đăk Lăk.

Nhem lăng hnam vă jê̆ keh đang, yă H’Vin Byă (oei krao noh Amí Bó), tơ̆ xăh Đray Sáp, apŭng Krông Ana, dêh char Đăk Lăk ăn tơbăt, hnam man huach hloh 700 trĭu hlj. Kơsô̆ jên mong đơ̆ng lơ xơnăm kơ bre klo hơkăn noh yă ƀok kơchăng lơ̆m tơdrong rơih um ai, tơmam ming man. Tơdrong man hnam đei unh hnam lui ngeh pơjao ăn Khul ming man pơlei Tuôr B, adoi jing đe ‘nhŏng oh lơ̆m pơlei. Amí Bó tơroi:  “Adrol hloh noh, inh bơnê kơ đe kang ƀô̆ tơ̆ apŭng hlôi pơtho tơdrong jang ăn kon mon inh. Kon mon inh hlôi vih tơ̆ âu man hnam ăn kơ inh. Inh chơt hơ-iă kơlih kon xâu lơ̆m pơlei hlôi man ăn kơ nhôn minh pôm hnam guăng ‘lơ̆ng” 

‘Nhŏng Y Kun Kbur, kơdră Khul ming man pơlei Tuôr B, xăh Dray Sáp ăn tơbăt, đei pơjing đơ̆ng xơnăm 2020, dang ei khul đei 12 ‘nu jang, jing dôm bơngai đei hŏk pơhrăm găh tơdrong ming man. Khei năr âu ki, đe ‘nhŏng hlôi man đei 7 tŏ hnam ‘nao păng lơ tơdrong kăl yua nai ăn kon pơlei lơ̆m pơlei. Dang ei tơdrong xa jên hăm bơngai man dơnơm noh đơ̆ng 9 truh 10 trĭu hlj 1 khei păng bơngai man tơgŭm noh pơhlom 6-7 trĭu hlj 1 khei. Atŭm hăm tơdrong pơjing đei tơdrong xa yua ăn dôm bơngai jang, rim xơnăm Khul jang axong tŏ xĕt jên đei yua vă răt kơmăi kơmŏk ‘măn pơm jang. ‘Nhŏng Y Kun Kƀuôr tơroi: “ ‘Nhŏng oh năm jang lơ bơih, dang ei adrin năm hŏk tơdrong jang ming man, pơtăl kơ năm ataih noh ba pơjing khul vă ming man ăn pơlei vă mŭk drăm hơtŏk hloh. Jang răh tơdrong jang unh hnam chă răh kon jên ăn unh hnam kơdih”

‘Nhŏng Y Riêng Niê, jang lơ̆m Khul ming man pơlei Tuôr B ăn tơbăt, xư đei xa jên pơhlom 300 rơbâu hlj 1 năr jang: “Jang tơdrong jang âu noh ƀônh jang, đei xa jên hơpăh, ƀôh hnam kơyươ khul jang ming man noh kon pơlei lui ngeh, pơ-ư pơ-ang"

Khul ming man pơlei Tuôr B jing tơdrong jang ‘nao hăm kon pơlei Êđê, đei tơ-iung pơjing đơ̆ng rŏng dôm lăm hŏk tơdrong jang ăn bơngai jang tơ̆ tơring pơxĕl. Kiơ̆ kơ ƀok Y Phen Niê, Kơdră Jơnŭm kon pơlei jang mir xăh Dray Sáp, jơnŭm pơgơ̆r tơring hlôi tơgŭm minh ƀar tơmam drăm, tơroi ăn tơdrong jang ming man... tơgŭm kon pơlei hơtŏk tơdrong jang ming man, pơih trong tơjur hin dơnuh kơjăp xơđơ̆ng hloh: “Xơkơ̆t trong jang âu hlôi xut lê̆ pơngot tơjur hin dơnuh noh kơjăp xơđơ̆ng hloh tơ̆ tơring nhôn. Adrol ki athei hơvơn đe đơ̆ng nai truh ming man tơ̆ tơring vă chă man hnam noh dang ei nhôn đei Khul ming man âu bơih. Nhôn hlôi tơguăt adoi nhen tơroh hăm tôm unh hnam kon pơlei tơ̆ tơring ưh đei năm hơvơn đe đơ̆ng tơring nai mă kơdih po kon pơlei tơ̆ tơring gơh chă ming man hnam oei ăn tơring tơrang po”

‘Nguah kơ Khul ming man pơlei Tuôr B, xăh Dray Sáp, tơ̆ minh ƀả xăh nai lơ̆m apŭng Krông Ana, kon pơlei kon kông adoi đei năm hŏk găh ming man păng iŏk jang tơnăp. Pơtih nhen ƀok Y Sao Mlô, tơ̆ pơlei Tơ Lơ, xăh Ea Na đơ̆ng minh bơngai tơgŭm đe man hnam, xư kiơ̆ hŏk tơdrong jang păng jing bơngai man tơm. Ƀok Y Sao tơroi: adrol ki, ƀok adrô̆ jang kiơ̆ khul man đĕch, jang dôm tơdrong ƀônh noh ưh đei xa jên lơ ôh. Ăh băt đei lăm pơtho pơm jang pơgơ̆r tơ̆ tơring, ƀok hlôi chih măt năm hŏk. Adrin pơ-‘nam hŏk hơlen tơ̆ lăm tôm tong, đơ̆ng rŏng hŏk đang ‘măng khuă, ƀok đei tơ-‘ngla khul jang hơtŏk jing bơngai man dơnơm, hăm jên khei jang đei yua đơ̆ng 300.000 - 350.000 hlj 1 năr.

Oei ƀok Y Xiếp Byă, tơ̆ pơlei Kruế, xăh Ea Bông, mă hlôi jing bơngai man dơnơm, mă lei kơyươ kăl hơtŏk pơ-‘lơ̆ng tơdrong juaih kơ po noh ƀok hlôi chih măt hŏk găh tơdrong ming man kơjung hloh. Kiơ̆ đơ̆ng lăm hŏk, ưh adrô̆ băt jô̆ hơlen găh tơchơ̆t ming man păng tơmam drăm ming man hnam âu to, mă ƀok oei băt hơdăh găh tơdrong vei xơđơ̆ng rơgoh lơ̆m kơplăh chă pơm jang.

Kiơ̆ Anih jang Yăo yŭk thương xwên – Pơtho tơdrong jang apŭng Krông Ana, dêh char Đăk Lắk, rim xơnăm tơdrong kăl hŏk pơm jang đơ̆ng bơngai jang tơ̆ tơring pơhlom 400 ‘nu. Lơ̆m noh, akŏm lơ̆m dôm tơdrong jang nhen: ming man hnam oei âu to; pơtăm păng iŏk yua pơmâu; xĭt mei kŏng ngĭp. Kiơ̆ đơ̆ng pơtho tơdrong jang hlôi tơgŭm ăn bơngai hŏk băt hơdăh tơchơ̆t kăp gĭt kơ rim tơdrong jang mă đe xư chih măt noh tơdrong jang đei jơnei xơđơ̆ng, đei tơdrong jang hơnơ̆ng păng đei xa jên hơtŏk ƀôh hơdăh.

Đơ̆ng đei jơnei kơ Khul ming man pơlei Tuôr B tơ-iung trong jang ‘nao lơ̆m tơdrong pơtho pơm jang, xek axong tơdrong jang tơ̆ dôm tơring pơxĕl, tơring kon pơlei kon kông tơ̆ dêh char Đăk Lăk lơ̆m khei năr truh: noh jing tơguăt hăm dôm tơdrong jang kăp gĭt, dôm tơdrong kăl lơ̆m tơdrong erih kon pơlei.